Chapter 100. မင်းက ဘာဆိုလိုတာလဲ
ရှီခွန်း သီးသွားသည်။ သူဂရုစိုက်နေတာတောင် ဇူအန်ထောင်ချောက်ထဲ ကျသွားသေးသည်။
ချူချူယန်ကို ရှာမတွေ့နိုင်ဘူးဟု ပြောလျှင် အသုံးမကျကြောင်း ဝန်ခံသလို ဖြစ်သွားမည်။ ရှာတွေ့သည်ဟု ဝန်ခံလိုက်ပါက မတော်တဆတွေ့ဆုံသည့်ပုံစံ တမင်အကွက်ချထားကြောင်း ပြောသလို ဖြစ်သွားပေလိမ့်မည်။ ဘယ်အရာမှ သူ့အတွက် မကောင်းပေ။
နောက်ဆုံး တစ်စုံတစ်ယောက်က သူ့အရှက်ကို ကာကွယ်ရန် ရှေ့တက်လေသည် ။ ယွမ်ဝမ်ဒုံက
"ဇူအန် မင်းလမ်းပေါ်မှာ ဖြုန်းခဲ့တဲ့အချိန်တွေက မင်းကို သူများတွေကို စကားထောင်ချောက်ဆင်ရအောင် သင်ပေးလိုက်သလိုပဲ။ ရှီသခင်လေးက ဘယ်သူလို့ ထင်လို့လဲ။ သူ့လို လူကြီးလူကောင်းက သူများနဲ့ မငြင်းတတ်တော့ မင်းနဲ့ စကားနိုင်မလုနိုင်တာ အသေအချာပဲ။ ဘယ်လိုဖြစ်ဖြစ် ရှီသခင်လေးက အသုံးမကျတာ ဖြစ်နိုင်လို့လား။
ဒီမှာ ရှီသခင်လေး အရည်အချင်းကို မကြားဖူးတဲ့လူမရှိဘူး။ သူက ကျင့်ကြံမှုမှာ ပါရမီပါပြီး ငယ်ငယ်ရွယ်ရွယ်နဲ့ အဆင့် ၆ ရောက်ခါနီးပြီလို့တောင် ပြောကြတယ်။ မင်းက ဘာကောင်းလို့လဲ။ မိန်းမထဘီနား ခိုစားတာလား။ လမ်းဘေးက အကျင့်ကောင်းတွေလား"
ရှီခွန်းနောက်လိုက်များ အော်ရယ်လိုက်ကြသည်။ သူတို့က ဒီအခွင့်အရေးကို အသုံးချ၍ ရှီခွန်းဒေါသ ကို ဖြေပေးနေကြခြင်းသာ။
ဇူအန် ခေါင်းစောင်း၍ ယွမ်ဝမ်ဒုံကို အကဲခတ်လိုက်သည်။ ထို့နောက် မေးလေသည်။
"မင်း အရိုးတော်တော်ကြိုက်ရမယ် ဟုတ်လား"
ယွမ်ဝမ်ဒုံက ဇူအန်ကို ဒေါသပုန်ထ၍ ပွက်လောရိုက်ရန် မျှော်လင့်ထားသော်လည်း သူ့ကို မေးခွန်းပြန်မေးသောကြောင့် ကြောင်အသွားပြီး အလိုလို ပြန်ဖြေလိုက်မိသည်။
"ဟင်..ဟင့်အင်း မကြိုက်ဘူး"
သူ့လို ချမ်းသာသောအိမ်တော်က သခင်လေးက စားသောက်ဖွယ်ရာ ပေါများပေသည်။ အရိုးကိုက်ရခြင်းကို ကြိုက်ရန် အကြောင်းမရှိပေ။
"အဲ့လိုမှမဟုတ်ရင် ရှီခွန်းရှေ့မှာ အရိုးအရင်းလေး ပစ်ပေးအောင် အမြှီးနှံ့ပြနေရတာလဲ" ဇူအန် အထင်သေးစွာ ပြန်ပြောသည်။
"ငါတို့အရင်တစ်ခါတွေ့တုန်းက ဘက်မတူပေမဲ့ မင်းရဲ့ သတ္တိက အထင်ကြီးစရာကောင်းသေးတယ်။ မင်းရဲ့ မာနနဲ့ သိက္ခာတွေ ဘယ်ရောက်သွားတာလဲ။ ငါတောင် မင်းအစား အရှက်ရလာပြီ"
VOCÊ ESTÁ LENDO
ကီးဘုတ်အင်မော်တယ်-ဇူအန် (Zawgyi + Unicode)
Açãoအင်မော်တယ် ဇူအန် (မိတ်ဆက်) Keyboard Immortal ဘာသာပြန် Action Sharp မိုးကြိုးပစ်ခံရကာ ဘဝပြောင်းသွားသော ဇူအန်...။ လပြည့်မြို့တော်၏ လူ့အန္ဓ တစ်ယောက်အဖြစ် နိုးထလာသည်။ သို့သော် စိုင်ကော်၍ ခြုံပေါ်ရောက်ဆိုသလို ချူးကလန်မှ ထိပ်တန်းပါရမီရှင်အလှပဂေးသမီးပျိုလေ...
