يوميات زوجة عراقية️️

ابو طبر

على طاري الخوف  طبعاً الخوف انواع

اكو خوف طبيعي ومألوف واكو خوف خارج عن المألوف

امي تسولفلنة

تكول بذاك زمنه ذاع صيت ابو طبر والجرائم والقتل والعوائل الي نقتلت

تكول صار خوف عند الاهالي مو طبيعي

تكول چنة انام بالصطوح باليل على برودة الجو ومسوين جدول هية ومرت عمي يوم عليهة كنس ورش الصطح والفراش ويوم الثاني مرت عمي عليهة الكنس والرش والفرش
تكول بيوم الي علية اصعد من وكت خاف يصير المغرب ويصعدلي ابو طبر

ليش ما بيوم صاعدة ومن الخوف تتلفت منا ومنا وهية تنظف ويتراوالهة ابو طبر من صطح الجوارين يطفر عليهة تحلف يمين امي تكول شفته شوف عين كدامي هلكد ما افكر بي وخايفه ومن خوفة كامت يتهيأ اله يطفر عليهة وطكهة بعيطة ( يبوووووووووووووو )خلت بيت جدي متندل باب الصطح منين ومن يصعدون يلكون امي وحدهة تصرخ

شبيج يمعودة منو وياج تكلهم ابو طبر
تالي ابويه حرم عليهة صعدت الصطح وحته نومة منام بعد فوك نتحمل الحر بالغرفة ولا هالرعب

تكول كمنه انام بالغرفة ونقفلهة بالقفل خاف ابو طبر يفوتلنه هاذ الحجي ابويه مل منهة وهوة يفهمهة ابو طبر ميجي عالناس الفقرة يروح للزناكين  ميفيد الحجي امي كاتلهة الرعب
وفد يوم امي كاعدة ترضع باخوية عبدالله نص اليل تكول ليش ما اباوع واشوف ابو طبر نزل من الصطح وعالدرج داينزل وشايل بيدة الطبر ومتوجه عالغرفة
تكول وطكة بعيطة ( يبوووووووووووووووو ) طبعاً ابويه نايم والبيت كلة نايم والباب مقفوله تكول ابوكم ماعرف يندل طريقة يريد يوصل يم نقطة الضوة دايشعل الضوة ماكدر يوصل ماتت رجلي من عيطة امي وعمي من سامع العيطة طالع من غرفته ركض ويدفر بالباب يريد يفتحة وهاذ الحجي امي مستمرة بالعياط تكول لما ابوج شغل الضوة وعمج فلش الباب اني متت وطبو علية كل ظنهم ابويه كاتلهة نص اليل
لما ساليهة شبيج تكلهم ابو طبر نزل عالدرج وشايل الطبر

صدك جذب ولج الباب مقفول والبيت كله مقفل يادرج هاذة الي شفتي ونتي ابطن الغرفة وذيج اليله للصبح كاعدين يمهة حراسة

نوب كامو ميعوفوهة وحدهة خاف تجيهة الحاله واشوف ابو طبر وتسبيهم تكول وذاك اليوم وابوكم طلع للشغل من الصبح وتأكد من بيبيتي اليوم ماعدهة طلعه ومسواك اله طلع
جدي طالع همات الشغله ومرت عمي عد اهلهة وعمي همات بدوامة وبيبيتي كومي وسويلج تسيورة على كرايبهة وعوفي جنتج الخوافة بالبيت وحدهة رغم منبهين عليهة متعوفيه وحدهة اله واحد من عدنه يرجع
الحجية ما صرفلهة كومي وطلعي تكول امي اني اشتغل وجامعه اخوتكم يمي يلعبون وعبدالله زغير بالفراش وتلفت منا ومنا لا يدخل علية ابو طبر

تكول واني اشتغل وجان اسمع باب الكراج انفتح ومد راسي من المطبخ وشوف ابو طبر دخل علينه وبيدة الطبر تكول وطكة بعيطة ( يبوووووووووو ) وجهالة الزغار تصركعو من الصريخ وتشيل ابنه الزغير واخوتة الكبار تسحلهم وتطلع من البيت ركض للشارع هية والصريخ وجهالة وياه تصرخ وتلتم الجوارين والناس عليه وهية تصرخ ابو طبر وناس كله مطافر اخر شي ملتمة النسوان يمة ومهديتهة ومكابلاتهة وكاعدات الما اجة ابويه من الشغل ويشوف امي وجهالهة بالشارع كاعدة والنسوان كاعده يمة
ابوية من شايف المنضر ميت بدمة عباله صاير شي والجهال بالمنطقه متلكيته عمو ابو طبر ابيتكم

عاد لازمين بيبيتي غسل ولبس رزاله امناج اله طلعنه شون تعوفيهة
ابوية يكمل السالفه
يكول لما ذاعو بتلفزيون لزمو عصابة ابو طبر احنه متشاهدين
مو من ابو طبر لا من امكم وخوفهة من ابو طبر

لما حاكمو وعدمو يكول نوب كام يجيهة بالاحلام هوة وطبر مالته اخر شي كلت ما منه جارة المرة راح تتخبل
ويكوم ابوية ويراجع بيهة طبيب نفسي اله امي رجعت طبيعية

ومرت السنين وكل ما اشوف صور ابو طبر اذكر امي وخوفهة الغير طبيعي وكلهة هاذة حبيبج ناشرين صورته
تكلي الله لا يوفقه بكبرة بس ذنبي كفاية رب العالمين يحاسبة علي

ههههههههههه ودمتم سالمين