حبيباتي صديقاتي بما انو طالبوني بكتابه بارت زغير
جبتلكم واحد بس شوي بي رعب 🤯🤯
عنوان بارت اليوم ( جويسم من يدك الناقصة )
فديوم بليل جويسم جان منبطح عالتخم ويتفرج عالاخبار ويغفي وبنتي جانت بالمطبخ واني جنت بالهول يم جويسم بس كاعد اصفح
فجأةوسمع البنيه تصرخ ( ماما ماما ماما ) يمة يا ستار الحك بتك مدري شصار بيهة
ما احجيلكم جويسم من سمع العيطه مالتي وعيطة بتي وهوة جان يغفي رأساً نكلب من التخم للكاع ويصيح هاا هاا هااا
رحت قبله للمطبخ وشفت البنيه محصورة بالزاويه وتتراجف ( وج يمة شبيچ ) جان تكلي ماما صرصرة ماما عفيه
اني سمعت صرصرة وطكهة ركضه من المطبخ للهول الزلمه لكيته يابس بمكانه عباله بته احتركت ومابي يروح للمطبخ ويشوفهة محروكة واني رجعت للهول ركضه صاروخية الرجال مات بعد ماكدر يتنفس بس طلعت منه كلمه وحدة ( شكو )
كعدت كباله وكله الحك الحك وهوة انتهة والله العظيم 😆😆 تالي كدر يفتح حلكة ويحجي ( شبيهة شصار بيهة )
كتله صرصرة صرصرة
يابه ما كللكم لزم گلبه وكعد يجر النفس وهوة يستغفر نوب بتي اجت تركض 🏃♀️ وجتي كعدت بصفي وتحجي عليه شون تعوفيني وي الصرصر بالمطبخ
كتلهة باعي البطرانه بابا هاي صرصر مو اي شي المهم
يابه جويسم كوم اكتل الصرصرة وهوة لابسنه يمعود كوم اكتل الصرصرة ترة منكدر ندخل للمطبخ وهوة لابسنه عالهبطه الي اكلهة
ورة ثواني رجع جويسم مندمج بالتلفزيون ومنبطح عالتخم واني كاعدة كبال باب المطبخ وعيني عالمطبخ لاتروح تجينه الصرصرة وبتي كاعدة بصفي بس والله ما حجيلكم كمية الخوف وعيني ما فاركت باب المطبخ
تالي اندار على بتي تحاجيني وتكلي ماما شون يعني اليوم مافوت للمطبخ كتلهة شسوي الله ماهادي يكوم يكتلهة ويه ما دا احچي وي بتي ورجعت عيني على باب المطبخ
وشوفلك الصرصرة جتي طايرة من باب المطبخ علينه للهول واني طكيته ب ( يبوووووووووووووووووووو ) الصرصر جانه
وجويسم سمع اليبووووووو ونكلب من التخم للكاع وهوة مصوفر وباوع علية واني اكمز وعيط والبنيه ويايه تكمز
كال شبيكم كتله الصرصرة جتي من المطبخ طياري الحكلنه عاد هوة اول مرة بحياته يسبنه ( لنعل ابوكم يابو هاي المله الي الله بلاني بيهة ) وچان يشيل مخدته ويصعد فوك اول ما خلة رجله عالدرج وجان الكهرباء تطفة
😱😱وتخايلو الرعب كهرباء طفت وصرصرة طيارة موجودة بالبيت شنو راح يكون شعوري
متت كتلني الخوف كتل وياساعه التجي وتطير عليه ولزم روحي وختل بالزاوية مال الهول وتلزك بتي روحهة بيه هاذ الحجي جويسم كمل طريقه للغرفة فوك وعافنه للرعب جوة وهنوب اصيح اصيح اصيح علي ولا عبالك ابد عافنه للخوف وصعد
بقينه اني وبتي ملزوكين بالزاويه ملطوشين بالحايط وناسيه ابني الزغير وبهالاثناء وفد شي لزك بيه وشتغل العياط مالتنه اني اعيط وبتي عالواهس ويايه تعيط تالي يطلع ابني الزغير من خوفة اجة لزك بيه
ماحجيلكم جتي كهرباء السحب صار عدنه شويه امل
بس هم بعدنه بخطر كالت ماما شلون كتلهة وين تلفونج كالت بيدي همزين ماشمرته كتلهة خابري علي بلكي ينزل يكتلهة هاي الحجي وحنه بعدنه واكفين بالزاوية
صدك تدك على تلفونة ويطلع تلفونه عايفه يمنه بالهول شون ياربي شنسوي شنعمل وبهالاثناء وجان تنفتح باب الهول وشتغل العياط وجان اشوف ابني الجبير دخل
وك يمة الحكلنه كلي يمه شكو شهالصياح كتله ولك صرصرة وبوك عافنه ونهزم فوك
كلي تحجين صدك يمه سابين الدنيه من الصرصرة كتله ولك هاي صرصرة هسة ادورهة وتكتلهة ضحك وهز ايدة وعافنه ويريد يصعد فوك الغرفته وچلب بي والله ماتصعد اله قبلك احنه نصعد ونركض اني وبتي قبله للطابق الثاني
ونعوف البيت للصرصر تطير بكيفه وفوت للغرفة وقفل الباب ودحس جوة فتحت الباب بلوز جويسم 😜😜
وتلفلف بغطاية ونام من الرعب وكعد الصبح على ردمة جويسم شون عايفة بلوزة جوة فتحة الباب
كتله مثل ماعفتني كاتلني الخوف جوة وحدي البارحة 😜😜
ودمتم سالمين
أنت تقرأ
يوميات زوجة عراقية️️
Humorمواقف طريفة منقولة لكم بقلم زوجة عراقية️️ وتقول لكم (( حياتنة سر كبير نحتفظ به خلف جدران منازلنا حبيت تشاركوني مواقف من حياتي بيهة حزينه بيهة مضحكة بيهة نطلب النصح لا تخلو المواقف من الفكاهة ولا يعني الشجار عدم وجود الحب العكس هو الصحيح الحب جمع...
