لك من اسمك نصيب يانور عيوني وضوى قلبي🤍✨

3

الرياض
بيت ابو ضوى:
خلصت ضوى مذاكرة محاضراتها ونزلت تحت تسوي لها قهوة عشان الصداع اللي جاها بنص المذاكره
دخلت امها المطبخ: وانتي مانشوفك إلا بالليل نفس الخفافيش؟
ضوى(بتعب):انتي تدرين انه كل ما نزلت من غرفتي ابوي قالي ماعندك دراسه؟ ليه نازله؟
شادن(بتفهم):ايه صح بس لاتشرهين عليه انتي تدرين انه يبيك تكونين احسن الناس
ضوى(بتهكم):ادري
دخل ناصر البيت وسمعهم يتكلمون بالمطبخ واتجه لهم، شاف ضوى تسوي لها قهوة
ناصر:وانتي ماعندك مذاكره كل ماجيت شفتك تسوين قهوة!
شادن(بتأفف): السلام عليكم، مع السلامه.
وراحت لغرفتها
شادن:شوي شوي على البنت ترا مو روبوت تبيها ٢٤ ساعة تذاكر
ناصر: الحين هذا جزاتي؟! ابيها ترفع راسنا إذا جابوا طاريها
يكفي انه اسمي ابو ضوى غيري ينادونه يابو محمد يابو خالد!
عندي بنت وحده وابي إذا نادوني فيها افتخر وارفع راسي ابيها تكون ذيبة!
شادن (واهي حاسه بذنب كونها ما جابت له الولد اللي يتمناه) راحت لغرفتها بصمت
__________
بيت ابو بدر:

نور ماخذه غفوة من بعد الدوام بس ما اكتملت راحتها إلا وتسمع صوت رنة جوالها
نور(بنعاس):الو؟
قمر:نور نزلي بسرعه ابوي يبيك!
نور(بفهاوة) لانها مو مصحصحة: اي حطيه بالثلاجة بجي
قمر: احط ابوي بالثلاجة لين ماتجين؟!
نور(باستيعاب): ها؟ ابوي؟
قمر:غسلي وجهك ونزلي بسرعه
سكرت قمر الخط، قامت نور غسلت وجهها وعدلت شعرها ونزلت شافتهم كلهم متجمعين بالصاله ولما شافوها سكتوا

نور: متجمعين على الخير انشالله! شفيكم؟
محمد: كلمتك امك عن اللي متقدم لك صح؟
نور(بعدم اهتمام) تصب لها شاي: اي مو موافقه
محمد(بابتسامه): كيف مو موافقه وانتي حتى ما تعرفتي عليه
نور(ابتسمت): عرفت المهم انه دكتوووور على قولة ماما وهذا اهم صفة فيه بالنسبه لكم وأسوأ صفة فيه بالنسبة لي وماراح اخذه
بدر(بزعل): افا بس يا وخيتي يعني أنا ما اعجبك؟
نور(بابتسامه): انت تدري انه كل شي فيك حلو ويشفع لك لانك انت مو غيرك
قمر(تحاول تهدي الوضع): نور طيب شرايك تتعرفين عليه اول يمكن يكون انسان كويس؟
نور(بعصبية وتسرع): قلت لا وله غصب الموضوع يعني؟
دلال: مابنغصبك بس مايصير لا بدون سبب!
نور: سببي واضح واصلا ما افكر بالارتباط الحين ليش ما تدورون حق بدر عروسة دامكم تبون تفرحون؟
بدر(بهمس مايسمعه احد غير نور): لوسمحتي لا توهقيني عشان تطلعين نفسك من الموضوع!
نور(ضحكت وكملت السالفه): والله اني صادقه هذا اهو دكتور ومواصفاته زي اللي متقدم لي زوجوه! تبوني ادور له عروسة؟

محمد(مسك راسه): ياربي انك تعينني على هالعناد اللي فيها قدرت عليهم كلهم إلا ذي!
————
الديرة

متجمعين بالحوش يسولفون لعمتهم عن كل شي شافوه وعاشوه بالرياض خلال فترة دراستهم هناك

