يوميات زوجة عراقية️️

انا واخي (١) عروس مخبلة

فد مرة اخويه الجبير خابرني كلي اريدج تحضرين خطوبه ابني علاوي وتشوفين العروسة وتنطيني رايج
اني مكدرت اروح لان جان بوكتة ابني واكع من الطابق الثاني ومكسورة ايدة فعتذرت منه وماشفت العروسة بالخطبه

ورة اسبوعين خابرني يعزمني على زواج ابنه كتله اذا كدرت اجي لان جان ابني مجبسين ايدة وصعبه اطلع وهوة مكسور وهوسة وزفه الولد يتأذة كتله شدعوة مستعجلين اصبرو للعيد كلي ميقبل عليوي اله نخصمهة بساع الظاهر الولد ما يتحمل بعد 😂😂

كولو رحت للعرس طبعاً لا حضرت خطبه ولا حنة فلازم بالعرس احضر فمن وصلت الزفة جانت طالعه وابني حرك رجعت قبل لا تجي الزفة لان اذا ابقه ابني يسويلي مصيبه المهم رجعت وهم ما شفت العروس

ثاني يوم خابرت امي اسال على اخبار الزفة والعروس والعريس
امي كالتلي اسكتي يمة مصيبه وكعت على راس اخوج وكامت تبجي
صراحتاً اني نجر بوشي كتلهة شبيهة يمه العروس هبطتيني تراوالي غير شي الصراحة عاد امي صدمتني العروس طلعت مخبلة 👈🤦‍♀️😱😱
شلون ما لون كالت هاذ الي صار
وج يمة شلون مخبله مو خطبه ومهر ومحكمة شنو قابل ميفتهم لو امه عمية لو خواته لو خالاته الي راحن بالخطبه كالت كلهم نغشو بيهة كتلهة شغله ما تدخل للعقل شون زفوهة المهم كلت اروحلهم وشوف شنو القصه

رحت ثاني يوم من بعد ما ترخصت من ابو الجهال وسمحلي ورحت بيت اخوية افتهم الموضوع شنو عاد كعدو شرحولي الموقف العروس ماحسو بيهة مخبله اله من داخله للغرفة والعريس رايد ياخذهة وهية ما قابله وكايمه مكسرة الجامات ولاعبه لعب
كتلهم هم مو سبب يجوز خايفه يجوز غاصبهة كالو لا كعدو يحجولي شغلات عنهة فعلاً غريبه عاد كتلهم وهسة شنو القرار كالو اهلهة اخذوهة وتاهمينه احنه مخبليهة
كتله عمة علاوي فهمني ترة مدا استوعب ايام الخطبه مو جنت تروح الهم ماحسيت عليهة
يكلي عمة جانت كلش هادئة وتحجي بالمثاقيل وكلمه وتسكت وخاصه اهلهة ميعوفونه وحدنه زين وهسة عمة شنو كلي اهلهة اخذوهة يكلون بتنه تخبلت عدكم

اخوية كلي ترحين وياي نروح الهم واشوفيهة وتنطينه رأيج كتله اروح وياك طبعاً مرينه على بيت اهلي وابويه راح ويانه وخابر اخوية على صديقه همات اجة ابو محمد صديق اخوية وماخذ بت خالتي يعني عرف ونطلقنه البيت اهل العروس

طبعاً مدام كدرو يعبرون الشغله على بيت اخوية لحد ما زفوهم معناه الناس مو سهلين
والطريق كلة احذر بيهم لا تشربون شي منهم حت لو كلاص مي لا تاكلون شي دير بالكم الناس مو سهلين ترة
ووصي بابويه واخوية وأبو محمد الرجال كال مثل ما تكولين لازم ناخذ حذر وعيد وكرر لا تشربون لا تاكلون كلشي ما تحطون بحلوگم
ليما وصلنه البيتهم ودخلنه والناس استقبلونه وندخل للهول واذا البنيه نايمة بالفراش وكاعدة على راسهة خالتهة وخاله ايدهة على راسهة ومتخليهة تحجي
وكل ما تحجي البنيه كلمة الخاله تسكتهة وطبعاً طول ما احنه كاعدين الخاله تخوزر بيه

بدة اخوية بالكلام وياهم وطلب من عدهم ياخذهة الطبيب يجيك وضعهة وهم ظلو يراوغون ويماطلون جابو صينيه الشربت طبعاً هنا اني عيني عالكل خاف واحد ينسه
اباوع اخوية لزم كلاص الشربت وجرة وحدة شربه 😱😱
لعد اني المن احذر الطريق كلة اباوع ابو محمد تعذر والدي هم كلهم بيه سكر واني كتلهم صايمة
كوم يا اخوية من حركة كلبه والجو صيف وجر اكلاص لاخ واشربه 😱😱 نوب اني شتعلت لا بيه اكلة شجاك ولا بيه امنعه شافو همة مفرفح كومو وجيبوله كلاص مي وشيل الكلاص وكعه كعه وحدة 😱😱
لعد اني شلغيت الطريق كله والحلو الي بالموضوع ابو محمد الرجال الغريب التزم وهوة الموضوع ميخصه وابويه كذلك واني همات واخوية ابو الأنة لعب لعب بالمشروبات 😂😂

المهم بعد جدال وكلام خالت العروس تهمتنة ساحرين البنيه
وماقبلو تروح دكتور وجادلت بكتهة وياهم اخر شي طلعنة
وسالني اخوية هاا شنو رأيج كتله حته الي ميفتهم هم ينتبه البنيه مو صاحية وعدهة خلل بالدماغ ولي مصيطرة عليهة الخاله بحيث متخليهة تحجي وذا حجت تحجي شيش بيش وتخربط اخر شي كتله ونعم منك ومن حرصك هاي عود اني موصيتك لا تشرب شي
اخر المطاف وبعد مداولة لايام طويله ومرة من المرات علاوي العريس بساعه مغربيه وطك الخبال براسة ويركض بالشارع واخوته يركضون ورا
تاليهة قررو يطلكون البنيه واهلهة وافقو بس تاخذ حقهة كامل من ذهب وغراض وفراش وبعد هم فصلو اخوية مبلغ مالي
وطلكت البنيه
ورة فترة شايفيهة حامل ورجلهة راعي غنم وتركض بالشارع ورجلهة وراها وكوة مصيطر عليهة

وهاي هم مغامرة من مغامراتي مع اخوية