يوم جديد بالديرة
كالعاده صحوا نايف وخلف على صوت رماح وتوجهوا للصلاة فالمسجد بس قبل لا يطلعون ويروحون للمزرعه نايف سمع جده يناديه
نايف وهو متوجه لجده: سم يبه!
رماح مسك كتف نايف ونطق: قبل لا تروح للمزرعه ابيك تمر محلي بالسوق تقول لصادق انه بيبدا يشتغل معكم بالمزرعه عاد شوف انت وين عندنا نقص بالعمال وخله يشتغل فيه
نايف(باستغراب سأل): والمحل مين بيمسكه؟
رماح(ابتسم): لقيت جوهره بتخلي المحل يمتلي بالزباين!
نايف(زاد استغرابه): مافهمت!
رماح (يلعب بمسباحه) : وظفت وحده من البنات اللي جونا امس على الغدا لانها شاطره بالتعامل مع الناس وتعرف تبيع كلام وتاخذ وتعطي
نايف توقع انها نفس البنت اللي كلمه عنها خلف اللي طاح ومحد سمى عليه من شافها، هز راسه لجده:اجل بروح للسوق عشان ما أبطي على المزرعه
رماح: على القوة وانا ابوك
__________
بيت البنات (الساعه٦ الصباح)
رن منبه بصوت غريب عند راس نور صحت وصارت تدور جوالها عشان تقفله لكن الصوت ما كان منه، فصارت تتلفت تدور باللحاف وتحت المخده مالقت شي لين ما ناظرت بالطاوله اللي عند راسها وشافت جوال نوكيا والصوت كان منه! سكرته مع لحظة دخول ضوى لغرفتها وهي لابسه وجاهزه وبكامل إشراقتها
نور(ووجهها مكشر من النعاس): شفيك بسم الله جاهزه من الصبح! وبعدين جوال مين ذا؟
ضوى(بابتسامه تفتح الستاير): قومي صحصحي اليوم اول يوم دوام لنا مانبي نتأخر! الديره ذي تصحى مع صياح الديك!
القت نظره على الجوال وقالت: وهذا جوالك الجديد، ابيك تقفلين جوالك القديم وماعاد تشغلينه اخاف الشرطه يتتبعون جوالاتنا ويعرفون حنا وين!
نور ( قفلت جوالها القديم وشالت منها الشريحة)ونطقت بسخرية: ومالقيتي اجدد من نوكيا؟
ضوى: بلا فلسفه! نحتاج كل ريال عندنا ماراح اشتري لك اجدد ايفون، اللي نحتاجه هو جهاز للتواصل وبس
قامت نور بكسل من السرير وتجهزت ونزلت تحت شافت ضوى مجهزه لهم فطور فجلست تاكل معاها
نور(وهي تمضغ): طيب انتي وبتروحين المحل أنا وش اسوي؟ مابعد اتفق مع البنات ولا قابلتهم
ضوى(تصب لهم شاي):روحي للخالة نورة وخليها توديك للبنات
نور(بصدمه): ضوى اروح لهم من الصبح!؟
ضوى(ابتسمت): تدرين انك بالنسبه لهم كأنك صاحيه العصر؟ هالوقت الكل صاحي ويشتغل ويطبخ وينفخ
بعد ما خلصوا من الفطور طلعت ضوى وتوجهت لمحل رماح وبس وصلت شافت شخص واقف عند باب المحل ويلعب بكرة صغيره بيده
ضوى: مين انت؟
نايف(صد بعيونه حاس انه بيخون صديقه لو ناظرها): انتي الجوهره؟
ضوى(باستغراب): مين الجوهرة أنا اسمي ضوى
نايف: اقصد الجوهرة اللي يقول رماح انه لقاها وانها بتزيد زبايننا
ضوى(انحرجت من كلام رماح عنها): شدعوه كل هالتصعيد لي؟
نايف( وهو للحين صاد): اجلسي داخل ورتبي الاغراض لين ما يجيك جدي يشرح لك اكثر عن المحل
ضوى:تمام
__________
نور توجهت لبيت رماح، دقت الباب واستقبلتها نورة بالتراحيب وقلطتها للصالة
نور(بإحراج): اعذريني والله يا خالة جايتك من الصبح!
نورة(بابتسامه): لا ابد ترا هذا وقتنا بالديره الكل صاحي من صلاة الفجر
نور: ايه ماشالله! ابي اسأل بس لو تقدرين تتواصلين مع البنات اللي تبوني ادرسهم عشان نضبط اوقات دروسنا ونتفاهم بكل شي؟
نورة( قامت عشان تدق على نجد "ام خلف"): ابشري دقايق بس!
بعد دقايق رجعت لها نورة للصالة: يابنيتي تقدرين تروحين عندهم الحين بالبيت بدرية تنتظرك هناك وبتجيكم سارة بعد
نور(بتساؤل): وين بيتهم؟
نورة: ابد البيت اللي جنبنا جهة اليسار على طول الجدار بالجدار
نور:تمام، يعطيك العافية يا خالة
نورة(بابتسامه مسكت يد نور ونطقت): الله يعافيك ولاتبخلون عني بالزيارة انتي وضوى تونسوني بجيتكم والله
نور(ابتسمت من الحفاوة اللي حست فيها):تأمرين امر
_________
بيت خلف
أنت تقرأ
لك من اسمك نصيب يانور عيوني وضوى قلبي🤍✨
Romanceفتاتان هاربتان من ظلم الحياة ذاهبتان إلى قرية لنسيان ما مروا به حتى تهدأ الأمور في حياتهم لكن حدث مالم يكن بالحسبان والتقوا بمن سيغير مجرى قصتهم🤍
