الحرام المباح(الداريجة المغربية)

64

بعدما دوش وريح عضامو تحت الماء السخون خرج من الدوش ومشا فتح الماريو وهو يتصدم... لي هز فيدو اما يلقاها متقوبة اما يلقاها مقطعة فنص ولا مقطعة بطول ولا بالعرض ...عيا يقلب فحوايجو كلشي مقطع ...تنهد ووقف مشا فتح الباب وشاف يمين شمال مالقا حد رجع خرج وشد الباب بالمفتاح وتمشى بالخف لبيت جمال غا بالفوطا ومن الفوق عاري... دق فالباب مارد حد عرف مكاين حد تم ...دخل فتح الماريو وجبد من حوايج جمال لبس عليه تم عاد رجع لبيتو ...فتح الباب ودخل رجع شدها بالمفتاح ودخل تخشا بلاصتو لاهوا هضرها لا هي هضراتو بجوجهم نعسو مفارقين على بعضهم وبجوجهم واخدين موقف من بعضهم ...جا صباح جديد بدات تفيق رانيا على أشعة الشمس لي تسللات من السرجم وبدات تداعب فعيونها المغمضين ...فتحاتهم وناضت تجلسات وهي تلقا حداها الصينية دالفطور ...جوج طباسل دالبيض مقلي وجوج كيسان دالقهوة وزلافة دزيتون حار مخلط وطبسيل دزيت العود فيه جوج لافاشكيري ...عقدات حواجبها وهي كتقول شكون ليجابهم تاسمعات الباب تحل ودخل منو زكرياء مغطي وجهو بالبوكي دالورد حمر ... قرب لعندها كتر وحطولها وسط يدها ومشا جلس حداهازكرياء:نوض غسل وجهك ويلاه نفطرو بجوجنا هنارانيا:واش انت بعقلك ولالا غا البارح فكيتيلي يدي وكنتي غاضربني ونتفتيني وغوتي عليا وقطعتيلي حوايجي وسبيتيلي با وقلتي عليا مدلولة ومخليتي مقلتي ودبا جاي كتقولي نفطر معاك؟ البعابع لافطرتوقفات ومشات للحمام غسلات وجهها وقضات روتينها الصباحي عاد خرجات وتوجهات لجيهت الباب لقاتو شادها بالمفتاح ...رجعات دارت وشافت فيه مغنزرةرانيا:واش مغاتحلش هاد الباب راه تشد الباب نقز من السرجم المهم هو نمشي فحاليزكرياء:(عاود هز البوكي دالورد وقرب لعندها)رانيا وصاف مسحها فيا هاد المرة راه والله ماحسيت براسي تابديت كنقطع فحوايجك وزدتي عصبتيني هي فاش عليتي صوتك عليا وصاف الله يرضي عليك حنا عاد مزوجين بلا منتفارقو من اللول ونبرزطو والدينا معانا وصاف هاك الورد وشفتي اليوم مغانخلي فين ناخدك غايلاه (زاد قرب لعندها وجرها لعندو بزز وحضنها)وصاف سمحلي راه والله حتى كنغار وعاد من اللول صارحتك بلي انا مريض بالاعصاب ونتي واعدتيني غاتوقف معايا (مدلها الورد)شدي ارانيا وصفي قلبك من جيهتي راه كنبغيك الحمقة دياليرانيا:(شدات من عندو الورد وقبل حتى مايضحك لقاها رماتو فالارض وعفطات عليه برجلها)الهضرة بيناتنا سالات غاتردني لدار با لي قلتي عليه شماتة وهو مشفتي من عندو غا الخير ومغانرجع غا بالعرس وباعتذار رسمي لبا وياإما غاتديني لعندهم برجلك ولا غانقز من هاد السرجم وغانمشي سالينا الهضرة ...غاتمشي لعند با وغاتعتاذر وغاتعطيه وعد عمرك تسبوزكرياء:ولكن راك نتي لولة لي سبيتي الواليد واش نسيتي؟ راه لكل فعل رد فعل راه تانتي سبيتي وداك ساعة انا جعرت كتر وصاف لاعاودتها داك الساعةرانيا:(قاطعاتو )مكاين لاساعة لا ثانية لا دقيقة دبا غانلبس عليا وغاتوصلني وسالينا الهضرة وشوف داك الساعة واش نسمحلك ولالا وشوف تشوف واش نرجع معاك وبالعرس من الفوق ولالا وكاع الحوايج لي شريتيلي سير صدقهم مغاندي معايا والو من ديالك وغانتسلف من عند سمية الحوايج ونمشي بيهم ودبا فتح باب البيت نمشي لعندها
