هاي قبل الحضر جويسم جابلي خمس كيلوات برتقال كلي عصريهن اني همات عصرتهن صدك ويصير مرررر لأن الحبة مردت وياااا فسالت الحبايب شسويله حرامات اذبه
نصحوني اضيفله حمضيات وهوة يستعدل
عاد اني شلون حبابه وأبداً ما احب أفرط بنعمة الله
بما انو عصير البرتقال 🍹 صار كلش مررررررر وأخذت بنصيحة اخواتي بكافي نسائي وقررت ما ذبه بل اجرب اضيفله حوامض وبعض الفواكه وسوي كوكتيل وشوف النتيجة لان حرامات خمس كيلوات برتقال عصير اذبه
اخذت نسيبي ورحت العلوة جميله شوفن شسويت
جبت صندوكين رمان
جبت صندوكين برتقال🍊
جبت ثلاث كيلوات جزر🥕
جبت ثلاث كيلوات نارنج
جبت ثلاث كيلوات ليمون🍋
جبت ثلاث كيلوات تفاح🍎
جبت صندوك فراوله
ورجعت للبيت لمن نزلنة المواد الزلمة صفن كلي شني هاي كتله اسوي عصير كلي افتهم عصير بس شني هاي كتله فواكه كال افتهمت فواكه وفتهمت تسوين عصير شني هاي كتله غير اكاسر البرتقال المررر صفن كلي انتي عاقله طلعت ساعتين للشغل ارجع الكاج ناكله العلوة وجايه حته تكاسرين خمس كيلوات برتقال بصناديك فواكه كتله غير علمودكم اشربكم عصاير طبيعيه وقوي جسمكم حته تصير عدكم مناعه من كورونا صفن هنوب نسيبي خطيه ظل يصفن عباله راح يحجي علي كله عمو ربك حميد رادت لالنكي وما لكينه عراقي جان هم جابت صندوكين هههههههههههههههه لاصه عليه كتله جويسم يا عيني هسة متكلي شبيك غير علمودكم اني شستفاد قابل اشو راح اتعب وكشر وعصر وعبي غير علمودكم كلي اني جم مرة كايلج لا طلعين انتي خطرة كتله غير خابرت وكلتلك راح اطلع وي نسيبك كلي ما كلتي حتنكلين العلوة
المهممممم بعد جدال طووووووووووويل خبطت العصاير وي شربت البرتقال المرررر وطلع فد شي يعني من تصير عدكم هيج حاله مثلي البرتقال يمرمر عصروله نارنج وليمون وتفاح وجزر وفراوله ورمان وراح يطلع كوكتيل رهيب وكل مرورة مابي هااا وخليت قليل شكر والحمد لله ماذبيت عصير البرتقال بس ذبيت 50 الف مسواك من علوة جميله وجويسم معاند ما يقبل يطيني ويشاركني ههههههههههه يالله المهم جربت وطلعت النتيجة فد شي ومن البارحة لليوم اكشر وفرط وعصر ظهري نكسر وجويسم كل شوي بالله اضوك بالله اضوك
واني ساكتة غصبا عليه لان ماذبيت عصير البرتقال بس ذبيت فليساتي هههههههههه ودمتم سالمين
أنت تقرأ
يوميات زوجة عراقية️️
Humorمواقف طريفة منقولة لكم بقلم زوجة عراقية️️ وتقول لكم (( حياتنة سر كبير نحتفظ به خلف جدران منازلنا حبيت تشاركوني مواقف من حياتي بيهة حزينه بيهة مضحكة بيهة نطلب النصح لا تخلو المواقف من الفكاهة ولا يعني الشجار عدم وجود الحب العكس هو الصحيح الحب جمع...
