الحرام المباح(الداريجة المغربية)

63

دخل مشا جر كرسي وجلس فيه ...مع عرقان مبغاش يجلسلو فوق السداري ويوسخو ليه ...قرب لعندو سي هشام ومشا جلس مقابل معاه وكبلو كاس دآتاي وحطولو حداه ...هز طرف دالخبز دهنوليه بجبن ومدو ليه

سي هشام:كول اولدي كول ... باينة فيك مهموم

جمال:اودي ابا هشام والله معندو منين يدوزلي ...مراتي مشات عليا وبقيت غا انا بوحدي عيات تنصحني نبعد على الشراب ووالو مبعدتش ...كنت مدمن وباقي لدابا وعيني معميين تافتحاتهملي مها ...عيات صابرة فالاخير كاسها عمر وفاض وخوات عليا الدار ...حتى مشات عاد عرفت بقيمتها ودبا ناوي نقطع الشراب ولكن من النهار لول وجاني صعيب وحتى من النعاس مقدرتش ننعس

سي هشام:(ابتسم ليه ووقف جر الكرسي ديالو وجلس حداه،مد يدو وحطها على يدو ...رفع راسو جمال شاف فيه وابتسم ليه هشام)سمع اولدي كيقولك اول خطوة للعلاج هي تبغي تتعالج وحيت باغي تتعالج فراك غاتوصل لي فدماغك ...سير لطبيب غايعطيوك دوايات وغاتتعالج ان شاء الله ولكن قبل غانصحك بالصلاة لي غاتعاونك كتر وكتر كقوله تعالى:۞‏‏إِنَّ الصَّلَاةَ تَنْهَىٰ عَنِ الْفَحْشَاءِ وَالْمُنْكَرِ ۗ۞‏.صدق الله العظيم ...اول طريق لنجاتك من الحرام هو الصلاة وان شاء الله ربي غايوفقك وغاتتعالج ومرتك غاترجعلك ولمبغاتش انا نهضر معاها ... دبا حاول تاكل غاشوية ونوض دوش بالماء سخون وكبو فضهرك بقا كتكب على ضهرك وكرشك حتى ترتاح فاش غاتخرج غاتنعس خصوصا درتي الرياضة

مد يدو جمال كياكل وخا معندوش كانة...كلا شوية ومكملش الخبز عاد ناض للحمام دوش ...لبس عليه حوايج جداد وحط حوايجو القدام فالماكينة دالصابون و خرج لقاه وجد ليه البيت ...دخل وتمد بلاصتو ومع عيا بجري مشا نيشان نعس ...اما سي هشام فكان كيصلي صلاة الصبح لي كتكون بعد الشروق وقبل الظهر غاكمل شد القرآن فيدو وبدا يقراهكان جمال ناعس مرتاح فوق الفراش ...كلام سي هشام ديما كان كينفعو وكان كيهديه ... لدرجة بعض المرات كان كيتمنى يكون ولدو هو وميكونش سي محمد هو باه ...فالشمال طنجة فاقت جميلة وهزات تيليفونها لقاتهم ناويين يمشيو لرميلات هو متنزه وفحال الغابة عامل ...وقفات مشات قضات روتينها الصباحي عملات مكياجها عاد نزلات فطرات ومشات اول شيء خرجات شهادة طبية دسيمانة...خلصاتهم وخرجات من تم صوراتها عاد سيفطاتها لمديرها ...مشات ركبات فطرانبية لي وصلاتها لإيبيريا عاد من تم شدات تاكسي خداها للرميلات ...كان غا عزيز وحنان وكريمة لي وصلو...بقا واقين كيهضرو مع بعضهم حتى جات باقي الشلة عاد دخلو كيدورو فالبلاصة وكيتصورو كانت البلاصة هادية وغزالة للتصاور...لقاو تم واحد زعلولة شدو عليها نوبة مع الناس حتى وصلات نوبتهم عاد بداو يركب واحد بالواحد ...شي راكب شي يصور وشي يدفع بيه ...كانت راكبة فوقها وكيدفعها عزيز بجهد كطلع للفوق وترجع باللور بيها...كان الهوى كيضرب فيها ومع فصل الربيع قرب فكان الجو غزال فديك البلاصة ...كان عاجبها الحال لدرجة نسات كاع جمال ...غاكملات نزلات كتشوف فالفيديو وتصاور لي صوروها وبدات تنشر فيهم وعاجبينها ... تسنات اخرين ركبو عاد بداو تاني كيدورو فالبلاصة ...شراو بيموات من الطريق عاد دخلو تاني للغابة لداخل وجلسو كياكلو ويضحكو مع بعضهم وكل واحد كيهضر فموضوع مختلف حتى قررو يلعبو الحكام والحقيقة وجات نوبة فجميلة لي ختارت الحقيقة والسؤال جا فعزيزعزيز:دبا انا لي انسول ههههه واش عندك شي علاقة؟