يوميات زوجة عراقية️️

حبوبتي

#سوالف اهلنة الطيبين

هاي واحد يسولف يگول من وعيت للدنيه لليوم وبيبيتي ادور ثواب

ما خلت شي ما سوته بأسم الثواب

يگول قبل ما چنة نصيح بيبي لا يابه لا كله نكول حبوبة

جان جدي چبير عمامة والكباريه مال العشيرة بيدة لان هوة اقدم واحد بالعشيرة والخير وجان الچبير على عمامة

فجانت الناس دوم ابيت جدي ابداً ما يفرغ
حبوبتي جانت ما تكعد بالبيت دومهة مسيرة يم فلان وعلان

هااا حجية وين ؟ رايحة يم بيت .....

حبوبه وين التسيورة اليوم ؟ يم بيت .........

حجية ارگدي ابيتچ ما يصير يومية مسيرة عالوادم

- چا انتم ما تردون صله رحم لعنة الله على قاطع الرحم

وهيج مخلصته الحجية

ولدهة يشترولهة قطع قماش بما انه هية مرة جبير العمام فلازم دوم كشخة

هية تلزم القماش وتودي الهذة فلان ماعدة وذاك علان فقير وهذيج حالتهم تعبانه

يمة ليش ثوبج قديم

- يمة چااا انتم ما تردون ثواب

حجية زحمة ثوبج تعبان ونتي مرة ....... الچبير

- الدنيه خلصانه وانه اريدن الأخرة

وهاي مخلصته هيج عليهم ولدهة يشترون تطيهن

بتهة اجيبلهة  تطيهن

جدي يشتري وينگل وهية تطي

الكرايب يجيبون صوغات الهة تطيهن
وضاله بهدوم القديمة والجديد تشيل وتطي ويضلون ولدهة يلطمون

ههههههه ومن واحد يسألهة حجيه ليش هدومج تعبانه ولدج ما يجيبولج
تشكي وتبچي

- هذا ما ذكرني وذاك ما جابلي والحجي ناسيني

محد يذكرني ويگول اخذ دشيديشه الامي ظاله انه لا شته ولا صيف احد ذاكرني

وجدي من يسمع هيج تحجي يكعد يسب ويشتم

( عوينت ابو اصلچ ) ( شتعلو بنار جهنم الي خلفوچ )

وحدة من چناينهة  وياها بالبيت تصير مرت عمي

مرت عمي تنظف وتطبخ وتغدي وتعشي والحجية تغافل مرت عمي وتعبي جيوبهة شباقي من الاكل

اذا شافت بزيزينه تطيهة

اذا شافت چليب تطي

وذا زاد تمن ومرگة تشيل المركة وترگعهة بالحايط
ومرت عمي تهطر روحة بالگاع ليش الحايط مليص مرگة

حبوبتي تكول خلي الذبان ياكل چاا انتو ماتردون الاخرتكم

هاي طقوس حبوبتي بالثواب

انتضرو سوالف حبوبتي بالجزء الثاني

يتبع