يوميات زوجة عراقية️️

علاوي

السلام عليكم ورحمة الله وبركاته

مساكم الله بالخير احبابي مشتاقون

بفضل الله وبفضل دعواتكم والحمد لله عبرة الوالدة مرحلة الخطر وحالياً دتمر بفترة العلاج مابعد العملية وبحكم عمرهة والازمة الصحية الي مرة بيهة حالياً تعبانة مع ذلك نحمد الله على رجعوهة للحياة النة

طبعاً حبيت اجيبلكم شي ويايه خوما ادخل وأيدي فارغة  خاصة صار  13 يوم مشايفتكم هاي الفترة قضيته من مستشفى الى مستشفى وخلال هاي الرحلة صادفتني هواي مواقف منهة المضحكة ومنهة المبكية

فلي يبكي راح اتركة حته ما احزنكم وبما انه اعرفكم تحبون الضحكة جبتلكم هذا الموقف

بعد ما اخذنة الوالدة الى مستشفى خاص لاجراء العملية وبعد ما اتفقنه وية الدكتور المختص بحالة الوالدة واثناء المعاينه وقبل وقت العملية بساعه انتكست الوالدة ودخلت بغيبوبه على اثرهة قرر الدكتور تحويلهة الى مدينه الطب للمعاينه
نقلناها بالاسعاف الى مدينه الطب وهناك دخلنه ولكينة امة لا اله الا الله مگلوبة من مرضى ومراجعين ودكاترة وكادر طبي مو مستشفى سوك هرج المهم

دخلنه والدكتورة جانت عصبيه عالمراجعين لان هوسة وزخم وماقبلت نهائيا ً تعاين اي حاله مدام الفوضى موجودة ومنا حالة امي حرجة ومنا الدكاترة معاندين تقريبا ساعه كاملة محد يتقرب النه نتوسل بالرايح والجاي ومحد يجي يعاين بهالاثناء

اشوفلك واحد دخل للطوارئ بصورة غريبه وحدة لازمته من ظهرة وتدفع بي بطريقه خاله كفوف اديهة ثنينهم بظهرة 🤚✋  وتدفعه ودخلته بهاي الصورة للطوارئ اني من شفتهم عبالي الرجال بي تخلف عقلي والمرة داتدفعه حته ادخلة مستشفى او تصورة انو من كثر الزخم دتحاول ادفعه حته تبعد الناس وتكدر تفوت لكن الي تبين انو الرجال مريض والمرة جايبته دفع وهوة ما قابل 😆

عاد هية راساً سحبت جهاز التنفس وخلته على وجه زوجهة حته يتنفس الظاهر مار بازمة ضيق نفس
ورة شويه اسمعهة تكلة علاوي كول يا الله
وهوة يكللهة انتي شبيج اني منتهي وما اظن اطلع منهة
وهية  تكلة يمعود والله اتعس من حالتك وطلعو كلشي مابيهم وهوة يرجع يكلهة ما اظن ما اظن
وهية ترد علي تكلة غير انته ستعجلتنه وطلعتنه من المستشفى وهوة يرجع يكلهة اني منتهي عليش باقي هناك وهية خطية من خوفهة تكله لتفاول على روحك ترة انته مابيك شي

الغريب بالموضوع انو علاوي كل هاي المحادثة وهوة خال رجل على رجل ويتمضيك عليهة وهية تخاف علي ومسايسته ومدللته وهوة كل ساع مدهربهلة حجايه يخليهة تخترع المهم ورة شوي اباوع علاوي التمت علي الدكاترة ويعاينون حالته ويرحون وحنه محد يوصل يمنه وهوة يتمضيك وكل شوي مهبط المرة ومخلي رجل على رجل

ورة دخولهم بنص ساعه وجوي مجموعه شباب على علاوي مخروعين

هاا هااا علاوي شبيك سلامات اسم الله يمعود غداك الشر وهوة يكللهم اني مودع اني منتهي والمرة خطيه تلطم وتكلة لتكول هيج مابيك شي بس تفائل والله اتعس منك واوكسجينهم 60 وطلعو ونته اوكسجينك 70 يعني زين وهوة يكلهة ما اظن ما اظن

