جموح الغضب

71

🌸 جمــوح الــغضــــب 🌸
✍️ بقلمي : خديجة كابي

🎭 بوجه جديد... سنبدأ الملحمة النهائية 🎭

🗽 الجزء ⁷¹ 🗽

قبل ميكمل الجملة ، وقفت رنيم و جبدت الفردي ديالها من الخصر و توجهت لعندو و في نفس الوقت نطقت

: سمح ليا قاطعتك ولكن الموضوع مكيهمنيش

حطت الفردي قدامو و كملت كلامها : انا كنساحب من الفرقة

بتاسم ابتسامة جانبية و نطق : تهلاي الكابوسة

رجعات ليه نفس الابتسامة و نساحبت موجهة التحية...عطات كاع لي في جهدها لهاد الفريق و كانت خدامة معاهم من نيتها
مكانتش ناوية تغادرهم داب ولكن تتحس براسها مبقاتش غادية بنفس داك الجهد و جهدها داب بغات تخصصو غير لهاد العملية لي مكرهتش تساليها في أقرب وقت و تهنى ولكن واش المهمة ادوز على خير هادشي لي غنشوفو

بينما هي خرجت عند مرام و غادرو المكان في إتجاه جبل إيفرست ، ميراث هو الاخر علمهم بالمفيد و خرج مغادر المقر بإتجاه الفيلا و مع دخل لقاها خاوية كيفما أمرهم و رجع خرج كيف العادة سادها من وراه...ركب في اللوطو و ديمارا بإتجاه الدار ديال سليمان لي تاهو في هاد الوقت كان كيتسنى فيه

متكي على الفوطوي و داير رجليه على الطبلة لي عامرة بأشهى المأكولات و منساوش الكارو لي كان كيتنغم بيه و داك الدخان لي كيسوط من نيفو كان كيرسم علامات مائلة في الهواء
سمع الدقان و جمع الوقفة و هز ميشوار مسح أتار سباط غلى الطبلة و توجه للباب حل ليه ، بتاسم ليه و تسالمو سلام روجولي و طبطب على كتفو ناطق بنبرة هادئة

سليمان : عـــاش من شافك العشير

ميراث : يلاه شتك شي يومين هادي

دفعو ببطئ يدخل و نطق بطنز : كنتوحشك الحبيبة دقلبي

ميق فيه ميراث : ياكوما وليتي من قوز قزح

سليمان : استغفر الله العشير غير طانز عليك

ميراث : كنت أنغلط فيك ههه

ريح على الفوطوي و تقاد في الكلسة ، إيد كيمررها على ذقنوا و إيد حاطها على فخضو و نطق

ميراث : اش هاد الطبيلة متكولش ليا نتا لي وجدتيها

سليمان : لا العشير انا متنعرفش نطيب هههه الخدامة وجدت هادشي و مشات

ميراث : عرفتي ليوم خديت صدمة قوية

سليمان غمز ليه لدماغو : اش تما العشير

ميراث : الكابوسة تخلات على الفرقة

سليمان بتعجب : غيكون عندها شي سبب مقنع ، انا لي تنعرف بلي هي عزيزة عليها خدمتها

ميراث : هي دخلت للضومين تاع البوليس باش تغطي على خدمتنا و شحال من تضحية كانت كدير على قبل الفرقة ، و كانا غادية بنيتها متلقاش فيها الدغل و كاع مجهودها كانت تتحطو معنا

سليمان : تيعجبني داك الشخص لي يحط معاك ريتو و يحرث معاك بلاما يتسنى المقابل

ميراث : مغديش نقدر ننساها

سليمان بشك : عشيري تتبغيها ياك

ميراث هز فيه عينيه : اش لي خلاك تكول بحاكا

سليمان : الطريقة باش نتا كتهدر عليها و كيفاش تتوصفها راه تتبين كلشي

تنهد بعمق و نزل عينيه للطبلة محاول يبدل الموضوع ، خايف من لسانو ينطق بداكشي لي خازنو قلبو...
نطق بنبرة يكتاسيها نوع من الجدية : مغانكلوش راه هادشي غيبرد

بتاسم سليمان عايق بيه باغي يبدل الموضوع و نطق : غير هرب من الموضوع ولكن راك مغتهربش من قلبك ، زيد اسيدي مرحبا بيك

قربو جيهت الطابل و بداو تياكلو في صمت غير صوت الفورشيط لي مسموع و رجع سليمان تيهظر على بعض المشاكل لي عندو في الخدمة طالب من ميراث يلقا معاه بعض الحلول.....

#يتبع