🔥🍯️ #عــــــــــــرش_الــدم🍯🔥
⛔❀ ممنوع النقل بدون اذن❀⛔
🔱♛#️هہدوله آلجزآنسـيـة♛🔱
✿📍آلحلقهہ. 63📍✿
بعد ما لكل كان مستغرب منها وهي تتبسم .. و باين عليها الفرح ... و التحمس... لابسا روبتها و مزينة روحها .... مكانوش يتوقعو .. و فوق من هك اعصابها لباردة.. وردت فعلها كي دخلو عليها .... كلها ما طمنش.. وش راح تفوت على خير
مزالت تشوف فيهم... تستنا منهم جوااب ... حتى رجعت هدرت ...
افراح: هك تعاملو عروس .. على وجه انها تخرج من قصرتكم... تزدمو عليها و تكسرو عليها لباب.... شيقولو الناس و العرش لي راه يستنا فيا برااا !!!
دهشتهم بكلامها... حتى نطقت
شافية: اخرجو خليونا وحدنا
بلقاسم: شافية ما عندنا وين نمشيو
دارت شافت فيه
شافية: الحاج عندي كلمة معاها ...
شاف فيها... و ركز مع افراح .. بعدها خرج و خرجو كل قدامو ....
مشات شافية خطوات عند افراح و هدرت
شافية: عمري ما تخيلت نزفك بالطريقة هاذي....
افراح: و زفيتوني ... قالت ببرود
شافية: ما تحطيش اللوم علينا يا بنتي... و حتى على روحك ما تحطيهش.... لي عشتيه و بش تعيشيه مقدرلك .... العشماوي مش كيما توقعتيهم و كيف ما حكينالك عليهم ... هوما ضحاو ب ثلاثة و جات دالتنا بش نضحو بوحدة... بدال ما نضحو بارض.... جا الدور ليك ....
افراح: تعرفي طول عمري ما فهمتكم.... بصح ذرك وضاحت صورتكم عندي.... انذل لعباد هوما نتوما ..
شافية: نعرفك حزينة و متغششة منا عليها تهدري هك ... الزينة و الطرحة و الروب ما يمشيوش عليا... نعرفك مليح... و علبالي... في عقلك مخططة تعملي حاجة ورا هاذ البرود ...
افراح: خطتي هي اني نخرج من عندكم و نتفك منكم... حتى وكان رحت لقاع لارض... لمهم ما تكونوش نتوما في حياتي
تنهدت شافية
شافية : زمان يما كانت تقولي ... بلي زوجها بوها.. لراجل عمرها لا شافتو... قبلت باه تتفك منو كيف ما تقولي نتي .. و وصاها.. و قاللها.... عندك ترجعي... لعروسة الا لدار بوها رجعت... كيف لعصيدة اذا بردت ... و ما ياكلها حد .. و فات الزمان و جا الدور عليا ... خرجت من الحبس لي كنت فيه.... و تفكيت... وهربت من خوالي.... كنت صغيرة... كلشي كان يبانلي كبير .... جيت لهاذ لقصر... و تزوجت انا و جدك... مع لوقت وليت مرت اغا لكل عشيرة ال خليفة....
افراح واقفة تسمع فيها ... مش فاهمة علاه راها تقص عليها حكايتها ذرك... وش المغزى .. كملت هدرت
شافية: لحكاية طويلة و الوقت راح..... موكبك يستنا فيك ... حنا غلطنا فيك بزاااف.... انساي... و امشي في حالك .... وعندك تحاولي ترجعي لور... بش يسيح الدم ياسر .... عندك
افراح: هذاا لي يهمك!!!
شافية: نوصيك.. الرجال ما يحبوش المرا لي مهمومة و النكدية... الراجل يحب المرة الزعيمة... لي تضحك مرة و تخوف الف مرة... هوما جنس خبيث.. اذا باغيا تعيشي كيما بغيتي... و توصلي لوين حبيتي عند العشماوي لازم تعرفي كيف توقفي فوق الصور العالي... و رهبيهم ...
