شونچن يحلوات يسندوسات 💘
واني دافرفر بالفيس شفت منشور وحدة تكول اريد زوجي ينتبهلي والبنات كعدن ينصحن بيهة
اخذتني ذاكرتي الموقف صار قبل سنة تحديداً في فصل الشتاء ❄️
مرة ورة ما خلصت عشاهم دخلت للحمام سبحت طبعاً شامبو ومكيف وغسول مال جسم وكابة الروائح من شعري وجسمي بالعطور الجميلة .... ليش مو ضرب براسي اتحارش بجويسم وكلت استخدم مواهبي وهالعطور وخلي جويسم تموع روحة من العطر ويحجي ويكول ( افيييش شون ريحة طيبة )
ما نشفت شعري عفته وهوة مبلل بس نشفت جسمي ولبست وطبعاً ورة الحمام صابونه جسم وعطر بخة بختين
اجيت للهول وجويسم ماخذله صفنه عالتلفزيون مندمج بالاخبار وكفت كباله بس واكفة صفح وبيدي المشط حته من امشط القطرات مال المي توكع على جويسم ويشم الريحة
مشطت مشطت مشطت والقطرات تطافر علي ولا كأنه تالي انزعج جان يكلي ليش ما مشطتي بالحمام كتله ليش زاعجتك بتمشيطي كليل لا بس الجو بارد ونتي شعرج مبلل وهسة تبردين ( طبعاً رزلني بطريقه دبلوماسية )
الظاهر التمشيط مجاب نتيجة خل احول على طريقة ثانية
اجيت كعدت يمة كتله مشطلي انته اخذ المشط من ايدي اول ما حط المشط بشعري عطت كلي شبيچ كتله عفية مو تنبت سنون المشط براسي مو زرفته الدماغي كال خوش رجع حط المشط براسي عطت كلي شكوووووو كتله اي لتعت شعري هيج دمرتني كلي شون امشط لعد كتله الزم الخصله ومشط مو تعت بي يمعود رجع حط المشط براسي عطت كلي وهسة شكو كتله سلامتك شو نطيني المشط ماريد اني امشط
التمشيط مجاب نتيجة خل نحول على طريقه ثانية ورة مكملت تمشيط شلت شعري بالقراصة واجيت كعدت يمه عالتخم اني كلت ويه روحي هسة يشم العطور ويجرني يمه شو هاذة ماكو شي صافن عالتلفزيون تالي كعدت بصفه كلش ودحست روحي بحظنه ونتجيت على رجلة جان يكلي بس بله زحمة عليج رجلي اشنجت باوعت علي استغفر الله ربي واسالك الصبر
ادنيت منه شوي وهم ماكو شي كتله جسوم كلي هااا كتله بردانه كلي كومي لبسي ثخين ملابسج مدفيج خفيفه
كتلة انته زوجي ومن واجبك ادفيني كلي اي طبعاً واجبي لعد هاي الصوبه المن مشعولة غير حته تدفين 🤦♀️🤦♀️
كتلة تمام 😤 اجيت كعدت يم الصوبة وحضنتهة حضن بحيث ماخليت دفو يطلع منهة لا منا ولا منا
كلي شوي وخري خل الحرارة تتوزع كتلة والله انتة كلت شاعل الصوبه ادفيج فالصوبه الي وحدي لان كلشي بهاذ الوجود باررررررد
اخذله صفنة كلي ليش داحسة بسمار كتله هاااااا هاي لكفتهة بس صارلي ساعه احاول وياك حته بس تشمني ما لكفتهة
جان يكلي اي سأليني من الاول يابه عطري طيب لو لا حته انطيج رأي
دتعالي يمي داشمج 🤣🤣🤣🤣كتله جسومي ماكو فايدة ماكو فايدة
وعفته وصعدت لفراشي وتغطيت ودفيت واني اكول
ماكو فايدة ماكو فايدة 🙃🙃
ودمتم سالمين
أنت تقرأ
يوميات زوجة عراقية️️
Humorمواقف طريفة منقولة لكم بقلم زوجة عراقية️️ وتقول لكم (( حياتنة سر كبير نحتفظ به خلف جدران منازلنا حبيت تشاركوني مواقف من حياتي بيهة حزينه بيهة مضحكة بيهة نطلب النصح لا تخلو المواقف من الفكاهة ولا يعني الشجار عدم وجود الحب العكس هو الصحيح الحب جمع...
