ولادة من رحم الفساد

الجزء 104

قبل مايشوفو جدو دور وجهو لهيه تا مسح عينيه الي ماحسش امتى نزلو دوك الدميعات الي خانوه...بقى كيشوف فالفدان(الارض) خدامين فيها الفلاحة على قدم وساق بحكم وقيتة الزيتون والزيت ولان المحجوب داير مساحة مهمة لشجيرات الزيتون ف ولابد ما يوقف على هادشي وخا مابقاتش صحتو كيف كانت من بعد المرضة الاخيرة....هو كيهضر وعصام كيشوف حتى حس بعينيه رجعو عاديين وقبل مايدور نطق المحجوب...المحجوب : لا تخبيشاااي ضعفك اعصام...ماشي عيب توجع وتصيح...وخا تگول انا راجل الراجل بفعالو وبصبرو وليني لا فات الصبر لهيه را تولي فوق طاگة(طاقة) والانسان مهما كان راجل ولا مراة را بني ادم عبد ضعيف..من غير هادشي راك كتسابق مع الله سبحانه وهادشي را معصية...لا نزلو دموعك ماتگولش خانوك گول بغاو ينفسو عليك...راهم وفيين ليك مابغاوكش تفوت على صحتك...سبقوك عالله وعسى تفهم راسك وتقول هنا وبراكة من النفخة والنفس الحارة الي فايتة الحد حتى رجعت على مولاها بالغبن والمرض...مكاين الي يحس بيك من غير راسك وماكاين الي يتمرمد من غير صحتك...عصام"ضار شاف فيه بصدمة..امتى شافو بكى" ..المحجوب : ماتشوف فيا ديك الشوفة...ايه هضرت معاك وشفت الدمعات الي خرجو را گلت ليك كثرتي من السهو بزاااف..وهادشي ماشي فصالحك وسمع مني هاد المرة راك مكرفص اعصام وفتي التكرفيص لهيه...عصام"مالقى مايقول فعلا تهد ليه حيلو بكثرة التفكير فالماضي " : مالخاطريش ابا...كثر عليا التفكير فالي فات...المحجوب : القديم ولا جديد...عصام"هز راسو كيشوف فنقطة بعيدة ونطق من بعد تنهيدة خرجات انفاس سخونة من فوهة براكين منفاجرة فيه لداخل." : الجديد نوض عليا القديم...المحجوب : الجديد هو الي خلاك تنسى القديم...عوض عليك وعمر عليك...نهار كان الشمل مجموع ومكان خاصكم خير..علاش ؟ حيث كنتي غا مشرع عليهم جناحك وماعطيتيهمش فين يطلو عليك من تحت ريشك...فهم المعنى الي غانعطيك ولا نشرح ليك بلا عقدة..."حرك ليه راسو" كنتي تشوف اش خاصهم ربيتيهم على مانخصصكم من والو تاكلو تشربو تقراو تكساو...ربيتيهم على النقص الي شفتي وعشتي سوى من الاخوة سوا من الواليدين...عينيك تعماو على شنو نتا خاصك معاهم..تعماو بسباب القديم بكثرة ما فكرتي فيه ولا سمن حايل نوض الخز فيك...حل عينيك وشوف بغيتي !؟عصام : مابغيت منهم والو بغيت غا يكونو مرتاحين ماتخصهم تاحاجة...المحجوب : وسمعتي منهم !؟ سولتيهم ؟!عصام : مايحتاجش نسول...المحجوب : ها العقدة بانت"دور عصام وجهو كيشوف فيه باستفسار"عاود هضرتك ديال دابا وشوف العقدة فين كاينة وحل عقلك معايا...نحلو المشكيل...عصام"حرك ليه راسو وعاود هضرتو" : مايحتاجش نسول ؟؟...المحجوب : شفتي هاد مايحتاجش وبلا ولا هي اش ؟ هي راك مسيرهم وماعاطيهمش فين يهضرو يگولو اش بغاو اش ضرهم..عاطيهم كلشي ومحيد ليهم كلشي...دايرين بحسابك حاميهم من الدنيا وماحاميهمش من راسك والجهد الي فيك...ميتين عليك وهاربين منك...ماكنتيش معاهم ب مسالة خوذ وعطي وكيف كيگولو الاخذ والرد...وباش نجيك نيشان ماعمرك تحاورتي معاهم... هذا علاش قلة الحوار الى ماگلنا منعادمة عندك... لو كنتي تسمع وتسول كانو يعاودو ليك...لو كنتي تگول اش ضارك واش الي ماتبغيش بلاصة ما كلمة جوج تنوض تسوط فعباد الله ولا ضارب ولا ضرب...ماكنتي توصل لهادشي وماكان بنادم يغلط فيك...ماعمرك تحاورتي مع راسك نتا براسك..اش تعلمتي من القديم ؟...عصام"الصمت"المحجوب : تعلمتي من القديم تعمر النقص الي كان وماتعلمتيش تعمر النقص الكبير اولدي وهو سباب المشاكيل القديمة والي منها انا نيت تگدمت وكنت السباب تا وصلات مك لدوك المواصل مع بوك ومعاكم تا وصلتي لهنا...عصام : القهرة التكرفيص الضر..ب..الجوع...المحجوب : هادشي لو كان فراسي ديك الوقت ؟ واهليييي كون طلگتها من بوك...مك المشكيل الي فيها خرج فيك نتا..نتا ماديتي من بوك والو ديتي من مك وطبعها...وطبعها هو الي وصلها لهادشي...ووصلك تانتا...عصام"عقد غوباتشو تا بانو العروق فنواضرو": ماعندي مانشبه فيها...المحجوب : شبهتييي والي عطا الله عطاه"ضار عصام مخنزر ماحمللللش يقولييييييه كاشتبه لمك..." بلا ماتشوف فيا ديك الشوفة...هاحنا داوييين عليه...جيتي تشكي گلتي ضاقت بيك الدنيا...لا تخليهاش ضيق بيك وسمع مني وحل العقدة الي گلت ليك...العقدة اولدي هي الي ف مك وفيك ...كاتسكتو على ما يصيبكم وتسكتو على المضرة الي فيكم...كون زدتي شوي دير مادارت مك...عصام : جيت نشكي عليك ضيقي ابا...المحجوب : ضيقك نفكوه...سمع وفهم...وسول وتحاور بدا بالصعيب...انا گلت ليك المعقول على ماداز عليا مانبغيهش يتعاود معاك...عطيتك القاصح...والقاصح حسن من كذاب....