لك من اسمك نصيب يانور عيوني وضوى قلبي🤍✨

74

(بعد اربع ايام)
يوم جديد بالرياض

(بيت عبدالعزيز)

(بعد ما انتقل عبدالعزيز وزوجته العنود معاهم اخته رغد للرياض، اشتروا الاثاث وغيروا بالديكور إلى ان اكتمل وحسوا انه فعلًا بيتهم، عَزَم عبدالعزيز الكل على البيت للاحتفال)

العنود(تطلع الكيك من الفرن): رغد قصري على النار اظن انه اللحم تحمّر
رغد( قصرت على النار وفتحت الغطاء) تشم الريحة: الله الله تسلم يدك
العنود(ابتسمت) تحط الكراميل على الكيك: الله يسلمك
رغد(بعبوس): ليه ما خليتيني أساعدك
العنود(رفعت حاجبها): سويتي السلطة واللبن يكفي حبيبتي
عبدالعزيز(دخل عليهم)باستعجال: وصلوا نايف وضوى وخلف ونور
رغد(لبست عباتها وطلعت معاه): بستقبلهم على ما تخلصين من الكيكة

(بالصالة)

(استقبل عبدالعزيز نايف وخلف بينما رغد استقبلت نور وضوى بالأحضان تعبر عن فرحتها بشوفتهم وجلسوا بالصالة)

نور(بابتسامة): ما اصدق انكم استقريتوا هنا خلاص
رغد(تنهدت): باقي اداوم مع قمر واستوعب اني صدق بديت حياة جديدة
ضوى(تمسح على ظهرها): كل شي راح يكون زي ما تبين ان شاء الله
العنود(دخلت بابتسامه): تو ما نوّر البيت
نور(تسلم عليها): منوّر بصاحبة البيت
ضوى(ابتسمت بمكر): وش هالحلاوة والسنع ماعرفتك
العنود(تنحنحت): ما شفتي شي سويت لكم احلى غداء، بس وين قمر وبدر وبدرية؟
نور(بهدوء): بدر وبدرية ضيعوا الطريق اكثر من مرة بس شوي ويدخلون علينا، لكن قمر تعتذر منك مشغولة ببحث مهم
للجامعة

خلف(يوزع أنظاره على البيت): ما شاء الله تبارك الرحمن الله يهنيكم فيه يارب
نايف(بإعجاب): مساحته حلوة والله من برا ما يوضح انه كبير
عبدالعزيز(هز راسه): ايه، عندنا حديقة داخليه ومسبح بس ما يبان من برا البيت
نايف(بهدوء): هدايا البيت الجديد بسيارتي بعدين ننزلهم لك
عبدالعزيز(تنهد): ليه الكلافة يا خوي
خلف(ضحك بخفه) يضربه على كتفه: ما من كلافة

(جلس الكل على السفرة بعد وصول بدر وبدرية، خلصوا من غداهم اللي كانوا مستمتعين فيه ومندمجين بسوالفهم مع بعض، بعدها جلسوا بالمجلس يشربون القهوة)

________________________________

بيت ضوى

(بعد ما رجعت ضوى ومعاها نايف لبيتهم لاحظت انه سيارة ابوها واقفة عند الباب)

نايف(عقد حاجبه) يطفي السيارة: هذا ابوك؟
ضوى(تأففت)تنزل من السيارة: اي بشوف وش يبي
ناصر(بلع ريقه من شافها تقترب منه ومعاها نايف): كيفك؟
ضوى(بعدم تعاطف): وش اللي جابك هنا؟ روح قبل لا يشوفك عمي حمد ويسوي لك سالفة
ناصر(بارتباك): بس ابي اكلمك شوي إذا ممكن
نايف(بهدوء اقترب من ضوى)يهمس: جلسي معاه ببيتكم القديم وتفاهموا مع بعض
ضوى(ناظرته بعصبية): نايف!
نايف(نطق بغصه): لا تنتظرين انه يروح من هالدنيا قبل لا تسامحينه، نصيحة مني
ضوى(سكتت للحظات بسبب تأثرها) تنهدت تأشر لابوها: تعال