لك من اسمك نصيب يانور عيوني وضوى قلبي🤍✨

40

يوم جديد بالديرة
بيت رماح

(بعد ما طلع رماح وعبدالعزيز لصلاة الفجر، رغد ونورة بدأو بتجهيز الفطور بينما العنود كانت مشغولة بترتيب الملابس اللي كوَتْها امس)

العنود(دخلت غرفة عبدالعزيز وحطت ملابسه على السرير)تهمس بإعجاب: غرفته مرتبه
العنود(توجهت للتسريحة ولفت أنظارها مسباح ازرق)مسكته بين يدينها:يجنن
عبدالعزيز(من وراها)بهدوء: عجبك؟
العنود(فزّت من مكانها بخوف تلتفت له)مسكت مكان قلبها: بسم الله الرحمن الرحيم!
عبدالعزيز(ابتسم):بسم الله عليك
العنود(خذت نفس): ليه ما طلعت صوت وانت داخل
عبدالعزيز(يناظر المسباح بين يدها)يبتسم:انتي اللي داخله غرفتي وتمسكين اغراضي
العنود(تحمحمت)بارتباك:أنا جيت عشان احط ملابسك
عبدالعزيز(ناظر ملابسه على السرير ورجع يناظرها وقرب منها اكثر لدرجة صار محاوطها):ما جاوبتيني عجبك؟
العنود(مسكت التسريحة اللي وراها من قربه منها)بتوتر:اي
عبدالعزيز(عاجبه توترها)يبتسم:حلالك
العنود(رفعت حاجبها):وش اسوي فيه ما احتاجه؟
عبدالعزيز(تنهد):اهم شي انه عاجبك،عندي غيره عادي
العنود(بلعت ريقها)تحمحمت: طيب شكرا، ممكن تعطيني مجال عشان اطلع؟
عبدالعزيز(ميَل راسه شوي يناظرها):بس ابي مقابل
العنود(عقدت حاجبينها):مقابل؟
عبدالعزيز(مد يده يفك الشريطة الوردية اللي كانت بشعرها): عاجبتني
العنود(بعد ما حست انه شعرها طاح على كتفها)خذت نفس:حلالك
عبدالعزيز(ضحك بخفه) ابتعد عنها شوي: تفضلي

(العنود ابتعدت عنه تمشي بسرعه للباب، تاركته يضحك على توترها وارتباكها من قربه منها)
___________________
الرياض
(الشركة)

(خلصت ضوى مقابلتها مع مدير القسم بنجاح وطلب المدير من موظفة انها تاخذ ضوى بجولة حولين الأقسام، بعد ما انتهت الجولة ووصلت ضوى لمكتبها بقسم التسويق في شخص دق باب مكتبها)
ضوى(ابتسمت لانها تعرف هوية الطارق):تفضل
نايف(بابتسامة واسعه)رافع حاجبينه:ماشاءالله المكتب لايق عليك
ضوى(تمسح على يدين الكرسي)تتحمحم: طبعًا حبيبي
نايف(لمعت عينه وبلع ريقه): وش قلتي؟
ضوى(ابتسمت تعض شفايفها)تشتت أنظارها : ما قلت شي
نايف(بإصرار عينه بعينها):ضوى عيديها
ضوى(ابتسمت بخفه)تهمس:حبيبي
نايف(اخذ نفس عميق)ضايع بين حروفها:تتزوجيني؟
ضوى(توسعت أنظارها)شهقت:نايف شفيك؟
نايف(بجدية):إذا خطبتك بتوافقين؟
ضوى(بلعت ريقها)بارتباك: نايف!
نايف(تأفف بتعب)نطق قبل لا يطلع: إلى متى واحنا نمشي على البطيء ما عاد اتحمل ترا!
ضوى(تأففت من شافته طلع وهو معصب)تهمس: يعني لازم أوافق بهالدقيقه على قرار مصيري او يزعل؟

___________________
بيت محمد(ابو بدر)

(نور صحت من النوم مروقه وتغني وكل شوي تغافلها ضحكة ، الناس حولينها يفكرونها من غير سبب لكن هي كل ما تتذكر احداث امس يكسيها الحياء)