زكرياء:(كيحاول يبرد راسو وميتعصبش)شوف ماحدني مهدن خلينا نهضرو لداخل ونفطرو فحال الناسرانيا:(هضرات بالغوات)وانا مالي تهدن ولا تزمر غانتا بوحدك لي كتعصب فالكون ولا حنا ماعليناش الله نتعصبو ؟انا الا بابا تسبو منعقلش عليك سالينا الهضرة بغيت نمشي فحاليزكرياء:(غوت بجهد)واامغاتمشيش انا مغانخليكش(شدها من كتافها بجوج وحنا راسو لمستوى وجهها حتى تقابلو)انا كنبغيك ومغانخليك تبعد عليا حتى خطوة سمعتيرانيا:(قلبات وجهها جهة تانية وتجنبات تشوف فوجهو)وانا بغيت نمشي مغانجي تانعمل عرسيزكرياء:(اعتادل فوقفتو وهضر بصرامة)آخر كلمة عندك؟رانيا:آه اخر كلمةزكرياء:وحتى انا غانعمل لي فراسيقال جملتو وجبد مفاتح الباب غافتحها وبغات تخرج عطاها بدفعة وحدة جات مزدوحة فالارض ...خرج وشد الباب بالمفتاح ومشا لبيت جمال يلبس من حوايجو خلا رانيا كتدق فالباب وتفرعها ...غالبس نزل ومشا لخدمتو ...طلات من السرجم وشافتو خرج وشافت شحال بيتها بعيد على الارض عرفات راسها لانقزات يا غاتهرس يا غاتموت ...رجعات دخلات وهزات تيليفونها اتاصلات بسعادة غاجاوبتها بدات تعاودلها كلشي بهضرتهم بالحرف ليدها لي تفك ...سعادة:صاف كملتي كون كنتي حدايا كونتفتك يابنتي واش نتي حمقة تسبي لراجل باه وباغاه يسكتلكرانيا:وهو لي سب بابا اماما لولسعادة:وراه نتي لي لبستي المزير وخارجة بلا شوارو اما كون كاعما تعصب... وعبر عليك فاش قطعلك دوك الحوايج ياك من لول شرالك حوايج مستورين وكان باين مقصودو وسمع سمع تبت ابنتي تبت شوية راه الطيران فالزواج مكيخرج فين! جلس فدار راجلك شبغيتي الناس يقولو علينا داها معيوبة ردها من النهار لول ماعملوش حتى عرسهم ولا ؟شوف انا غانهضر مع باك نشوفو لاقدرنا نعملوهلك فشهر سبعة ونتي داك الصداق لي عطاك باه عاونا بيه نعملوه غابين العائلة وصافي وترزن شوية وسمع كلام راجلك راه هذاك راجلك ماشي خوك ابنتي يلاه سيري انا اليوم خدامة اه ومتنسايش تسيفطي العنوان نجي نعرضكم نتي وعائلتك شوفي نهار الاحد غانجيو غافالعشية نعرضوكم ونعطيكم كارط ددعوات ونمشيورانيا:وماما ولكن راهسعادة:شوف بلا تخربيق وتبرهيش ديالك كبر عقلك شوية وراك نتي لي بغيتي فلول تمشي معاه عليها انا قنعت باك بلامتجبدلي المشاكل معاه يلاه سير ومرة جايا فاش يطلب سماحة وافق راه هذا ماشي هو صاحبك هذا راجلكقطعات عليها وخلاتها جالسة حايرة ...هزات الخبز وبدات تاكل فالفطور لي جابلها غاكملاتو وقفات مشات كتجبد الحوايج لي قطعهملها من الماريو ومشات للحمام هزات بلاستيكة دزبل ورجعات لبرا عمراتهم فالبلاستيك فتحات السرجم ورماتهم مع الرمية مايجيو غافراس سي محمد لي كان خارج ...رجعات دخلات راسها مخبية وهو هز راسو كيشوف شكون رماه مبان ليه حد ...خلا البلاستيكة تم وركب فطوموبيلتو وتم سايق غاوصل للباب فتح ليه العساس الجديد وطلب منو يهز ديك البلاستيكة ويرميها ...خرج ومشا لخدمتو خلا رانيا كتولول على الفعلة لي عملات وتحمد الله حيت معرفهاش مولاتها