جموح الغضب

4

☠️🩸جموح الغضب ☠️🩸
✍🏿بقلمي : خديجة كابي
☀️حتى الشمس ستكسر القانون و تشرق من مغربها لتعلن النهاية ☀️
💄الجزء الرابع 💄

عشاء رومنسي بطابع خاص ، بالنسبة ليها ايكون أول عشاء مع أفظل صديق تعرفات عليه ، هي ماشي من النوع الاجتماعي ، بل هي معقدة من جيهت بنادم ، حشومية قليل تسمع صوتها ، متترفضش شي طلب حتاش تحشم تكول لا ، في تصرفاتها تتشبه لماماها و هادشي لي خلاها المفضلة عند خوالها ، لي من الطبقة الفقيرة ، معمرها قدرت تشوفهم حتاش بسهولة سي رضوان حيد اي دليل على مكان وجودهم و منعهم انهم يصونيو عليها...

بمجرد ما قطعت معاه الاتصال ، ركبت اللوطو متوجهة للمكان المفضل عندها ، مكان تتلقى فيه راحتها بزااف و هاد المكان كان في واحد المنطقة خاوية و فيها السكون ، مكانش بنادم في هاد البلاصة بزااف من غير حراس المزرعة و الخيول وشي حيوانات و الخدمات لي مقابلين الشغال تماك باش مني تجي ترتاح فيها تلقا كلشي موجود و الدنيا نقية...نزلت من اللوطو بعدما بلاصاتها و تحركت داخلة للمزرعة كدور وسط الورود لي وصاتهم يزرعوهم كتفحصهم كيف منظمين ، تمشات بإتجاه الاسطبل و عينيها كيدورو على نضافة الخيول و الصحة الجسمانية ديالهم ، وصلت للاخر إسطبل و هي تلقى واحد العودة حداها فرس مزال صغير الواضح انها ماشي بزااف باش ولدات

دورات عينيها على المكان ملقاتش الحارس لي مقابلهم و هي تغوت بسميتو تا بان ليها جاي يجري

سي المعطي ( الحارس ) : بنيتي جيتي على سلامتك

رنيم ( بابتسامة بشوشة) : با المعطي أكيف داير لباس صحيحة هانية

سي المعطي ( مبادلها الابتسامة ) : الحمد لله أبنتي ، ربي خليك ديما مسولة فيا ( دور عينيه العودة فين كتشوف هي ) راه ولدات ابنتي غير شي تلتيام هادي ، عيطت على شي رضوان كلتها ليه و وصيتو يكولها لك

رنيم : اه صافي ، واخ مكاليش هادشي

سي المعطي : ايكون غير نسا ابنتي راه السن كبر

بدلاتو إبتسامة و تحركت غادية داخلة للدار ، حلت ليها الخدامة و رحبت بيها ، عزيزة عليهم كاملين ، تيحبوها و مني تتجي هاداك هو النهار الكبير عندهم ، علماتهم يسخنوا ليها الدوش و يوجدوا ليها متقصي و مكان منهم غير التنفيذ في البلاصة

° بالنسبة لإلياس فهاد العشاء ماهي غير خطة منو باش يزيد يوثق علاقتو معها و يزيد يخليها تعلق بيه كثر و كثر ، الخطة ديالو غادية لحد الان مزيان و بشكل صحيح ، الا انه خايف من هداك الوحش ليضرب ليه كلشي في زيرو ، يقدر يفرش ليه كاع خططوا حتاش هو مغيخسر والو ، عندو حياتو زايدة ناقصة ، عكس إلياس شخص كيحب الحياة ، عزيز عليه يعيش ، يقدر يقتل و يضحي بلي عزيز عليه غير باش يعيش و هادشي بحد ذات ماهو خايب ، بحد مكايتسمى أنانية ، ديما مفظل راسك على كلشي و مول هاد الفكرة العقلانية مكيطولش بزااف بسباب فعايلو

مكاود مع المراية و كيقاد في الكلافاط و على وجهو إبتسامة شرانية ، دوز إدو على دقنو ببطئ و هو ناطق بين سنانو

[ اممم نعيشو اللحظة قبل منعيشو المتعة الإنتقامية هههه ]

فعز ديك الضحكة دخل معاذ لي هاز في إيدو صندوقة ديال كادو صغيرة بالاحمر ، حلها كيوري فيها لإلياس لي شافيه بإستغراب و هاز حاجب و مهبط خوه بمعنى اشنو

معاذ ( بطنز ) : هاك هاد السنسلة ركبها في عنقك

إلياس ( ببرود ) : متبغيش نربط ليك بيها ز...

معاذ : لواه لواه أعشيري مزال محتاجوا ههه

إلياس : اوا رض ليه البال مزيان

معاذ : ههه ضروري متخافش ( بجدية ) شوف هاد السنسلة أتعطيها ليها كادو فهمتي

إلياس ( بصوت روجولي ) : زعما الصواب و داكشي

معاذ ( كيحرك راسو بتأكيد على كلامو ) : ايه ، و شوف خاصك تعرف بلي اي كلمة خرجتيها من فمك كتدل على مستواك في التعامل ، عرف كيفاش تهدر

إلياس : مال دينمك كتعلمني كيفاش نهدر ، زم دركومك ، راني نغلبك في الاداب و الصواب

معاذ : الله يجعلني نتيق أعشيري

#يتبع