အခန်း ၂၁ - မိသားစုခွဲခြင်း
ကုတရွှမ်းသည် သားကောင်းတစ်ယောက်အား ပိုင်ဆိုင်ထားကြောင်း လယ်ထဲမှ လူအများက ဝိုင်းဝန်း၍ ချီးကျူးပြီး၍ မကြာမီ လီတနီက အပြေးရောက်ချလာပြီးနောက် အော်ပြောလေသည်။
"ရှင့်သားက ရှင့်ဆီကနေ မိသားစုခွဲထွက်ဖို့ ပြင်နေတယ်။"
ထိုအော်သံက အနီးအနားရှိ အလုပ်လုပ်နေကြသည့် လူအားလုံးအား ကြားစေနိုင်လေသည်။ အစောပိုင်းက ကုတရွှမ်းအား သားကောင်းတစ်ယောက်ရှိသည်ဆိုကာ အလေးအနက်ထား ချီးမွမ်းနေကြသည့် လူအနည်းငယ်သည် ယခုအခါ သူတို့ခေါင်းများအား ငုံ့ထားလျက် လှောင်ပြောင်ရယ်မောနေကြလေသည်။
ကုတရွှမ်းသည် မျက်နှာပျက်ရသည့်အဖြစ်မျိုးအား လွန်စွာမုန်းတီးသူဖြစ်ပေရာ အလုပ်ဆက်မလုပ်တော့ဘဲ ပေါက်ပြားအား ပစ်ချလျက် အိမ်သို့ အလျင်အမြန် ပြန်သွားလေသည်။ သူ အိမ်ပြန်ရောက်လာသောအခါ ကုကျန်းသည် သူ့ဇနီးအား မြို့သို့ခေါ်သွားပြီဖြစ်ကြောင်း သိလိုက်ရသည်။ ကုတရွှမ်းသည် အလွန်အမင်း စိတ်ဆိုးကာ မည်သည်ကိုမှ လုပ်ကိုင်ဆောင်ရွက်လိုစိတ် မရှိတော့သည်အထိပင်။ သို့ဖြစ်သောကြောင့် သူသည် ကုကျန်းပြန်ရောက်လာသည်အထိ စောင့်နေလေသည်။ အကယ်၍ မြို့သို့လိုက်သွားဖို့ရန်က ဝေးကွာလွန်းသည့် ခရီးသာမဟုတ်လျှင် သူသည် မြို့သို့လိုက်သွားကာ ကုကျန်းအားပြန်ခေါ်လာပြီး မိသားစုခွဲမည်ဆိုသည့်အကြောင်းအား ရှင်းရှင်းလင်းလင်း မေးမြန်းလိုလှပေသည်။
သို့ဖြစ်ပေရာ ကုကျန်းနှင့် သူ့ဇနီးက မြို့မှပြန်မရောက်လာကြသေးသည့်အတောအတွင်း သူတို့အိမ်က ကုတရွှမ်း၏ဒေါသတို့ဖြင့် ဇောက်ထိုးဖြစ်လို့နေပေပြီ။
ကုတရွှမ်းသည် ကုကျန်းအား အော်ဟစ်ကြိမ်းမောင်းလျက်ရှိနေပြီး လီတနီသည် ဘေးဘက်မှ မီးလောင်ရာလေပင့်သည့်နှယ် မြှောက်ထိုးပင့်ကော်လုပ်ပေးနေလေသည်။ ကုချွန်းဟွားသည်လည်း ဘေးဘက်မှ မီးစလေးများ ထိုးထိုးပေးကာ အရှိန်တက်အောင် ကြိုးပမ်းလျက် ရှိနေချေသေးသည်။
ကုယောင်သည် အခန်းအတွင်းရှိ အော်ဟစ်သောင်းကျန်းနေကြသည့် ထိုသုံးယောက်အား ဤသို့ဆက်လက်မပြောကြရန် ပြောဆိုပါသေးသော်လည်း လီတနီသည် သူ(မ)အား ငေါက်ပင် ငေါက်ငမ်းလိုက်သေးသည်။ "ဟွန်း.... အခု အိမ်တွင်းရေးက ရှုပ်ထွေးနေပြီဆိုတာ နင်က မသိသေးဘူးလား။ နင့် အစ်ကိုကြီးက ဘယ်သူဆိုတာ သိသေးရဲ့လား။ သူက နင့်အဖေရဲ့ လူမဟုတ်တော့ဘူး။ အစောပိုင်းနှစ်တွေတုန်းက ကလန်ကဆန်လုပ်ပြီးတော့ စစ်တပ်ထဲဝင်ခဲ့တဲ့အပြင် တစ်ချိန်လုံး စကားလည်း နားမထောင်တော့ဘူး။ ရုတ်တရက် မိန်းမတစ်ယောက်နဲ့လည်း လက်ထပ်ပြီးရော နှစ်တွေအကြာကြီး ကျွေးမွေးပြုစုလာခဲ့တဲ့ သူ့အဖေကို မေ့သွားပြီလေ။"
YOU ARE READING
နိုဗယ်ထဲရောက်သွားတယ်
Fantasyဇာတ်လမ်းအကျဉ်း ချင်လင်လင်သည် သူ နိုးထလာပြီးနောက် သူ့ကိုယ့်သူ စာအုပ်တွင်းသို့ ကူးပြောင်းသွားပြီး၊ ခင်ပွန်းဖြစ်သူက သေဆုံးသွားကာ သူ့အားဂရုမစိုက်သော ဖခင်နှင့် သူ့အား မချစ်ခင်သော မိထွေးတို့ရှိသည့် အမျိုးသမီးပညာတတ်လူငယ်တစ်ယောက် ဖြစ်လာကြောင်း သိရှိလိုက်ရသည...
