الحرام المباح(الداريجة المغربية)

43

فالحياة ومن صغرنا تعلمنا نهار تعمل الذنب غاتدي العقوبة...مكتبتيش تمارينك غاتاكل الدق فيدك ...هرستي كاس غايغوتو عليك...ونفس شي فاش كانكبرو كيكون فعل ورد فعل،غلط وعقاب وكل عقاب بقد الغلط...
الانسان كيسحابلو راسو قافز وعمرو غايحصل حيت فاش كيفلت منها المرة لولة وتانية كيحسابلو عمرو يحصل وكيكمل فذنبو ممسوقش وكيستمتع باللحظة ونهار كيحصل ضروري مغايتعاقب على كاع أفعالو لي فلت منها ولي حصل فيها ...
جا صباح جديد شي فدارو ناعس شي فالطبيب جالس ...كانت سعادة جالسة حدا صابر لي ناعس ومعلقين ليه سيروم نادمة على انفعالها وعصبيتها الزايدة خصوصا وهي عارفاه مخاصوش يتعصب حيت كيتخنق أما محسن فخرج لبرا يتنفس حاس براسو مخنوق وندم علاش هضر حدا باه ...باه مكان ليه ذنب فهاد المعمعة كلها رانيا الوحيدة لي كتبانلو عاملة الذنب ونسا راسو وقصتو مع زينب ...أما مونيا فخرجوها من غرفة العناية المركزة وخداوها لغرفة التانية
فتحات رانيا عينها بشوية والشمس مبرزطاها فنعستها ،تجلسات وكتحس بداتها كلها عاطياها الصداع علات لباس الطبيب لي لبسوهلها باش تشوف مال يدها كيحرقها لقاتو كلو مطبع طبايع زورق دضرب ...وقفات وحيدات السيروم من يدها ووقفات حلات الباب وطلات بشوية ملقات حد برا وهذي هي فرصتها تهرب ...خرجات وهي غادا فطريق تاحست بالدوخة تجهدات عليها وشداتها السخفة وقفات وشدات فالحيط كتحاول تقوي راسها وتمشي من تم غاباش تنقذ راسها عارفة خوها غايقتلها لشافها تاني ...شافتها واحد الطبيبة ومشات وقفات عليهاالطبيبة:علاش نضتي من بلاصتك زيد نردك للبيت
شداتها معاوناها ...ورداتها للبيت مداتها بلاصتها وعاودت ركبت لها السيروم ..شافت فيها رانيا بعيونها ذابلين ومدات يدها شداتها منو قبل ماتمشي ،شافت فيها كتبغي تعرف مالهارانيا:شوف أنا لابقيت هنا غايقتلوني عاوني عفاك ولا عطيني تليفوني البارح كان عندي وسط حوايجيالطبيبة:حوايجك راهم فالبلاكار وسط الحمام ومعاهم حتى تيليفون واش شي حد مهددك ولا شي حاجة نتاصلو بالبوليس؟رانيا :لا غامشكل عائلي واش تقدر تعطيهلي؟الطبيبة:اه تسناي (دخلات للتواليت وجبداتولها من جيب السروال عاد رجعات لعندها مداتولها وخرجات خلاتها على خاطرها...فتحاتو ودخلات تاصلات بأنوار بقات تصوني شحال عاد جاوب )أنوار:رانيا لباس توحشتك بزافرانيا:أنوار واش ضبصح باغيني؟أنوار:آه والله حتى باغيك وكنحماق عليكرانيا:(بلعات ريقها وخرجات الهضرة بزز لا قلبها باغي لاعقلها مستوعب هادشي)آجي خطبني من عند ناسي ،انا فسبيطار غلطت كنت كنهضر مع سواعدة وحتى تبت ومعرفتش كيف ساق الخبار ...المهم لاكنتي باغيني بعيوبي آجي لسبيطار***أنوار:كيفاش كنتي كتهضر مع سواعدة؟يعني ..رانيا:آه كنفتخهم وكنشطحلهم دبا باغيني ولالا؟
سمعات الخط تقطع ومبقاش صوتو يتسمع ،ضحكات على غباءها لي يسحابلها كاين شي حد غايبغيها بأخطاءها ويتقبلها بعيوبها كيف هي ...طفات تيليفون وخباتو تحت المخدة وتمدات كتحس براسها عيانة غمضات عينها ونعسات ....دخل محسن وجلس حداها كيشوفها ناعسة ...كتبان هادية ومتحركش الدجاجة من بلاصتها ...وقف وبدا يشوفلها فراصها لي ملوي بالفاصمة بغا يقرب يحط يدو عليه وخاف لاتفيق ويحصل دار وخرج وخلاها ناعسة على راحتها ومشا يطل على باه