يوميات زوجة عراقية️️

الزعلانه

صارت عدنة حالت وفاة اقارب زوجي توفت بحريق عزمونه على اربعينة

قبل يوم الاربعين اني وجويسم تعاركنة عركة للستار وبقينه للصبح هوة يشمر واني ارد

اخر شي صار الفجر واني زعلانة علي ما حاجي وهوة هم تعب من الطلايب وقرر يصالحني واني ما قبلت اخر شي اذن الاذان صلينة وخابرونه نطلع الموقع تجمع المدعوين للأربعين مال المرحومة
وهاذة الحجي اني ويا مانايمين ولا دقيقه

المهم طول الطريق كل ما ينزلون يم استراحة لشرب ماء او لحاجة او للاكل جويسم يفتر ويدك الجامة واني ادير وجهي عود زعلانة

ليش ما اكو مرة جبيرة بالعمر اصير جوارين اهل المرحومة رايحة ويانه للاربعين منتبهة علينه

كل ما يجي يفتر علية يحاجيني  واني مرات اجاوبه ومرات لا هية تباوع وتخلي ايديهة على حلكهة وتكول ( شوف شوف شوف ) هية كاعدة بالكرسي الي كدامي واني كاعدة بالاخير وجويسم صاعد بغير سيارة

اخر مرة اجة جويسم دك الجامة علية كلي
اجيبلج مي فتحت الجامة كتله ماريد بطريقة وحدة تدلل كلي زين نمتي ولو شوي كتله لاااء كلي خل اجيبلج تتريكين كتلة لتلح ترة تلعب نفسي

الحجية طكت روحة جان تكول ( مايصير والله مايصير شنو هاي الوضعية شوف شوف حته عيب من الحضور ) اني اسمعهة بس اضحك وي روحي وما حاجيهة
الى ان زرنه الامام ونزلنه زرنه المرحومة ورجعنة وبالطريق نزلو يتغدون ونزلنه احنه هم النسوان للمطعم

صارت كعدتي يم الحجية 😂 وجويسم كاعد يم الزلم ميز وحدهم

فهوة من بعيد ايأشرلي واني ادير وجهي 😂
الحجية ما تحملت جان تكلي خالة ذاك الزلمة تعرفينه
سويت روحي ماعرف شتقصد
كتلهة ياهوة كالت ذاك الابس بلوز ازرك كتلهة قصدج الي كاعد يم زوج المرحومة كالت اي كتلهة اي خاله اعرفة
غير زوجي المرة خلت ايدة على حلكة وكالت ياااااااع رجلج
كتلهة اي خالة رجلي
وظلت المرة تتعذر خالة عذريني خاله مستحية منج والله مادريت بي زوجج عبالي ديتحارش بيج

😂😂😂كتله خاله جاية ويه عالم للزيارة واحد يتحارش بيه
وحجي وياا شون رهمتيهة 😂😂😂

المهم هنوب كعدت تحجي علية ليش رضيتي بي وهوة اكبر منج مبين  ونتي احلة منة وووووووو

خالتي يرحم اهلج جوزي مني 🤣🤣

عاد اني لكيته فرصة احرك كلبه ومن رجعنه عود صالحني وحجيتلة عالحجية
اني احجيله وهوة يكلي نجبي اسكتي عاد جذابه ماكو هيج شي

المهم الحجية ما عباله رجلي وعباله يتحارش بيه واني راضيه وتعزز علي 😂😂 وكل ما اشوفني تكلي خالة بريني الذمة 😂😂