يوميات زوجة عراقية️️

انا واخي (٣)

موقف رقم ( 3 )

ورة فترة من الزمان خابرني اخوية الجبير وبعد التحية والسلام طلب مني احضر خطوبة ابنه الثاني حمودي

اني بذاك الوقت جنت حامل بالاشهر الاولى والنساة عندي متعبه واصلا وضعي متعب فكتله يعذرني ما اكدر احضر

عاد هوة نقهر وكلي اني اريدج تحضرين حته تشوفين العروس وتنطيني رأيج بيهة مو مثل خطوبه علاوي وتالي البنيه طلعت مخبلة اريد وكفتكم وياي

الصراحة امي هم اتصلت وكلتلي اخوج زعلان ويكول نكتت بيه شون اعرف اني البنيه تفيدنه لو لا اني بعد ما امن بزوجتي لان متعرف تختار

عاد اني اتفقت وياهم يجون علية وياخذوني نروح للخطبة وفعلاً مرولي ورحت وياهم وحته جويسم رجلي هم راح ويانه
وصلنه البيت العروسة فكاعدين احنه النسوان وحد والرياجيل وحد وجان تدخل علينه العروس

اباوع البنيه اية من الجمال طول جسم شكل شعر اناقه ترتيب
اني كلش عجبتني والابتسامة متفارك وجهة صراحة حسدت اخوية على هيج عروس 👰

البنية دخلت سلمت عالكل وصلت يمي جان تسلم علية وكالت ( اني اكعد يم الحامل حته اخذ من بختهة ) اني فكيت حلكي اعتبرته شوي جراة من عدهة المفروض تكون اكثر خجل سؤال وجواب عرفتني اني عمة العريس وعرفت منهة طالبه كليه قانون مرحلة ثالثه كتلهة ترة حتزوجين احتمال ميخليج تكملين كال اعرف وميهمني اكمل

وبعد تفحيص وتمحيص وسؤال وجواب شفت عد البنية جرأة غير مسبوقة عد بعض العرايس

قرو فاتحة وعقدولهم مهر سيد والبنيه طايرة من الفرح تكول عبالك ماخذته عن حب هم كلت مابيه شي فرحانة ومن حقهة

ورة ما طلعنه من اهل العروس اخوية سألني شنو رايج ونطيني نظرتج

كتله البنية عجبتني جميله جداً متكلمة انيقه بس اكو شغلة شوي انتبهو عليهة كال شنو كتله البنيه جداً جريئة وابنك فقير خاف ميكدر على جرأتهة كلي الايام تبين

ورة يومين من الخطوبه اخوية خابرني كلي تعاي حليلياها شسوي
كتله خير يا ستار شكو كلي مشكلة ومداعرف شسوي  وحجالي

العريس حمودي متصل بخطيبه العروسة واثناء الكلام الي بيناتهم كايللهة اني الصراحة ماريدج تكملين كلية

جاوبته وليش يابه متقبل كايللهة احنه تفقنه من البدايه اول ما اجتي امي خطبتج

رجع  كايللهة وياريت يكون عندي علم اذا تردين طلعين الاي مكان كايلتله وليش يابه كايل الهة اني زوجج حالياًومن حقي اعرف تفاصيل حياتج البنيه ( معفطتلة )👈😧😧

حمودي مثل الي ما مصدك روحة كلهة مافهمت عليج شنو هاذة الصوت كايلتله اذا ماسمعت فاسمع وراجعة مرة ثانيه
  معفطتلة👈😧😧 هوة هناا محاجي وياها كلشي ساد التلفون ومخابر ابوووو

ياببه هااا يابه خير يكله يابه تعفطلي منو معفطلك كايله خطيبتي كول غيرهة يمعود كله هاذة الصار
وهسة شنو كلة ما اريدهة يمعود عدل بدل كله ابد اول كلمتين تعفطلي باجر تجلقلي
وبعد مداولات ومحاورات اخوية اتصل بابو البنيه وشارحلة الموقف ولي سوته بتهم الرجال كايله جذب بتي مربايه ومسويهة اخوية حالف للرجال الموقف الي صاير وماخذ ابنه ورايح الهم ومتواجهين والبنية ناكرة

عاد اخوية كايل الابوهة اعذرنه يابه ماكو قسمة والولد يريد يفسخ ابو البنيه كايله ماكو مشكلة بس تدفع غايب البنية وتوكلو 😱😱

ليش يابه احنه مجرد قراية فاتحة وحته لا كاعد وياها ولا طالع هنة كلهن يومين

كايله نخطبت كدام الناس والعمام وتردون بدون سبب تعوفوهة عمي شون ماكو سبب بتك تعفطله والرجال مصر بتي مسويهة وذا متدفع مهرهة احنة وياكم كوامة

ورة مداولات وروحة وجية وناس خيرة مدخله اله فضوهة مليونين يطوهم ويطلكوهة سيد

خابرني اخوية بليل دبريلي مليونين حالياً ماعندي ارجعهن الج ورة فترة يابه شسوي بيهن كال ادفعهن فصل بدل فسخ الخطوبه تحجي صدك انته وين تلكة هاي العالم ترة ماصايرة بس انته تدفع فصول علمود نسوان كلي هاذة الي صار
نطيته المليونين واخذ سيد ويا وراح طلك البنيه ودفعلهم

وهاي ثاني زواجة يتقفص بيهة اخوية 👈🤑🤑