الحرام المباح(الداريجة المغربية)

Part 21

رانيا:(بلعات الدغمة )وقيلة حيت نعست على ديك جيهة طبعات وولات حمرة
محسن:اه مهم داكشي لي جبتلك لكانت شي حاجة مصالحالكش عطيهالي ردها ونبدلها بشي حاجة قبل ماتحل
رانيا:لا كلشي هو هذاك
(كملو غداهم وناضت رانيا وسعادة يوجدو باش يخرجو ...لبسات تريكو فالموف مع جينز فالكحل وطلقات شعرها على راحتو ...جددات كريم الشمس والعكار ... عاد مشات جبدات ليبوط طوال قراب من الركبة خرجاتهم وحطاتهم حدا الباب ...شافت مها خارجة لابسة جلابة فالزرق ومشات وقفات حدا المراية لي فالصالون كتعاوط شالها ...غاعاوطاتو خرجات لبسات بلغتها ورانيا البوط فرجلها وخرجو بجوج شدو تاكسي خداهم للسوق دالمدينة ...غاوصلو بداو يدورو بين المحال ويشوفو الاتمنة ولي عجباتهم ياخدوها ...خداو قفطان فاللون الاخضر للعروس وعباية فالاسود ...وكسوة دالخروج مستورة فالغوز وكل حاجة مع شالها وبلغتها ...والتمر بالكركاع وأكاجو فالصينية مشكلة ...والقرآن فغشاه والصينيات فين غايستفو هداكشي ...والعطور وشوية دالماكياج دوبييس جوج شراو وصباط بالطالون ...وجوج قوالب دالسكار وبوكي دالورد ...مسالاو تاكان المغرب غايوذن ...هز الحمال معاهم هداكشي ووقفت سعادة التاكسي ومع كانت الصخرة بزاف عمرو داكشي لور وبقات غابلاصة لسعادة )
رانيا:غاسير انشوف نشد تاكسي وراك وتا انا ماشريت والو لراسي
سعادة:وردي البال
-ركبات وزاد بيها التاكسي الصغير مع هو لي تشد لهم خداتو كورصا...بدات تتمشا فالسوق وتشوف شي حاجة تعجبها بالفلوس لي عطاها خوها وتا لي جامعة ...حدها خدات واحد الباغفان عجبها وواحد الصاك تاهوا ...بدات غادا فالسوق ومرة مرة تشوف وراها كيبان لها واحد تابعها من لهيه ومبغاش يحيد منها ...وخا تبقا فالمحل معطلة والو كيوقف ويساينها...كان من هيئتو تخاف منو...شمكار حوايجو مقطعين ..وهاز واحد المحفظة موسخة فيها داكشي لي لاقطو من زبل ...عيات تزرب فمشيتها والو تابعها شافتو مغايبعدش منها تا يسرقها ولا يخصرلها وجهها وبان لها واحد غادي لطوموبيلتو وهي تمشي بالخف ووقفات عليه وشدات ليه فمرفق يدو موقفاه ...شاف فيها باستغراب وقبل ماينطق شاف فعينها بعيونو السود لي كانت كتعملو بيهم إشارة لشمكار لي وقف كيتسناها مرة تشوف وسط عيونو مرة تشوف جيهت الشمكار ...وتكلمات بشوية:"غاتايمشي راه تابعني من قبيلة ومبغاش يتفك مني "
-شاف فيها وشاف فالشمكار ومد يدو لطوموبيلة حل بابها القدامي وقال :طلع نوصلك لداركم
-مكانش عندها خيار من غير هذا ...إما ترفض ويصدق الشمكار سارقها ولا مخصر لها وجهها إما توافق وتطلع مع شخص معارفاهش ...لكن من ملامحو ومن لباسو مباينش فيه شي حد خايب...باين شي حد لي بعقلو ومرزن ...طلعات وشد الباب وراها ودار وطلع تاهوا ...خشا سوارت فطوموبيل وديمارا وزاد ...هضر بلا حتى مايشوف فيها مركز عينيه على الطريق
-{عطيني العنوان}
رانيا:معليش منعذبكش حطني غابعيد شوية على ديك البلاصة
-عطيني العنوان...هنا خاوي وتاكسي صعيب يتشدلك فهاد الوقت ومنقدش نحطك فهاد البلايص ...نصدق هربتك من واحد طايحي فأخرين ...غانحطك بعيد على دربكم فمتخافش
-عطاتو رانيا العنوان وتا هو مزادش هضر بقا سايق وساكت والشوفة مكيشوفهاش فيها غا وصل قريب من الدار وقبل مايدخل لدربهم وقف
رانيا:(شافت فيه وبتاسمات بلطف)شكرا حيت وصلتيني بزاف الله يجازيك بالخير
-هانيا ...نزل غانوصلك لداركم أنا غانبقا وراك فحالي مامعاكش
رانيا:لا منزيدش نعذبك معايا شكرا بزاف عمرني ننسالك خيرك
-مردش عليها ونزلات وبدات ماشا تاسمعات باب طوموبيلتو تحلات...دارت تشوف لقاتو نزل وشدها وتم تابعها كيف قالها...عمل لي فراسو بلا ميبقا يتجاوب معاها ...غادي وكيشوف فجناب الطريق ومكيشوفش فجيهتها تادخلها شك واش هي خايبة...تمشات بالخف باش متزيدش تعطلو وهو بقا وراها كيمشي بشوية وحاضيلها سواريها تاوصلات للدار شافها كتحل الباب وقف تاشافها دخلات وشداتو عاد رجع لطوموبيلتو وركب وكسيرا وزاد ...خلا رانيا غارقة فتفكيرها ...مقالهاش تا اسمو داز كيف النسمة ...وتا الشوفة حدو فاش كانت كتوريه فين الشمكار من تم مزاد شاف فيها ...طلعات من الدروج كتخمم فيه وفشخصيتو وتقول شنو يكون كيخدم زعمة تاقاطع تفكيرها الميساج لي وصلها فتيليفون...جبداتو لقاتو من عند أنوار مسيفطلها تصويرة دالورد حمر
يتبع