جموح الغضب

66

♥╣[ جـــمـــوح الـــغـــضـــب ]╠♥
      ✍🏽 بقلمي : خديجة كابي

🍷زدني من النبيذ...لعل ابتسامة باهتة ترسم على وجهي 🍷

🦋 الجزء ⁶⁶ 🦋

عينيه كيدورو على داك الدوار لي كان كيجري فيه و البلاصة لي كان كيلعب فيها هو و عشرانو الكرة...تفكر راسو كيفاش كان كيجري لابس حلومة و توني ديال الريال برقم 7 ديال رونالدو و كيغوت على صحابو يلوحو ليه الباص...داز من قدام مول الحانوت لي كان كيشفر ليه المسكة و الفنيد و كيقسم مع صحابو و لا مني كان كيشفر البيض لمو و يبيعو ليه

أيام زوينة مكرهاش ترجع و مكرهش ميخسرش اللمة تاع العائلة
دار مع واحد الدورة و بانت ليه دارهم لي واضحة و عاطية للعين
زاد في سرعة شوية تا وقف قدام الباب
كانت واقفة مرسيديس كحلة و الواضح أنها اللوطو تاع عدنان
تنهد و تقدم للباب ديال القزدير دق فيه و رجع اللور سمع صوت مو كتكول شكون و مجاوبش حتى تحل الباب
بقات مصدومة من لي تتشوف قدامها و قلبها مطاوعهاش تخليه واقف مشات ترمات في حضنو معنقاه و تتبكي و فرحانة و تتغوت على لي للداخل

ماماه : ولديي جااا ولديي توحشتك اولدي ( شدت وجهو بين إيديها ) حبيبي سمح لياا بزااف سمحي ليا
شوف كلشي داب تبدل اولدي سمح لياااا متيقتكش

مسح ليها دموعها بإيديه و باس ليها على راسها ، هز راسو و بان ليه نعمان متكي على الباب كيطلع و يهبط فيه بشي شوفات ممفهومينش
تنهد و بعضها عليه مخاطب خوه باحترام

ميراث : العشير مغتسلمش زعما

تقدم عندو نعمان و تعانقو عناق روجولي و ميراث بقا كارز عليه بحالا داك العناق كان رسالة للطرف الاخور
رسالة فيها شلا كلمات منهم الاعتذار و الحب و الاشتياق و الاخوة

نطقت لالة فتيحة واضعة إيديها على كتفو : زيد اولدي مرحبا بيك...ختك أتفرح مني أتشوفك

تما داخل و هو كيهدر حاني راسو : هي كاينة هنا

لالة فتيحة : لا اولدي في المدرسة ولكن قريبة تجي

ميراث : ماشي موشكيل الوليدة أنا غنتسناها و اصلا عندي شلا كلام معاكم كاملين هادشي علاش غنطول معااكم هنايا الا سمحتي

لالة فتيحة عنقاتو : حاشة يا وليدي مرحبا بيك الدار داركم و نتا اولدي ماشي بالبراني
كرزت عليه كتر و كيدوز على ضهرو موحشااه بزااف و نطقت مكملة كلامها : الله ياربي على كبيدتي توحشتك اولدي بزااف فين كنتي غابر عليا يا قلبي

ميراث : الوليدة غير في الخدمة راك عارفة و المشكل لي وقاع مع خوتي ( دار شافي نعمان )

لالة فتيحة : كلشي غيتصلح اولدي غير تهنى

مع سلات جملتها سمعو صوت مغريبش ناطق من وراهم

نرمين ( بغضب ) : خرججج من داارنااا متجيش عندناااا

هز فيها عينيه و قبل مينطق سبقاتو لالة فتيحة متوجهة لعندها

لالة فتيحة : سكتي حشومة خوك جا يشوفك

مقدراش تسكت و نطقت باستفزاز : علاش جاي...ميشرفنيش يكون خويا قتاال و مجرم قطاط...

قبل متكملها نزل عليها نعمان بتصرفيقة ثلاثية الابعاد ، صبعانو طراساو على وجها و نطقت بغضب و حقد موجهة كلامها ليه

نرمين : اخرررر مرررة يهظررر معاياا شي واااحد فييكم

كالت جملتها و مشات تجري سدت عليها في بيتها بينما نعمان غمز ميراث باش يكلس و كلس
مشات لالة فتيحة تتحاول تهدنها و لكن واالوو تغوتت و تتبكي ربي لي خلقها محاملاش تشوفو و هو براسو نسا السبب علاش و معارفش الحالة النفسية ديالها كيف ولات من بعدما......

#يتبع

توقعاااات البشااار
بغينا نفحرو بشااار
( على طريقة مزراوي ههه )