لك من اسمك نصيب يانور عيوني وضوى قلبي🤍✨

63

يوم جديد بالرياض( السبت)

بيت ضوى

(نور اوّل ما صحت من النوم غيرت ملابسها وطارت لبيت ضوى، وقفت عند الباب بحماس تنتظر ضوى تفتح لها، استقبلتها ضوى بابتسامه واسعه وحضن)

نور(بصوت عالي وحماس)تضمها: حَرَم نايف!!!
ضوى(تضحك وتشد عليها بالحضن): حَرَم خلف!
نور(ابتعدت عنها تناظرها بعيون تدمع): يا الله مره مبسوطة لكم
ضوى(تضحك وتمسح دموعها): ليه تبكين يا هبله
نور(تدخل معاها البيت)تجلس بالصاله: وش هالفلم الاكشن اللي صار امس!؟
ضوى(تنهدت): اسكتي، كأنه حلم عمي حمد زوجنا بنفس الدقيقه من خوفه انه ياخذني ابوي او انه يجرجرنا بالمحاكم
نور(اتسعت أنظارها وتصفق): والله اني حبيته هالحمد مايدري انه فك عقدتكم بخمس دقايق
ضوى(ضحكت بخفه): لا تشوفين وجه امي بوقتها، اول مره تشوف نايف مو فاهمه شي ياعمري عليها
نور(خذت نفس بتوتر): أنا اليوم جايين بدرية وخالتي نجد يتعرفون على اهلي، يارب كل شي يكون تمام
ضوى(هزت راسها): انشاءالله، حتى نايف اليوم راح يتعرف على امي وعمي حمد
نور(مسكت يدها تطمنها): متأكده انه امك راح تحبه

______________________________
بيت محمد (ابو بدر)

(دلال وبناتها كانوا مشغولين بتجهيزات الغداء وترتيب البيت عشان الضيوف اللي راح يجونهم بعد ساعه، بدر كان جالس مع محمد بالصاله)

بدر(يناظر ابوه بارتباك):يبه
محمد(مركز بالإيميلات اللي واصلته من الشركة): نعم؟
بدر(تحمحم يقرب منه): عندي موضوع
محمد(عقد حاجبه وناظر فيه بتركيز): وش عندك؟
بدر(بلع ريقه يترقب ردة فعله): ابيك تطلب يد بدرية من جدها وأخوها اليوم
محمد(بعدم استيعاب): بدرية!؟
بدر(هز راسه بتوتر): اخت خلف
محمد(رفع حاجبه وابتسم): ايييي بدرية عرفتها، يحليلها
بدر(تنهد): ادري يحليلها ابيك تخطبها لي
محمد(ضحك بخفه): اليوم عاد؟
بدر(بعدم صبر): خلاص أنا صبرت كثير، كلمت عمي رماح من قبل وقال لي اصبر الين يخلص موضوع خلف ونور وهذا هم خلصوا، تكفى يبه
محمد(ابتسم وضربه بخفه على ظهره): والله ما توقعتك كبرت لهالدرجة
بدر(ابتسم وباس يده): يعني راح تكلمهم؟
محمد(هز راسه بالموافقه): انشاءالله

_______________________________
الديرة
بيت العمة ليلى

(عبدالعزيز ماسك كرتون برتقال وجايبه لبيت عمته لانه يدري بحب العنود له، لكن استغرب انه عمته طلعت له وجلس بالصالة وشرب شاي وما بيّنت العنود ابد)

عبدالعزيز(يشرب الشاي وعينه على الدرج ينتظرها تنزل): كيفك يا عمه؟
ليلى(تناظره يراقب الدرج) ابتسمت: الحمدالله، انت كيفك؟
عبدالعزيز(بعدم تركيز): ايه جدي بالرياض ما رجع
ليلى(ضحكت): عبدالعزيز!
عبدالعزيز(ناظرها بعدم استيعاب): سمّي
ليلى(تنهدت بابتسامه): على فكره إذا راح تنتظرها فهي ما راح تنزل
عبدالعزيز(عقد حاجبه بقلق): ليه؟ مريضه؟
ليلى(نفت براسها): لا لكن ما ودها تشوفها هالفترة
عبدالعزيز(تنهد): زعلانه مني؟
ليلى(ضحكت على فهاوته): وش فيك خايف؟ العروسة قبل عرسها بأسبوعين ما تشوف العريس ولا هو يشوفها ليوم العرس
عبدالعزيز(بعبوس وعدم رضى): وش هالخرافات اللي جالسه تسويها! ما راح اشوفها يعني ليوم العرس!؟
ليلى(هزت راسها تشرب الشاي وتبتسم على تعابيره): ايه