الحرام المباح(الداريجة المغربية)

ep24

-دخلات للونفي دوزات تلات ساعات فمادة المحاسبة حاولات تفهم داكشي شي فهماتو شي لا ودوزات تلات ساعات التانيين عند ميكرو هاد جوج مواد لي فيهم بزاف دالارقام والحسابات خلاوها دوخ ...غاخرجات توجهات للدار وفطريقها خدات سندويش عادي طلعات للدار تغدات بيه والباقي دالفلوس خباتهم فالصاك عاد جبدات تيليفونها كتحاول تفهم الدروس من اليوتيوب اما لاعولات غا على لفاك مغاطفروش ...وهذي هي القراية فالجامعات المغربية خاصك تقلب على المعلومة الراسك اما البروف غايقدملك المحاضرة ويمشي الا من رحم ربي لي كيشرحو من نيتهم ...موقفات تالخمسة ونص ناضت لبسات جينز فالكحل مع قاميجة فالاحمر مخططة بالكحل خشاتها فالسروال ولبسات فوقها جاكيط دجلد ...مشات حدا المراية رشات سبراي عوض كريم دشمس وخشاتها فالصاك باش تجددها كل ساعتاين ...عملات آيشادو فالغوز البارد وعكار فالاحمر خففاتو بصبع يدها عاد رشات بارفانها ولبسات طوانك فودنها...هزات صاكها على كتفها وخرجات لبسات سبردينتها ونزلات مع الدروج...حلات تيلي لقاتو مسيفطلها عنوان الكافي فين غايتلاقاو تمشات شدات التاكسي وصلها ليها ونزلات كتشوف الكافي من برا كيبان زوين وراقي...كان كافي معروف كيجيو ليه الصحاب مع بعضهم يقراو ولا ليكوبل ...تمشات ودخلات لقاتو جالس كيتسناها غاشافها عملها إشارة بيدو...تمشات لعندو بشوية وهو وقف وجرها الكرسي جلسات وقربو بيها ودار جلس بلاصتو

أنوار:(كيهضر والضحكة مامفارقاش وجهو بالفرحة)ولهيلة فرحت حيت تلاقيت بيك نسيتيني فكاع عيا النهار دشغل
رانيا:اه ههه اوا لباس؟
أنوار:بيخير ونتيناك لباس كيف عاملة مع قرايتك وكيدوزتي نهارك
رانيا:الحمدلله كنحاول نلحق عليهم ونفهم داكشي من اليوتيوب وكدا المهم كنعمل مجهود
أنوار:(خشا يدو فجيب المونطو وجبد منو وردة فالأحمر صغيرة ومدها ليها شداتها من عندو مبتاسمة ليه ومرة مرة تشوف فجنابها حشمانة من رد فعل الناس لي جالسين )المهم قلتي بلي البوكي معندك فين ديريه داكشي باش جبتلك غاوردة وحدة وقلت نقولك هاد القصيدة "علمني حبك كيف الحب يغير خارطه الازمان،علمني اني حين احب تكف الارض عن الدوران"
-سكت بعد ماحس بيد تحطات على كتفو ودورات الكرسي بجهد ...أما رانيا غاشافت شكون عينها وساعو من الصدمة ...شنق عليه من عنقو وهو كيقول
محسن:لاوقفات على الدوران انا غاندور الق** دمك تاتشوف النجوم
-وقفات رانيا بالخف ومشات شدات فكتف محسن كتحاول تحيدو وهو غا مانازل على أنوار بالبلوك لوجهو والتاني كيحاول يطاكي بيدو والو...جاو الناس يفارقو فيهم ومحسن يحيدوه ويبغي يرجع ويسب فيه غا من الصمطة للتحت...شافت رانيا الناس تدخلو وهي تبعد وطلقات رجلها للريح هاربة قبل مايشدها تاهيا ...خرجات من القهوة وبدات جارية كدخل من درب وتخرج من التاني كتحاول ما أمكن تبعد على المكان تاشافت تاكسي فيه غاجوج ناس دايز وقفاتو وركبات ومن زهرها كان دايز من نفس عنوان دارها...جبدات تيليفون وتاصلت بمها عاودت لها لي وقع وتاهيا قالت لها سيرلدار شد عليك الباب دالبيت وغاتبعها فالحين...غاوصلات خلصات التاكسي شافت طوموبيلتو باقي مكايناش حدا باب الدار...طلعات وحلات الباب ودخلات مباشرة لبيتها وشداتو عليها ودخلات للحمام وشدات عليها بابو ...باش لاحل باب البيت وهرسو مايجي يحل الباب التانية تاتكون مها وصلات ...سمعات باب بيتها كيتضرب بجهد وعرفاتو هو وصل قبل مها
يتبع