كاعدين اني واختي بالصالون اليوم الزفة والبارحة حنه اليوم بس اني واختي اجينه ما جبنه ويانه اختنه الثالثه ماله داعي اني كافي
وحدة بس ويه العروس تجي مو شرط اله جوكة واليوم اصلاً الشغل بس للعروس اني ما اسوي شي مكياج اني اسوي الروحي
وشعري اصلاً لابسة حجاب عكس البارحة
البارحة چنة كاشخين وغير شكل هههههههههههههه البارحة حنه وبس بنات فسوينه تسريحة ومكياج اني وخواتي والمصورة اجت للصالون واخذنه صور
احنه خوات ثلاثة اني الوسطانية واختي العروس الچبيرة واختي الي ازغر مني مجبتهة اليوم كلت مله داعي كولنه نجي كافي بس اني وياها
اختي كاعدة لازمة الكتلوك مال التسريحات والمكياج وكاعدين نتخير يا تسريحة اليوم تناسب البدله ويا مكياج لازم نغير عن البارحة بالحنة طبعاً الصالون مكتض بالعرايس مو بس اختي عروس والعرايس كولهن ماشاء الله حلوات وفرحانات
وچان تنفتح الباب ويدخلن ثنين بنات وحدة ثلاثينيه مبين من هيئتهة والثانيه تقريباً حسب تقديري من 25 سنه الى 28 مو اكثر ولا اقل ماعرف ليش جذبن انتباهي دون عن البقيه
وجانو شايلين معاهم كيس كبير داخله بدله بيضه وثنينهن دخلن سلمن وكعدن ولا نطقن بحرف عكس الباقيات ونتو شايفين الصالون شلون تدور الاحاديث والسوالف هههههههههههه صالون ومليان نسوان شتتوقعون وچماله مليان عرايس والمرافقات وياهم
الكوافيرة دتحجي وي اختي وتسالهة
اختاريتي عيني عروستنه تسريحة ومكياج يالله حتة داشتغلج
اي عجبني هذا الموديل بس ما وصيج اريد المكياج غير عن البارحة
مو تدللين بس فكي شعرج حته البنيه شسورة الج
ويه ما الكوافيرة دتحجي وي اختي اني عيني ويه البنات الي دخلو وساكتات ثنينهن حته كلام بيناتهن ماكو وانتبهت على صفنتي الكوافيرة من سالتهم
شنو عدكم حبايب شغل تردون
الثلاثينية جاوبت
عدنه حجز عروسة
هنا اخذتني الصفنه منو منهم العروسة اشو ثنينهم ساكتات واي مظاهر العرس ماعدهم
سالتهن الكوافيرة
منو من عدكم العروس
الاخت الكبيرة اشرت بيدهة بدون كلام على اختهة والاخت الازغر رفعت أيدها ✋ بدون كلام دلاله على انه هي العروس طبعاً انتابني الفضول جداً او مو بس اني لاااا كل الموجودات بالصالون انتبهو على وضعهم ماعرف ليش ركزت عليهم
اختي بلشت بيه الكوافيرة شسوار حته يسوون التسريحة واني صافنةًعلى هذي العروس غريب امرهة بيهة شي مميز جداً اي معالم للفرح مابيهة اي شي يدل على انو اليوم زواجهة ماكو
أنت تقرأ
يوميات زوجة عراقية️️
Humorمواقف طريفة منقولة لكم بقلم زوجة عراقية️️ وتقول لكم (( حياتنة سر كبير نحتفظ به خلف جدران منازلنا حبيت تشاركوني مواقف من حياتي بيهة حزينه بيهة مضحكة بيهة نطلب النصح لا تخلو المواقف من الفكاهة ولا يعني الشجار عدم وجود الحب العكس هو الصحيح الحب جمع...
