لك من اسمك نصيب يانور عيوني وضوى قلبي🤍✨

5

في شوارع الرياض الساعة ١٢:٣٠ مساءا
نور متجهة لبيت ضوى وماوقفت تفكير تحاول تتخيل وش صار عند صديقتها اللي يخليها ما تقدر تنام هالليله ببيتها؟

وقفت عند باب بيت ضوى وطلعت لها شايله بيدها شنطة متوسطة الحجم وحطتها بالسياره وركبت جنب نور تحاول تتمالك أعصابها وماتبكي لكن بس ضمّتها نور انفجرت بالبكاء
نور(بخوف): بسم الله على قلبك! وش سوو فيك؟!
ضوى(بصوت مبحوح):ما يبوني! يبون شهادة يعلقونها بالصالة! يبون اسم يفتخرون فيه بالمجالس بس! ولو يقدرون يحطون لي شنب بعد بيسوونها!
نور(وهي ضامتها بقوة): ياحبيبتي انتي ياعيني، خليه يهدأ هو اكيد بيثور فيك اوّل مايدري بالموضوع! خلي الامور تهدا بينكم بعدها تفاهمي معاه من جديد
ضوى(حاولت تهدا وبعدت عن حضنها): ماعاد بيشوفني زي اول.. نظرته اللي طالعني فيها قبل شوي كسرتني كأني بالنسبه له ولاشي... خفت! لهالدرجة أنا رخيصه عنده؟!
نور: مانتي هينه عنده بس تخصصك كان معلق عليه امال كثيره وخاب أمله... على العموم ترا ما راح أوديك بيتنا لين اغير لك جوّك
ضوى(بتعب): لاتكفين خلينا نروح البيت مالي حيل للدوارة
نور(بعناد): مو بكيفك مابي انام مع وحده مكتأبه!

ضلوا يلفلفون بشوارع الرياض ويفضفضون لبعض لعل وعسى قلوبهم تهدا وينتهي ازعاج افكارهم ومشاعرهم هالليله!
نور بدت تلاحظ انها سلكت طريق سريع بالغلط وانها طلعت عن طريق بيتهم من فترة لكن ما قالت شي ماتبي تربك ضوى اكثر..... بس بعد ربع ساعه ضوى لاحظت الموضوع

ضوى(باستغراب): انتي وين رايحة؟ لنا ساعه ماشين لقدام
نور(بارتباك): الصراحه مدري مشيت لقدام وطلع مافي رجعه وما اشوف ولا علامة تبيّن لي احنا وين!
ضوى(بتعجب):ياسلاااام عليك ياسلااام بتغيرين لي جو قمتي ضيعتينا قلت لك خلينا نروح البيت ما طعتيني الحين وش السواة!؟
نور(توهقت صدق):بدال لا تهجمين علي ساعدينا يلا دوري لنا حل! الطريق مافيه رجعه ومافي شبكة حاولت اشوف احنا وين في قوقل ماب بس ماقدرت
ضوى: بس خلاص
نور(باستغراب): وش اللي بس خلاص!؟
ضوى:بس بكره بالجرايد اوّل خبر بالجريدة (فتاتان تموتان عطشاً بمنتصف الصحراء)
نور(ضحكت):صدق مكسورة وتبرّد! وله يكتبون (هل كانوا هاربين؟ ماهو السر خلف هروبهم؟)
ضوى(ضحكت)وانطقت باللغة العربية الفصحى كأنها ماسكة مايك: السبب هو ناصر!
نور(انفجرت ضحك تمسح دموعها): طيب وش الحل الحين بنجلس ننكت للصباح؟ترا ظلام وانا ما اشوف من الطريق شي

لحظات إلا ويقاطع هدوئهم صوت اصطدامهم بجسم قوي ووقفت السياره مع صوت صرخاتهم العالي برعب! نور يدها ترتجف وضوى مخبية وجهها بيدينها الثنتين! مو عارفين وش صدموا!؟
نور(برعب): ذبحت احد؟!
ضوى(وجهها نشف):نور! صرنا قتلّة!
نور فتحت الباب تبي تشوف وش صدمت لكن ضوى مسكت يدها وسحبتها
ضوى(بخوف): وين بتروحين!؟
نور(بربكة): وش اسوي يعني لازم نشوف حي وله ميت!
ضوى: طيب ننزل مع بعض لا تنزلين لحالك اخاف يطلع حي ويقوم يهجم عليك
نزلوا ثنتينهم بكل هدوء لوسط الشارع اللي ماكان فيه غير سيارتهم.... مشوا لقدام السياره وشافوا جسد رجل مرمي عند السياره جسمه مليان دم من فوق لتحت وبس شافوه صرخوا برعب وضمّوا بعض
ضوى(خبت وجهها بصدر نور): ميتتتتتت! نور ماتتتتتت!!!
نور(متخشبة ومو قادره تتحرك):ذبحته!
ضوى: لازم نتأكد إذا ميت وله لا
نور(وجهها اصفّر): ذبحته!
ضوى(بعد مالاحظت انها مو بوعيها)وخرت عنها وهزتها بيدينها: نور صحصحي! مو وقت اننا ننهار في جثه هنا!