يوميات زوجة عراقية️️

لقرارهم رأي آخر

قصة جديدة بقلم ام عبودي ( قمر الزمان)
هذا البارت الأول هنا للاعلان
لكن باقي القصة راح تنزل بقسم خاص بنفس هذا الحساب

#لقرارهم_راي_آخر

بارت ١

يمة البنات عشرة وكول گليلات
يمة البنات صايغهن الصايغ ومات

افيششش شون ريحة طيبه  يا ماما يا حبيبتي

فوووزة وشحلاها
ظفايرها وراها
اجة الخاطوب يخطبها
وبوهة ما اطاها

اي والله ييا ماما ما ننطيكم بس للي يستاهلكم ويعرف قيمتكم

يمة البنات عشرة وكول گليلات .....

الله يساعدج ام فائزة اليوم تغنين ومنطربه ههههههههههه انتي منين اجيبين هاي الاغاني

الله يساعدك ويقوي حيلك الي عدة هيج وردات شون ما يكعد يغنيلهن يمة اروح فدوة ونذر للبنات
هذن بنياتي عزيزات گلبي

اي والله صدقتي عزيزات تعالي بابا فائزة اشتري الج والخواتج وخذي خوانج هم يختارون حبابه انتبهي من الشارع
لعد الحجية وين

هااا يمة جيت الله يساعدك

ويساعد حيلج امي شو ماكاعدة يمهم يمة شعجب

وك يمة مرتك صرعتني يوميه حاطتلي هالبنيات وتمشط وتغني كمت منهة مللتني تغنيلهن

يااااااا والله خوش ماغني لبنياتي حبيباتي حجيه انتي مدري ليش اضوجين من البنات غير هنة العافيه علواااه كون بعد بنات عدي

هجم راسج نوب بعد تريد بنات هية مكيوله البنيه هم وغم

لالا حجية ما ارضاها الج هنة الخير والبركة البنات عزيزات نسيتي حجيه من جتي فوازي  للدنيه شون الله وسع علية رزقي وكل ما تجي بنت من بناتي الله يرزقني اكثر واكثر على عينهم هذن عزيزات ابوهن

هاي المحاورة كل فترة تصير بين بيبيتي وامي وابويه ما يرضة على بيبي لان تضوج من خلفت البنات وامي وابويه يحبون البنات ومدللينه كلش مدللينه مو بس احنه حته الولد ابوي مدللهم وحريص عليهم بس بعد يدلعون البنات اكثر يكلون البنات رحمة للاب والام

اني فائزة اكبر وحدة بخواتي  ومن بعدي جني خواتي الخمسة وطبعاً بما انو امي صطرتنه بنات فشكد حاولت بيبي ازوج ابويه حته يخلف الولد بس هوة ما قبل وكال ابد اني عندي لو عشرين ابنيه هم مافكر بالولد الى ان جوي خواني  الثنين للدنية وهنا بعد بطلت بيبي من الحجي على امي على ابو خلفتج كله بنات
اهلي حالتهم الماديه كلش زينه عدهم خير من الله وابويه يكول من اجيتن للدنيه الله رزقني من اوسع ابوابه فجانو حريصين على دراستنه اني وخواني
طبعًا احنه كلنة بنات او ولد اعمارنه متقاربه لان امي خلفتنه بالسرة فوكة فوكة حته شنو يجيهة الولد  بس هية دائماً تكول كل وحدة بيجن عدي الهوة الي اشمة