بمناسبه عيد المعلم
احب اقدم التهاني بعيدهم الي خلصنه عمرنه وحنه طلاب نحتفل بي
بس بعيد الطالب عمرهم ما حتفلو بينه وخلونه نتنفس يالله زمن وراح 🙄🙄 المهم ما علينه
اتذكرت موقف بذاك الزمان جنت صف سادس ابتدائي وجانت عدنه مدرسه الانكليزي الله يذكرهة بالخير ست هدى
وبيوم ست هدى قررت تنطي دروس تقويه قبل الدوام بساعه
احنه جانت مدرستنه مختلطه بنات او ولد وتخيلو
فجنت كل ما اطلع قبل موعد الدوام بساعه اهلي يستغربون وعندي اخويه اكبر مني يعني الند والخصم الي حاط باله ويايه
كل ما اطلع من وكت الدروس التقويه امي ترزلني وتكلي شعدج طالعه من وكت الدوام ساعه 12 ونتي رايحة ساعه 11 واخويه يحرض بيهة عليه عجزت واني افهمهم عدنه درس تقويه اخويه يكلهة جذابه ماكو هيج شي وامي ترزل بيه
اخر شي ما كمت اروح
درس درسين المعلمه انتبهت طالبه نقص ومسجله حضور واسمي ماكو
لما خلص درس التقويه ودخلنه للصفوف وجان اول درس انكلش
وجان اصيح باسمي المعلمه (..... ) تعالي اوكفي هنا
اني كمت والصف كله يباوع عليه والولد مشمته بيه والبنات صافنات وجان تلزمني من عكسي الزمه الحقيرة الي اكيد كل طالب او طالبه يذكرهة من معلماتنه قبل ومن طرف اظافيرهة جرتني وكالت ( ليش متحضرين دروس التقويه )
شجاوبهة هاا شجاوبهة
كررت السؤال اخر شي حجيت ست اهلي ميقبلون وميصدكون اكو دروس تقويه
وجان تنزل الصاعقه على راسي وكدام الصف كله كالت
( انطيني رقم تلفونكم واني اتصل باهلج وافهمهم )
😱😱😱😱 تخيلو رقم تلفون اهلي الارضي والصف مختلط ولد او بنات
اول شي صار الولد حضرو الاقلام وكل تركيزهم يمي وبالارقام الي راح اردهة للمعلمه
البنات شي يضحك وشي نقهر وشي يسوي حركات بحلكة عود لاتردين الرقم
زين اذا اكول معدنه تلفون ارضي فهاي اسخف جذبه بالتاريخ لان كل بيت عراقي بي تلفون ارضي
وهية موكفتني كدام الصف وتكرر ( رديلي الرقم رديلي الرقم ) ولازمه القلم وسجل الحضور
زين بالاقله التفتي على باقي الصف الي لازمين اقلام وياج ومنتضرين مثلج الرقم
وبمحاولة يائسه مني رديت الرقم بصوت منخفض حته لا احد غيرهة يسمعه
بس الكارثه انو حته هية ماسمعتني وتكول علي صوتج
والله والله الموقف ذاك اليوم يمكن لو غيري وحدة جان بجت من الورطه الي جانت بيه
واخيراً رديتله الرقم واني منزله راسي حته لا اشوف عدد الي سجلو الرقم وراح اكيد يتصلون وراح اتورط ورطه بس الله يعلم بيه ههههههه زين هية شكالت الروحة مافكرت ما خلت اباله
المهم ما خلص الدوام اله خلصانه روحي واول شي سويته من وصلت للبيت شلعت الفيشه مال التلفون ههههههههههه شسوي حته لا واحد من الطلاب يتصل ويحرجني ويسويلي مشكلة
وكل ما واحد يريد يتصل يلكا الفيشه مشلوعه يظل يحجي ميدرون اني شالعته
وبقيت ايام على هالوضع الرعب كاتلني والخوف من اهلي ومن الاتصال
والطامة الكبرى المعلمه بعد لا سالتني ليش مدتجين الدرس التقويه ولا خابرت على اهلي وفهمتهم وظليت ماكلة المقلب
الله يذكرج بالخير ست هدى على هاي الدكة 😩😩
أنت تقرأ
يوميات زوجة عراقية️️
Humorمواقف طريفة منقولة لكم بقلم زوجة عراقية️️ وتقول لكم (( حياتنة سر كبير نحتفظ به خلف جدران منازلنا حبيت تشاركوني مواقف من حياتي بيهة حزينه بيهة مضحكة بيهة نطلب النصح لا تخلو المواقف من الفكاهة ولا يعني الشجار عدم وجود الحب العكس هو الصحيح الحب جمع...
