يوميات زوجة عراقية️️

جدر تمن

يوميات ام سعدون

خوما نسيتوهة 😂😂

🧕🏻منو ينساني چااا هوة انه هم انسي

ايه خياتي

رمضانكم مبارك وايامكم سعيدة

تقبل الله منكم ومنا صالح الأعمال

يا حبايب اكيد بدعتن ولعبتن دقله بالفطور وطلعتن كل مواهبجن بالطبخ

انة كل ما اسوي طبخة طيبه ابو سعدون يكلي ( هوة غير انه علمتج )

كفيلكم هوة الله خاشوكة بالطبخ مالازم

بس حاطله كرسي بالمطبخ ومسوي اشراف

المهم البارحة انه اعزل بالبيت ونضف

الفروخ دهر فرهم تعاركو بيناتهم واحد يعيط على الثاني

انه طكت روحي وكمت هطرت واحد منهم ويااا ما ضربته ولني ضاربه اصبعي الزغير بالكاشيه المكرفعه

يمااااااه ياااا يمه

روحي صعدت للسماء العليا وهبطت للأرض السابعه

يومه الوبن الوبن والدم يجررري من اصبعي
الله ليراويكم وجع الاصبع الزغير اكيد لابد ما مارة بيكم

بس انه شني رأستاً ورم شاغت روحي يا خياتي متت متت هنوب الفروخ شافوني هيج وهمة كلهم اطافرو بعد انه فرفحت من وراهم ويعرفون الي راح يجيهم

ااااخ ابو سعدون فوك سمع صوتي ونزل يركض هااا خير خير سلامات

واني اعيطن اصبعي الحكلي اصبعي

وهوة يكلي ايباااه يرادلج عمليه

يمكن انه اطلع فرخ من اصبعي ويرادلي عمليه
مدري يضحك علي

كلش اخذتلي ساعه وانه مفرفحة يالله هديت شوي بس الوجع يصل علي ماهدة ولا سكن والزلمه يفتر عالويلاد انعل ابوكم
او من وراكم راح اصبع المرة

منو يغديني بعد ويفتر عليهم

تالي اجة يمي وكلي

👴 ادري بيج تعبانه بس ما تكومين تركبين كلاص تمن وحدة ابيض سوي

وانه استلمته قصف

🧕🏻 چااا انته خلصتهة علي انه اعلمج طبخ وانه اعلمج الطبخ وتالي كلاص تمن ما ادبرة ماشوفني مفرفحة روحي وصبعي ماكادرة اشيل روحي انوب يريدني اطبخله

شصيرن انه هااا ما تكلي شصير تعزيل البيت فطور غدة موتوني

انوب رادهة حجة عبالك ونزل عالولد فرد نزله

👴 كلة من وراكم صارت عصبيه كله من وراكم شوفو حالهة

انوب كلي ولا يهمج انه اطبخ  التمن
وراح للمطبخ

اسمعه جرقع برقع بس الصوت

وانة كاعدة بمكاني صحت علي

🧕🏻 ابو سعدون خاف ما ادبرهة اصبر هسة اجيك