🔥🍯️ #عــــــــــــرش_الــدم🍯🔥
⛔❀ ممنوع النقل بدون اذن❀⛔
🔱♛#️هہدوله آلجزآنسـيـة♛🔱
✿📍آلحلقهہ. 122📍✿
كمل دوش و لبس قشو خرج ... شاف فالسرير لقاها راقدة .... توجه لسرير .. هز لغطا .... و دخل في بلاصتو .... كانت عاطياتو بضهرها .... حط راسو مع لمخدة .. و يشوف مع السقف .... خرجت تنهيدة من اعماقو .... الشهرين لي فاتو عليه كانهم زوج قرون. .. يتفكر و يفرز في أفكارو ... في عايلتو ..... تفكر يوسف وقت قوص غلى بلقاسم.... زعمة يكون ندم!!... راح يتعقدو الامور كثر! .... بزاف امور لازم عليه يحلهم كي يطلع النهار ... تحركت بحذاه ... ما فاقتش مع روحها و هي تستنا فيه غطست في نومها .... راقدة كي الملاك .... حس بقربها ليه ... قلبو رجف .... عاجبو لحال .... حتى قدمت ليه .... حطت راسها على صدرو .... و جبدت نفس بقوة .... كيف ما كانت دير مع مخدتو في غيابو ..... قشعراتو ... خلاتو خيوطو يتلفو ..... قدم باسها بالشوي من راسها ..... و جبدها ليه بالشوي .... و حاوطها بيدو ... مش مصدق انو افراح الاعصار لي قابلها اول يوم هي نفسها افراح تع ليوم قرا الفرحة و الخوف و الغيرة و الحب و الرغبة في عينيها ... افراح البيبي لي كان في صغرو كارها بصح كيف كبر ما نجمش يحط اللوم تع موت عمتو فيها ... هي ثاني كانت ضحية عند ال خليفة ... ها هي ذرك راقدة و في حضنو ... كملت تكمشت عندو .... غمض عينيه كانو مالك الدنيا كلها.... حاجة ما تسانا فيه... لي همو انو يستمتع باللحظة لي راهو عايش فيها ....... و بلا ما يفيق هزو النووم ..... كانو من سنين ما رقدش... ما فاق بشي ...
حتى طلع نهار جديد ......
#يوم جديد ...
فاقت عكس كل نهار .... غير حلت عينيها ... قلبها رف .... فيسع ما تفكرت انو لي صرا لبارح مش حلم حقيقة... و تيم رجع ... تيم راهو قدامها ... و في حضنو ..... طلعت تشوف معاه .... ليحتو كبرت شوي .... راقد كي اصحاب الكهف .... جبت النفس من اعمااااقها .. و خرجاتو .... طايرة من فرحتها .... بعد مدة من التأمل.... ما حبتش تفيقو ... باين تاعب .... ناضت من بلاصتها بشوي ... مشات قضات امورها فالصالدوبان لبست غوب تع دار مستورة قابلت لمراية.... طلقت شعرها... رداتو ورا وذنها.... دارت تشوف فيه مزال راقد .... مشات حلت لباب و خرجت .....
نزلت توجهت للكوزينة .... الشمس مزالت ما طلعتش .... جبدت لڨصعة .... و الدقيق و الزيت ... و الخميرة و حطت لماء يدفى ..... و بدات تخلط بش دير الكسرة ..... ( جاتها لفحولية على صباح ربي ما تحيروش هههه بغات تقلش راجلها 😅)
حطت المكونات ... شمرت على يديها و بدات تعجن فالعجييين ....
حتى دخلت عليها ...
زينة: افراح وش ديري !!
هزت يديها من لعجين ... و تشوف في زينة... شافت فالعجين لي يشبه لكلشي غير انو يكون عجين الكسرة هههه
افراح: بغيت ندير لكسرة بصح الظاهر مش راح تخرج
ضحكت زينة و قدمت للقصعة ... غير شافتو بالعين ... عرفت وش ناقصو
زينة: ههههه معليش كلنا كنا ما نغرفوش... صح ما رزقتش بالبنات بصح يشهد ربي راح نحطك بنتي و نعلمك كلش ...
افراح البسمة في عينيها... و غرغرو خاطر اول مرة حد يقوللها لهدرة هاذي ...
افراح: يعيشك ...
زينة: هيا خلي نعاونك ... زيدي شوي دقيق.. راها جارية بزاف
كملت تعلم فيها ..... و خبزتهم و طيبتهم .....
غير كملو ... دخلت ڨرمية
ڨرمية: اوووه ريحة الكسرة مع الصباح من مدة ما شميتهاش ... زينة درتي زينة لعقل كي خبزتي
زينة: مش انا اخالتي افراح لي دارت لكسرة ....
شافت فيها ڨرمية وهي تتبسم
افراح: كان مش نتي مكانوش راح ياكلو كسرة ههههه
و ضحكت... خرجت ضحكة تلالي ما سمعوهالهاش من قبل ....
لا اراديا ضحكت ڨرمية و زينة
ڨرمية: الحمد لله لي رجع الضحكة لدار... وخلاني نشوفها على وجهك يا بنت وحيدتي
لمت افراح ضحكتها و رسمتها تبسيمة ...... و مشات عند ناناها باستها من جبينها وهدرت
افراح: الحمد لله لي كتبلي نعرف كلشي... و تتبدل تظرتي ليكم... سامحيني اذا شي نهار جرحتك بهدرتي
غمضتلها ڨرمية عينها وحلتهم بمعنى مسامحة
ڨرمية: هيا نوجدو لفطور فيسع عندنا شغل بزااف ليوم ...
