اسعد الله ايامكم بكل خير
ام سعدون ضايجة صارله فوك الشهر ما طالعه من البيت قررت ثاني يوم تسير يم بتهة
🧕🏻 ابو سعدون اني باجر احتمال اطلع
👴 وين ترحين
🧕🏻 اروح يم بتي
👴 شعدج
🧕🏻 ضايجة محبوسه بالبيت بزعت روحي
👴 مو انتي تعبانه مو مابيج حيل
🧕🏻 هوة انه اريدك توصلني
👴 لا اوصل ولا علية رجال عدي شغل مو تكولين رجليه يصلن عليه ماكدر امشي
🧕🏻 هاااه بية مابيه اوصل واذا كلش اضطريت اركب تك تك
👴 كعدي ابيتج وسكتي مرة مريضه توج كمتي على حيلج
🧕🏻اكلك مخنوكة مليت من البيت وحياطينه
👴 روحي ولي
ورة ساعة ابو سعدون يحجي وياها
👴 باجر شسويلنه غدة
🧕🏻 باجر اني طالعه
👴 وين تولين
🧕🏻لا حول ولا قوة الا بالله قبل ساعة كتلك اروح البتي
👴 خوش والله تروح البتهة تتغدة وتدلل واني اظل حاير بروحي هية هاي النسوان
🧕🏻ابو سعدون شتريد اني باجر طالعه من الصبح وحته ريوك بالبيت ما اتريك اروح يم بتي اتريك
وهذن مالاتك بطلهن
👴 وغدايه شلون
🧕🏻عدي بالثلاجة برياني واكو تشريب واكو مركة فاصوليه واكو قيمة ثواب دزولنه شتريد كدامك وشيعجبك
👴 او منو يحميلي ويحضرلي
🧕🏻 يبووووووووو على طلعتي الي ما صبح عليهة صبح
👴 على كيفج بويه صايرة ما تتحاجين شدعواج شكتلج انة
🧕🏻 لا عمي ما كلت واذا على التحضير والحمي صيح على جنتك لو بتك وانة راح اوصيهم
مر اليل على صاحبتنه وهية ما خلصانه من السانه كعدت المرة الصبح وخابرت بتهة وكالت الهة ترة جايه يمج اتريك
وبتهة كيفت راح تجي امهة يمهة
👩 يا صباح العافية شونج يمة وبوستهة وجهالهة فرحانين بيبيتهم جاية
🧕🏻 والله يا يمة نهزمت بروحي العزيزة غير طلع روحي ابيج من ورة هاي الجية
👩 شيريد ابويه ما يجوز من سوالفه
🧕🏻 چاا انتي ما تعرفينة
وهنة كاعدات يتريكن ما لذ وطاب من الاجبان
والكيمر والدبس
والبيض والچاي الحار المهيل
والبورك المحشة لحم وكرفس ومكسب
والصمون الحار
🧕🏻 شدعوة يمة هالكد شكل شكلين چاا انتي ريوك ميت نوع
👩 قابل يوميه جايتني اكلي من الي يعجبج والي ميعجبج عوفي قابل نذبه نرجعه للثلاجة
توهن يتريكن ام سعدون وبتهة ودك التلفون جاوبت صاحبتنه
🧕🏻 الووو صباح الخير ابو سعدون
👴 صباح الخير
اكلج انه كلش جوعان راح اجي اتريك حضري الجاي بين ما اجي
🧕🏻 ابو سعدون انه طالعه
👴 وين وليتي طلعتي
🧕🏻
ابو سعدون زحمة بتك كاعدة جان قسمتلك والله
المهم سدو التلفون بعد دهرة طويله
بس المرة ماكدرت بعد تتريك وغصت بلكمتهة لان رجلهة جوعان وكدامهة هية اصناف الريوكات
فضت جلسه الريوك والامايه وبتهة كاعدات يسولفن ويلعبن ويه الزغار
صار وقت الظهر كامت البنت تحضر للغدة بين ما ام سعدون تصلي
خلصت صلاه صاحبتنة ودك التلفون
🧕🏻 هاا ابو سعدون
👴 اكلج صمون ماعدنه
🧕🏻ابو سعدون انه طالعه
👴ادري طالعه صمون صمون ماعدنه
🧕🏻 ابو سعدون اني طالعه
👴 ادري بيج طالعه وادري بيج يم بتج داكلج صمون عدنه
🧕🏻 ابو سعدون اني طالعة
👴 فهمت فهمت يالله روحي ولي
اوكفي اوكفي قبل لا تولين شنو انتو ما جايبين صمون الصبح
🧕🏻 ابووووووو سعدون اني طااااالعه ومااااا تريكت بالبيت تريكت يم بتي
ونته تدري من البارحة كتلك باجر الصبح طالعه
طالعه
طالعه
وما جبنه صموووون لان ما تريكت انه لان انه طالعه طالعه طالعه وريوكي صار يم بتي هااا ابو سعدون وصلت وهسة راح تتغدة يا رجال وكلشي موجود يمك
وتعال كلي شسوي بالصمون
👴 اثرد بالتشريب
🧕🏻 والتشريب يثردون صمون ويا غير
خبز
👴 وحنه عدنه خبز
🧕🏻 لا ما عدنه
👴 هاااه ليش ما دزيتي
🧕🏻يبوووووووووووووووو على الماتولي ياااا نااااس يااا عالم ترة اني طالعه
👴 وجع شني بويه محد يكدر يحجي وياج
اكلج صدك انتو شراح تتغدون
🧕🏻 بتك شاويه دجاج وتمن اصفر
👴 ايه بالعافيه عمي وانه توكليني اكل بايت ليش لا ترحين هناك تدللين عليهم
🧕🏻 زين ليش ما تجي وتتغدة ويانه
👴 شبيه مسودن اطلع بهذا الحر بالعافيه عليج انتي ريوك وغدة وان شاء الله هم عشة ناوية
🧕🏻 ابو سعدون جايه انه جايه لا تطلع من البيت جايه ترة بروح موتاك لا تطلع
😂😂😂😂😂😂😂😂
اقتلوهم قبل ان يتكاثرو 🔪🔪
🪓🪓
⛏⛏
أنت تقرأ
يوميات زوجة عراقية️️
Humorمواقف طريفة منقولة لكم بقلم زوجة عراقية️️ وتقول لكم (( حياتنة سر كبير نحتفظ به خلف جدران منازلنا حبيت تشاركوني مواقف من حياتي بيهة حزينه بيهة مضحكة بيهة نطلب النصح لا تخلو المواقف من الفكاهة ولا يعني الشجار عدم وجود الحب العكس هو الصحيح الحب جمع...
