جموح الغضب

6

🩸☠️جموح الغضب 🩸☠️
✍🏿بقلمي : خديجة كابي
☀️حتى الشمس ستكسر القانون و تشرق من مغربها لتعلن النهاية ☀️

💄 الجزء السادس 💄

جابر من النوع لي متقدرش تهزموا بالتهديدات ، واخ يعرف يخرج من رتبة محقق أيبقى حتى يلقى أعضاء الجند الأسود ، سيطرتهم طغات لا في تجارة المخدرات ولا في التجارة بأعضاء البشر أو بالبشر حيا يرزق ، يعني كيتاجرو في بنادم لي كيولي بحال العبيد

مسح على وجهو بزعفة و رفع عينيه لي ولاو جمرة حمراء كون صابت كون حرقت داك الرئيس لي واقف قدامو
نطق بصوت شبه هادئ او كيداعي الهدوء : واخ صافي سي الرئيس ميكون غير أمرك

الرئيس : نتمنى تفهم الأوامر أ جابر مبغيتش نخسر محقق موهوب بحالك ، متخسرش حياتك بسباب التهور

حرك ليه راسو ، اما الرئيس خرج مغادر المكتب و هو مخلي وراه بركان قرب ينفاجر ، ناض هز اللافيست ديالو و خرج مديماري اللوطو تابع ختو بإتجاه المزرعة ، يدوز معها هاد العشية

و ماهي الا لحظات تا لقا راسو مبلاصي اللوطو بجنب اللوطو تاع رنيم ، و نازل مسلم على با المعطي و راكب على الحصان الخاص ديالو و ماشي مع نفس الطريق لي مشات معها ختو ، و كأنه كان معها و عارف بلاصتها ، اه هو عارفها فين كتمشي كيف ديما الشجرة المسحورة ، الشجرة لي سماوها بإسم ماماهم [ نرمينة ]
جابر عاقل على بعض اللحظات لي كان كيجي مع نرمينة و سي رضوان للمزرعة و كيجيو يديرو نزهة جماعة عائلية تحت هاد الشجرة ، نقدرو نكولو ان في داك الوقت رنيم كانت مزال مقفلت عامين يعني مغتعقلش على هاد الأحداث لي داب تحفرو في عقلها و قلبها من خلال الحكي ديال خوها

° كانت ساهية و سارحة بعينيها للسماء ، وقفت مخلوعة من حركة اليد لي تحطت على كتهفها ، تلفتت و غير قشعاتو قدامها تلاحت عليه معنقاه و مبتاسمة ليه إبتسامة بشوشة و عريضة
ناطقة بمزاح رغبة منها انها تضحكو حتاش بان ليها مقلق

رنيم : خويااا توحشتك

جابر ( شاد معها الخط ) : اوه يلاه شي ساعتين باش شتيني

رنيم ( جراتو من حنكو ، بلطف ) : اممم اه دغيا تنتوحشك على انا شحال عندي من جابر

جابر ( ابتاسم بزز ) : غير انااا ,ولا ياكوما عندك شي واحد اخور

رنيم ( بعدت عليه تتبشش في ورق الشجر ) : لا اويلي حاي

جابر ( ناوي يزمطها ) : و بقاي عليا بديك اويلي حاي ، كانت شي حاجة قوليها

رنيم ( بدات تتخوي المزيودة ) : و اش غنكوليك عندي ليوم موعد عشاء

جابر ( بتساءل و استغراب واضح على ملامحو) : اممم شكون هدا ، ممكن نعرف سميتو

رنيم ( بنبرة هادئة ) : المهم هو محامي سميتو إلياس الذراوي

الاسم لي قالت طاح عليه كي الصاعقة مكانش متوقع بلي هاد الشخص ايحفر في حياتهم ولا اتكون عندو شي علاقة بختو ، نطق بهدوء و تفهم : اممم واش بناتكم شي علاقة اختي رنيم ، شوفي عاودي ليا متحشميش مني

رنيم ( كتحرك راسها يمين و شمال بمعنى لا ) : لالا اخويا مكتجمعي بيه تاشي علاقة مجرد أصدقاء و صافي ، و بالمناسبة ديال انتي نعاود ليك كلشي فكين شي مشاعر انا منقدرش نعاودهم ليك ، و نتا اخويا عارفني تنحشم بزااف ماشي بالزاعمة

تعجب من أمرها ، كتكول بلي معندها بيه تاشي علاقة ولكن مجرد اصدقاء ، خاف على ختو من هاد إلياس ، لي كان شحال هادي طاح في إيدو ملف خطير عليه و لكن هاد الملف تسحب و تم إخفاءه من طرف نيابة الشرطة العامة
تنهد تنهيدة من أعماق قلبو ، مقرب ليها مقبلها على راسها و ناطق بينو و بين راسو
« داب تجي نوبتك أسي الذراوي ، طيح بين يديا منرحمكش »

#يتبع