لك من اسمك نصيب يانور عيوني وضوى قلبي🤍✨

56

يوم جديد بالديرة (الساعة ٣ الفجر)
في احياء الديرة

(نورة بعد ما نامت ببيت ولدها عبدالله الله يرحمه ابو خلف، لبست عباتها ومشت بهدوء لباب البيت تطلع منه من غير ما يحس عليها احد من اهل البيت، مشَت ومشَت إلى ان وصلت عند المقبرة، تعدت المقابر تتوجه لشجرة (الطلح)، تلفتت حولها تتطمن من عدم وجود اي انسان وبعدها حفرت بالارض إلى ان وصلت يدها لكيس شفاف اخذته وفرغت محتوياته اللي كانت عباره عن اوراق وقطعة قماش وعظم)

نورة(تبكي بندم) تاخذ من أغصان الشجر: يارب انك تسامحني على اللي سويته

(طلعت من جيبها كبريت و ولعت النار بكل شي استخرجته من الحفره)

نورة(تناظر النار بحسرة): استغفرالله استغفر الله، (ان الله لغفور رحيم)

________________________
الرياض
بيت ضوى

(ضوى كانت بغرفتها تصلي الفجر، تبكي على سجادتها لكن ما اخذت ثواني وحست براحه كبيره ، حست بانشراح صدرها ووقفت بكاء، رفعت يدها تدعي)

ضوى(تاخذ نفس عميق): يارب انك تهديني وترشدني لطريق الصواب، كنت حاسه بأنه في شي مغطي عيوني ماكنت قادره أشوف شي غير الكره والحقد

(بعد ما خلصت صلاتها توجهت لسريرها ونامت نوم عميق براحه تامه ما حستها بالفترة الأخيرة)

_________________________
الديرة (الساعه ١١ الظهر)
بيت رماح

(خلف كان ناوي يدخل البيت لكن اصوات رماح ونورة المرتفعه استوقفته عند الباب)

رماح(يبتسم باستهزاء): بعد فعلتك ذي تبيني اخليك تدخلين بيتي؟
نورة(عقدت حاجبها): وين اروح يعني؟ هذا بيتي مهما سويت مردّي له وانت قلت لي عدلي اللي سويتيه ثم ارجعي
رماح(بغضب صرخ عليها): اللي سويتيه بنايف شي ما اقدر أسامحك عليه! الولد حاله متدهور وانتي تقولين لي عدلتي اللي سويتيه!؟
نورة(نزلت راسها)عيونها تدمع: وش المطلوب مني يعني؟
رماح(مسح على وجهه بغضب) يأشر عليها بالسبابه: مالك قعدة لا ببيتي ولا بحياتي، انتي طالق طالق طالق

(بعد ما سمع خلف آخر ثلاث كلمات ما تحمل يوقف اكثر ودخل عليهم بعيون متوسعه، يطالب بتفسير للي سمعه)

نورة(تبكي بقهر): ليه يا رماح ليه! هنت عليك؟ هانت عليك السنين اللي شلتك فيها بعيوني؟
رماح(مقابل الجدار مايناظر فيها)نطق بصرامه وحّده: تهونين! تهونين لأنك ضريتي ولدي عبدالله بأنك زوجتيه غصب من وحده ما يحبها وخليتيه يتزوج اللي يحبها بالسر، تهونين لأنك فرقتي بين نايف واخوانه سنين طويله، تهونين لأنك ناوية تعيدين نفس أغلاطك القديمة مع خلف ونايف
خلف(مسك يد نورة اللي كانت بين الوعي واللاوعي)نطق بصوت مرتفع بخوف: وش صار! ليه يبه ليه؟

(دخلوا نايف وعبدالعزيز للصالة بعد ما سمعوا الأصوات المرتفعه، ناظروا نورة متمدده على الارض بينما خلف ماسك يدها ورماح اللي كان واقف ومعطيهم ظهره بعدم اهتمام)