ورة شوي جوي جوكة لاخ على علاوي اسم الله خالو اسم الله سلامات وهوة يجاوبهم اني منتهي اني مودع وهم التمت علي الدكاترة ويجيكون حالته وهوة مخلي رجل على رجل

لمدة ساعتين ونص وحنه مخلين الوالدة على سديه الاسعاف وهية فاقدة ومحد يقبل يجي يعاين وعلاوي جوكة تروح وجوكة تجي تعاين حالته اخر شي ابو جهالي دخل على مدير المستشفى وجاب ورقة نطيناها للدكتورة اله قبلت تكشف عليهة بهالاثناء اسمع مرت علاوي تصيح وتضرب على رجلهة علاووي علاووي

اباوع علاوي مغمض عيونه وغافي وهية عبالهة بي شي هوة يفز على صريخهة ويكلهة هااا شكو شكو وهية تكله لا تهبطني لا توكع كلبي ويرجع يغمض عينة وهية تصرخ علاووي علاووي

وهوة يرجع يفز وهاي كلة والجماعه الي وياهم ساعة يصيحون خالو علاوي وذاكمة يصيحون علاوي بينه ولا بيك والمرة كاعدة على جمر وكل شوي صارخة وعلاوي حاط رجل على رجل والدكاترة رايحة جايه علي

اخر المطاف اجوي علينة الحرس كالو ميصير وكفتكم هنا والسديه مكانة غلط اطبكوهة هنااا كتلهم وين هناا
اشرولي على مكان فارغ بصف علاوي

كتلهم هنااا اخلي امي يم علاوي ابداً والله مايصير كالو ليش كتلهم علاوي بي كورونا وتردون اذبون امي يمه والحرس يكلي منو علاوي

كتله هذا علاوي الي مخبوصين بي الدكاترة ومرته تلطم وجماعته يتفدونه وهوة حاط رجل على رجل وهاي امي المرة مخطرة محد مكلبهة غير اذبح روحي اذا خليتنة بصفة

المهم صفيت السدية مال امي على صفحة بس مو بصف علاوي لامقابيلة بحيث اشوف وسمع الي يدور
اخر شي افتهمت شغلة علاوي

علاوي قبل فترة صايرة بي كورونا وداخل مستشفى وطايب منهة وصارلة فترة من خلصان من الكورونا وبهذا اليوم علاوي متعرض الوعكة صحية بضيق التنفس وبما انو علاوي مدلل من مرته  ومدلل من خواته ومدلل من اقاربة فعلاوي مستغل الوضع وخال رجل على رجل وثابرهم ثبيرة وهوة كلشي ما بي لا كورونا ولا شي بس كثر دلال المرة الة خلته يصير ماصخ كلش ويتعنطز عليهة ويدلل ويدعي المرض

هاااا وهوة مخلي رجل على رجل

هنوب الجماعه الي ويانه مو يشوفون الدكاترة مخبوصين بعلاوي والناس الي ويا مثبورين بي
كل شوي وكالو خطيه هذا شبي يمكن حالته خطرة وهمة ميعرفون علاوي دايدلل على مريتة وحظة كاعد والدكاترة ملتمه علي
اي لا تستغربون اذا كلت حظة كاعد الي شفته اثبتلي حته المرض حظوظ امي مرة جبيرة وفاقدة وبيه كسر والمفروض حاله انسانية ويتابعوهة وهمة ولا يمهة

وعلاوي مجرد ما صار عندة التهاب بالقصبات انخبصو خبص بي  حظوظ لوما حظوظ

المهم عفنة علاوي يدلل على مرته ودخلنه الوالدة للردهة لمتابعة حالتهة وخلصنة من مغثة علاووي

الله يبعد عنكم كل سوء
ومتشوفون شرر ولا اذيه بعزيز
ويبعد عنكم  الحوادث المؤذية
ودمتم سالمين 💋💋