🌺 مساء المحبة لكل الأحبة 🌺
طبعا هاذة الشته كانت عندي مشاريع كثيرة وتغيرات واسعه وبما ان جويسم تفكيرة رجعي فبهالحالة لازم اخطط وتكتك حته اكدر انفذ
يوم الخميس ظهريه ورة مكملنه غدة وشرب شاي سألته
جسومي حبيبي 🥰 كلي هااا كتله اريد اروح للسوك كلي اشعدج كتله بتك تريد اجيبلهة شغله كلي روحي سألني منو يروح وياج كتله منو غير زوجي حبيبي كلي لعد اجليهة على باجر جمعه والعصر اروح ( ملاحظة ميطلع ويايه للسوك نهائيا الا للحالات الحرجة جدا ) سكتت ورة شويه اجة كلي يالله كومي كتله هاا كال يالله قبل لا اغير رأيي 😉😉 اول خطوة نجحت
كمت ابدل حته نطلع وصيت ابني ميطلع نهائيا الى ان ارجع للبيت اول مخطينه خارج البيت سألني هية شوصتج كتله تريد شبشب للبيت 😁😁هوة انتفض كلي بربج مطلعتني علمود شبشب كتله بكلبي ( جااا هوة انته غير متدري عليمن ما خذتك ) 😄😄 المهم دورنة بالسوك من اقصاه الى اقصاه ملكيت الي يعجبني كلي وهسة كتله بما انو صرنه قريبين تعال اشوفك هاي الشغله عجبتني كال امشي ولنه للمكان المقصود كلي شعدج هنا كتله هاي عاجبتني مكنسه كهربائيه عاموديه كلي شسوين بيهة مو عدج وحدة كتله الجبيرة تبقه جوة وهاي زغيرة اصعدهة فوك حته ما صعد ونزل كلي غير وقت كتله شبيك خل نشوف السعر 😙😙😙 طبعا اني معاملة قبل هالوكت وعرف السعر وقاطعته ويه ابو المحل وجايبه فلوسهة 😙😙😙
عاملنه وكملنه كلي امشي كتله خل نا خذهة مدام جينه كلي امشي غير وقت قفل بعد تمام كتله امشي تحركنه شويه كتله ليش مخليتني اخذهة كلي انتي مو جيتي علمود بتج شو صارت بيهة اجهزة كتله هسة اني عاجبتني ومحتاجتهة شكو وخرتني كولو بعد جدال طال وعرض انتهت بان اخذت مكنستين الي وحدة وبتي وحدة 💪
كال يالله بعد خو ماكو شي كتله لا مشينه مسافه كتله تعال شوف هاي الزوالي شكد حلوة نازله هالموسم 👀👀😁😁 كلي وشكو احنه بالزوالي خاف عدج ملعوبه كتله حته الشوف حرام 🥺🥺 كال امشي رحنه للزوالي ونشوفلك ما ابدع يد الفنانين النساجين شي احلة من شي وكفت يم هاي 👇 الي بالصورة بنجرت يمهة كتله هاي كال حلوة كتله خنشوف سعرهة كال وشكو احنه بسعرهة كتله تفيدني بالمطبخ كال مطبخج مو عدج وحدة كتله لو تذبحني على قبلة المسلمين هالشته مافرشهة اريد هاي حلوة نفهة والوانهة راهمة جيب ودي روح تعال عاملنه بعد فرة جدا طويله عريضه واكثر من مرة روح وتعال قطعنه العملة واخذت هاي 👇الزوليه 💪
كلي باعي ام الشبشب شعدج بعد مخطط كتله شعدي بعد هاذة هوة خل نرجع كلي سمعي لج طلعه للسوك بعد ماكو لان انتي خطيرة وتشكلين اكبر تهديد هههههههههه
وبقلبي احمل كثير من الامنيات ( بس مو هسة خل افوت فترة خاف الرجال ينجلط ) وما طلب الامنيات بالتمني
ولكن تؤخذ الدنيا غلابا
ورجعت للبيت منتعشة يقليباتي 🌺شلوني من اخطط 🌺
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
أنت تقرأ
يوميات زوجة عراقية️️
Humorمواقف طريفة منقولة لكم بقلم زوجة عراقية️️ وتقول لكم (( حياتنة سر كبير نحتفظ به خلف جدران منازلنا حبيت تشاركوني مواقف من حياتي بيهة حزينه بيهة مضحكة بيهة نطلب النصح لا تخلو المواقف من الفكاهة ولا يعني الشجار عدم وجود الحب العكس هو الصحيح الحب جمع...