خلف: والله يا عمة الرياض عالم ثاني تحسين انك رايحة امريكا من التطور اللي تشوفينه!
ليلى(بتعجب):والله لهالدرجة!؟
نايف(بابتسامه): اي والله انه خلف صادق أصلا صرت افكر اني إذا أعرست اخذ حرمتي ونروح نعيش هناك وش يجلسني عند البعارين هنا؟
نورة(بعصبية): ياويلي لا ياولدي ما تتركني هنا قلبي يتقطع عليك وتروح في قلعة وادرين مايهجاني قلبي والله!
نايف (يضحك ويبوس يدها): باخذك معاي يا ميمتي
نورة: ياويل حالي وش اسوي هناك؟ واترك ابوك هنا بلحاله؟
خلف: ماعليك يمه أنا هنا عنده ماراح اترك امي واروح

شوي إلا تدخل ام خلف وبنتها عليهم قام خلف ونايف جلسوا بجلسة ثانيه عشان اخت خلف تاخذ راحتها من غير نايف

نورة: وشلونك يا بدرية ماتمرين علي ولا تسألين عني افا عليك بس!
بدرية(ضمتها وباست راسها): والله ياجده كل يوم اقول بمرك ويسبقني الليل ومايصير عندي وقت
نورة: يلا ماعليه سامحتك
بدرية ( ابتسمت) تحاول تناظر جهة جلسة خلف ونايف، عيونها تبي تسرق نظره لنايف حب طفولتها.

عند نايف وخلف:
خلف: تحس انه راح نقدر نكمل حياتنا هنا بعد ما اخذنا الشهاده؟
نايف:لازم نوفي بوعدنا لرماح ولا انت ناسي؟ درسنا اربع سنين ولازم نشتغل بمزرعته كثر السنين اللي درسناها يعني اربع سنين وبعدها نشوف لنا صرفه ونشتغل بشهايدنا
خلف(متكي بيده على مسند): اي والله! شهادتي ماودي بس أعلقها بصالة بيتنا ودي اشتغل فيها
نايف: عاد انت كنت من الاوائل ماشاءالله عليك! أنا مادري شلون تخرجت
خلف(يضحك) وهو عينه على القمر: انت ماتذاكر شسوي لك!
نايف(بحقد): ايه ومين ما يرد علي وقت الأختبار إذا ابيه يغششني!؟
خلف: عاد من غشنا فليس منا هالحركات مب من عوايدنا ادرس تنجح
نايف: ايه ايه زين..... ترا جوعان متى بناكل!
خلف(يضحك):ياورع! توك لاهط شاي و كيك ومعجنات متى مداك تجوع يالبطيني!
نايف (رفع صوته لجدته نورة): يا ميمتي شوفي ذا يدعي علي لاني جوعان!
نورة( تضحك): يخسى الجوع وانا امك الحين نحط العشا تامر امر
نايف(يبتسم ويناظر خلف): قايلكككك تعشقنييييي
خلف(يضحك) : ايه ايه الله يهنيك

كل اللي صار ما وصل لسمع جلسة الحريم لكن كل ما بدرية شافتهم يضحكون مع بعض ضحكت معاهم ودها تقوم وتجلس عندهم لولا العيب

نورة نادت الحريم يجون المطبخ يعاونونها بالعشا وقاموا معاها
نورة(تسأل ليلى): بناتك ليه ما جاو معاك تراني مشتاقة لهم!؟
ليلى: والله ليلى تعبانه شوي بطنها يعورها
نورة: ايه ماتشوف شر، والعنود؟
ليلى(بعصبية): ذي عاد لو هي بنفسها قالت اخذيني ما جبتها!
نجد(ام خلف)باستغراب : ليه؟!
ليلى: يعني ما تعرفونها!؟ ما تجي معاي بجامعه إلا ولسانها فالت وله مسويه شي يخلي وجهي بالارض ما اقدر عليها وعلى شرها
نورة: ولو يا بنيتي بتحبسين بنتك بالبيت يعني؟ حاولي تعقلينها واذا ماعقلت جيبيها عندي أنا اربيها تراني مربيتكم كلكم ماني عجزانه على هالسعفه!
ليلى(بتعب): انشالله بحاول

حطوا العشا وجا الجد رماح اكل معاهم بعدها رجعوا بيوتهم