افراح: انا ما نديش نصائح منك ... ونعرف كيفاه نخلي روحي نعيش... مدام طول حياتي بين الذيابة عشت
شافية: انا كلامي خلاص هنا.... اهبطي راجلك يستنا ...
مشات افراح من جنبها... خرجت لقات فضيلة و فتيحة و شفاء عند باب بيتها... فاتت عليهم و حبستها شيفاء كي هدرت
شفاء: كنتي تقولي انا ما نتزوجش كي زواجت شفاء... شوفي وين طاحت بيك.... حبست افراح.... رسمت تبسيمة على وجها.... فوق قلبها و دارت ليها
افراح: انا مرت تيم عشماوي... زعيم العشيرة و سيد العرش.... فالقصر هذاك.. بش نولي الآمرة الناهية فيه.... اما نتي هنا ماكي راح تكوني حتى حاجة.. غير المذلولة لي منهار دخلتها معادش مسها راجلها.... و بش تقعدي مذلولة ....
شافت فتيحة و فضيلة في شفاء ... لي تلبكت
افراح: ليالي لي فاتو كل علبالي بلي مهدي ما يرجعش لدار و يبات في بيت البحيرة مع لغنم و لبقر و الروث تاعهم.... ما تحطيش راسك من راسي صعيب تقارني بيناتنا.......
و كملت نزلت ... قابلها يوسف عند الدرج مع احلام ....
يوسف: افراح نجم نحبس كلشي ...
احلام: يوسف معاه حق... خلي انا نمشي معاهم
شاف فيها يوسف...
يوسف: قتلك مش باش تطلعي من هنا ... انسااي ترجعي
قدمت افراح ليهم ...
افراح: الله يسعدكم ببعض... و حكمت يد احلام... و نطقت
افراح: كوني مليحة هذا يخليني نرتاح من لي عملتو نخلص في الحرب لي بديتها و شعلتها انا ...
زيرت على يدها احلام
احلام: وانت ديري لي قلتلك عليه....
يوسف و نساء لي فالدروج يشوفو فيهم
فضيلة: وكتاه ولاو صحبات!!
شفاء: منعرفش.. بصح افراح طول عمرها تعمل لي يقلقني و تصاحب لي نكرهم ...
جبدت روحها و مشات ... فاتت على جدها... بلقاسم لي كان ممو عينها... عمرو لا بينلها حبو .. اما كانت تحبو كثر من اي حد فالقصر .... قبل ما تلوح خطوتها برا نطق
بلقاسم: طهلاي ...
قبل ما يحط يدو بش تخرج تحتها و يرد عليها برنوسو تخرج بيه....
ما شافتش فيه ... و خرجت وحدها... حد ما رافقها .. ولا حتى خرجها.... وحيدة.. كيف ما طول عمرها عاشت وحيدة ....
كمل جملتو
بلقاسم: طهلاي في روحك ....
غير شافها .. خارجة هكاك .. لا برنوس ساترها ولا راجل بجنبها... نزل من فرستو ... و توجهلها ... واقفة عند الباب... برجليها رايحة لقعر الجحيم.... مكانش رجوع... تشوف فيه ... مستيكي روحو... زي رجولي... هيبتو و وهرتو.... و زينو كلش فيه يرهب من الكاريزما لي فيه .... رد برنوسو على جنب .. و مشا جيهتها .... تشوف فيه متوجه ليها.... ترجف داخليا .... حتى وصل عندها .... نطق
تيم: عندك ديري حاجة بعد تندمي عليها ...
تشوف فيه ... سمعت لكلام.... بلعت ريقها وهي تشوف الاستعراض لي قدامها
رد برنوسو عليها و ضمها ليه بالجنب .. و مشا هو وهي .... هبطو الدرجات لولين ..
