🔥🍯️ #عــــــــــــرش_الــدم🍯🔥
⛔❀ ممنوع النقل بدون اذن❀⛔
🔱♛#️هہدوله آلجزآنسـيـة♛🔱
✿📍آلحلقهہ. 39📍✿
... دخل لقصر ... يحكي هو و الياس ...
الياس: وش راح يصرا ذرك!!
تيم: بش يتحملو مسؤوليتهم... والا بش نطبق عليهم السماء ... يا حنا يا هوما فالقرية هاذي ..
الياس: ههه حنا اكيد ..
تبسملو .. جات رقية تجري ..
رقية: تيم احلام ويني ... بنتي شعملت فيها ؟!!
ڨرمية واقفة من وراها ... كانها تعرف بلي صار كل ... ركز تيم معاها ... وقت بدات تهدر
ڨرمية: تيم ارواح نحتاج نهدر معاك ..
رقية: حد فييييييكم يخبرني ...
صراخها وصل لاخر غرفة فالقصر...
هبطت هند تجري ..
هند: احلاام ويني شعملتو في ختي ؟!!!
عينها عليهم كل .... و بالاخص في امها لي التعب و دموع شلال من عينها .... اكيد عملو حاجة لاحلام
رقية: شووومي على بنتي لي ما تهنااات في حياتها ...
هند: شبييييييكم ساكتين .. الياااس ويني احلام مش تشوف في حالت امي راح تموت ؟!!!
زينة ام الياس واقفة ... اصلا هي قلبها حجر كي ڨرمية ولا ليام خلاوها هك ... شعرة ما تحركت فيها ... تنبه في ولدها ما ينطقش من بعيد
الياس : مانعرفش و شاف في تيم ...
تيم: اسم احلام ما نحبش نعاود نسمعو فالقصر ... حكايتها تسكرت ... و جا طالع ... خلاهم يعاودو فلي قالو ... هدر بكل برود و مشا....
ڨرمية: تيم ...
هز يدو بلا ما يشوف معاها بمعنى مش وقتو .... طلع لبيتو ... حل الباب ... دخل .. شاف ولاد الياس فالبيت لي مقابل بيتو مرعوبين منو... قفل الباب في وجهم .. مشا خطوات ... لعصب راكبو مزير على يديه عامل قبضة .... حتا عروقو باينين .... عرق فوق حاجبو برز .... عينيه دم .... حياتو كل... لحاجة لي بقات خطوة و يلحق ليها ...تروح و تتسل كي الخيط من يديه... جاتو لي عملاتو فيه احلام حشوة ... كان مش راح تخدم مصالحو كان قتلها....نحا ساعتو حطها فوق الطابل حل شوميزو نحاها ....و مشا يهدي روحو بدوش .... غير دخل ... قابلاتو لمراية ... اصلا تيم سرو و همومو ما يحكيهم لحد من غير التصويرة لي تعكسها لمراية ....يشوف مع روحو و مركز مع ملامحو .... عدوه مقابلو ....تيم هو عدو روحو كثر ماهو صاحب روحو....هز يدو و بنفس القبضة لي كان قابضها من اول ما دخل للقصر ... خبط القزاز ..كسر لمراية...تجرحت يدو من الزجاج لي دخل فيها ...و الدم لي ساح طبعو فيها و بقا يدور في يدو على زجاج و جبدها .... يشوف في طراف لمراية لمكسرة ملطخة بالدم..... لز على سنيه و هدر ....
تيم: هاذا هو انا ... طرافي مكسرين و ملطخين بالدم .... بش ندمرهم بالواحد ... كل حد ساهم انو نوصل للحالة هاذي بش يخلص حسابو معاااايا والا ما نكوون تيم عشماوي ..و بش نوصل وين بغيت ....
#هدولة
مزالت تبكي ... بنتها حذاها تهدي فيها ... وهي مش مصدقة لي قالوه
هند: امي سمعتي الياس وش قال ... احلام عند ال خليفة راهي مليحة
رقية: لااا ما نصدقهمش حتا نشوفها بعيني
هند: المهم هي عايشة كان قتلوها مش راح يخبيو ...
رقية: بش يصرالها كي عمتك ... مش راح يخليوها فرااحتها ....
سكتت هند بعدها نطقت
هند: فالكلتا الحالتين كانت بش تموت يا امي .... بش تاخذي راجل و نتي ما تحبيهش هو موت ثاني... سعات نقول كان متت احسن من العيشة لي راني عايشتها...
رقية: اسكتي لا يسمعك شي حد
ضحكت هند باستهزاء ...
هند: و كرهت اني نعيش و انا خايفة من حد يسمع هدرتي ... انا مش راح نخاف من اليوم ... راح ندير لي نقدر عليه بش بنتي ما تعيشش لي عشتو انا و اختي ... ( تفكرت هذاك ترند تع الموت ولا المذلة ههههه خليك عاقلة هندوش تيم مش ساهل كيما راهو يبان)
فاللحظة دخلت بنتها ..
فداء: ماما ويني خالتي احلام مش في بيتها!!!
تنهدت هند و نطفت ... احلام معادتش موجودة
فداء: معادش بش نشوفها!!!
رقية رجعت تبكي ... حلتلها هند يديها بمعناها ارواحي عندي ... راحتلها حضنتها ... باستها من جبهتها ...
هند: هييه معادش بش نشوفوها ... و تمتمت باقي الهدرة في قلبها
هند: بش نوفرلك عيشة احسن... نوعدك مش بش تعيشي كيفنا...
