اليوم سألتة شأسوي للفطور كلي اجيبلج فلافل گليه عاجبني كتله احنة صيام فلافل وحدة تأذينه كال شتردين لعد كتله تمام جيبلي فلافل وگلي كبه عريضه وبتيته وشوربه تصير خوش سفرة نعمة من الله خوش خوش
سكت شويه رجع كلي اجيبلج نص كيلو لحم مثروم كتله كيفك اسويه كفته ويه صينية تبسي
سكت رجع كلي اجيبلج دجاجة كتله خوش حته اشويه وياه هم اسوي شوربه
سكت رجع كلي زين اجيبلج صدر دجاج كتله خوش حته اسويه فطيرة تركية فد ثنين مدام حبو وسوي حمص بطحينة
سكت رجع كلي انتي ليش استغلاليه
ليش يابة 🤔🤔
دشوفين الوضع واني كاعد شغل ماكو متعرفين تقتصدين😥
😥 كتلة ترة اانته دا تخيرني واني داخيركم بالاكلات وشنو تردون اني اسويلكم
رجع كلي بس فلافل لازم نلزم ايدنة لحد ما ارجع للشغل كتله براحتك
سكت رجع كلي هسة حروح للسوك شتردين اجيبلج كتله كلشي عندي ماريد شي كافي الفلافل اگليه ويه العندي نعمة
كال اجيبلج دجاج كتله لا كال اجيبلج لحم كتله لا غير يوم كال زين مو ردتي صدر دجاج كتله ميحتاج غير وكت
سكت رجع كال حجيبلج عدس مو كلتي خلص كتله هااااااا تدري شريد من السوك كال كولي
كتله فدوة اريد بصل ماعندي يوووووووومة
غير طلعت معندي رحمة غير طلعت هاجمة بيته غير طلعت ماقدر وضعه غير طلعت اني مافكر بالازمة هم سكتت
كلي شو سكتي كتله اهو ردت تجيب دجاج كاملة وردت تجيب لحم وردت تجيب صدر دجاج
ومن كتلك بصل سويتني ارهابيه ملازم ماريد شي بس ترة بصل ماعندي وكل الاكل والشغلات ترة مترهم بله بصل
تالي راح للسوك جاب دجاجة ذبح كاملة وجابلي نص كيلو لحم مثروم وجابلي صدر دجاج وجابلي عجينه الفلافل وجابلي عدس وجابلي باكلة دخل طبعاً محجيت لان اعرف شلون راح تفتر عليه فشلت المسواك عزلته
وصلت يم جيس البصل عفته بالكاع كلي شو مشلتي البصل
كتله هاذ الجيس بي هجمان بيتك واني ماريد اهجم بيتك فشيل الهجمان وحدك حته ما ذبه براسي 🤣🤣🤣🤣🤣🤣🤣🤣🤣🤣🤣🤣🤣🤣🤣🤣🤣🤣🤣🤣🤣🤣
حرشة يا مو حرشة
همزين باجر يطلع للشغل حته نفسيته ترتاح وحنة همات
أنت تقرأ
يوميات زوجة عراقية️️
Humorمواقف طريفة منقولة لكم بقلم زوجة عراقية️️ وتقول لكم (( حياتنة سر كبير نحتفظ به خلف جدران منازلنا حبيت تشاركوني مواقف من حياتي بيهة حزينه بيهة مضحكة بيهة نطلب النصح لا تخلو المواقف من الفكاهة ولا يعني الشجار عدم وجود الحب العكس هو الصحيح الحب جمع...
