يوميات زوجة عراقية️️

بيوتات اهلنا

قصتنة بعنوان #بيوتات_اهلنة   بقلمي قمر الزمان

زمااان چنة عايشين بيت واحد  متشاركين الكعدة والاكلة
والأسرار والافراح والاحزان چانت العلاقات تختلف بين العوائل اكو ترابط قوي 

ولد وبنات صداقات وعلاقات اخوية لكل الاعمار  رغم تنوع المذاهب والأعراق

فهذا بيت كردي وهذا بيت مصلاوي وهذا بيت بغدادي وهذا بيت ريفي

مجتمع متعدد لكن القلب واحد

( بيوتات اهلنة )

بغداد منطقة الشعب 

وعيت عالدنيه واني احب بت جيرانه صديقتي سروبة ما نتفارك اني وياها ابد رغم عندي خوات اكبر مني وازغر مني بس علاقتي بسروبة غير شكل سجلنه للروضة سوة اذكر  بالروضة جانو يعلمونه ويحفظونه وينطونه وجبة صباحية  حليب وبسكت ليساعه طعم البسكت والحليب بحلگي ماضكت بعد مثل طعمة جان خط الروضة يجي ياخذني اني وسروبه منطقتنه كانت بدايتهة  ما مبلطة ولا تلفونات زغيرة وكمز امي تلبسني وتكشخني واخويه الجبير يلزمني من ايدي ونوكف بدايه الفرع وتطلع سروبه من بيتهم اخوهة هم لازمهة ونوكف سوة ننتظر سيارة الروضة

ومرة من المرات كاشخة وشعري امي مسويته قرديلات ثنين وبذاك الوكت چان يطلع بالتلفزيون كارتون ( گلندايزر ) وجنت حيل متأثرة بي واكفين ننتظر  وجان تجيني الحاله وصحت (  دوق فليت ) وچيت   واوكع بالطين وهدومي كلة تليصت واخوية شبعني كفخات ورجعني للبيت لااا والمصيبه سروبه تضحك علية  لان اطينت لان قبل بيوم جانت ماطرة ومنطقتنه كله طين

اوووف ويرجعني اخوية سحل للبيت وتغيرلي امي هدومي بس شبعت بجي مو لان تكفخت ولا لان تطينت بس لان صديقتي ضحكت علية  ههههههه عقل جهال

وبيوم قررت سروبه ما اداوم بالروضة بعد واني سمعت سروبه بطلت واني هم دكيت رجل ماروح للروضه بعد مدام سروبه متروح  وما فادت كل محاولات امي وابويه اله سروبه وياي وذيج هم معنفصة على اهلهة ما تقبل اداوم

ليهسة اذكر اسمهة ( روضة البنفسج ) وحته شكل السيارة الي تودينه وجيبنه لونه سمائي والمعلمات كل طالب يم بيته توصله وبيدهة تنزلنه وتسلمنه الاهالينه ومع ذلك من بطلت ابويه راح للمديرة وطلب منهة شهادة تخرج وهية ماقصرت نطتني شهادة كلتله هية هادئة ومسالمه تستحق شهادة تخرج

هههههههههه مدري منين متخرجة على كلاً المهم خلصت من كعدة الصبح وصار عندي وقت زايد العب بي وي  سروبة

جانت عندي احلة شي من امي تاخذني وياها للسوگ الله الله تسوگ امي ولان منطقتنه طينه بالشته تصعدني بالعربانه ام الحصان وهية هم تصعد ويوصلنه للفرع مالتنه

وچانت كل الامهات هالشكل يسون وحنه جهالهم عدنه عيد من نصعد بالعربانه ام الحصاان

والله وكت  وذكر  نفس هاي العربانه ام الحصان بالعيد نطي درهم ويفرفرنه المنطقه وحنه  متونسين نفتر