لك من اسمك نصيب يانور عيوني وضوى قلبي🤍✨

73

اليوم الثالث لعزاء الجدة نورة في الديرة
بيت رماح

(نور وضوى ما رجعوا للرياض وضلوا مع اهل نايف وخلف، البنات كانوا يساعدون ليلى والبنات بعزاء الحريم وما كانوا يقصرون بأي شي)

ليلى(ماسكة راسها بتعب من البكاء)بصوت مبحوح: نور
نور(اقتربت منها بسرعه): هلا
ليلى(بلعت ريقها)تناظر الناس اللي دخلوا يعزونهم: جهزتوا القهوة؟
نور(هزت راسها): اي لا تشيلين هم، البنات كلهم بالمطبخ وبروح الحين اجيب المويا
ليلى(هزت راسها بهدوء تناظرها تروح المطبخ) بين نفسها نطقت: جعل اليد اللي ربتكم ما تمسها النار
ضوى(طلعت من المطبخ تصب القهوة)ترد عليهم: اجرنا واجرك

(في المجلس، عزاء الرجال)

(نايف جالس بهدوء بالزاوية وكان لسّه مو مستوعب اللي صار، خلف وعبدالعزيز كانوا قايمين بالواجب مع الناس)

خلف(سمع صوت دق الباب من جهة الحريم وتوجه له): سمي
نور(مدت له الدلة): سويت قهوة جديدة اكيد خلصت من عندكم
خلف(اخذها وعطاها الدلة الثانيه): اي والله خلصت من شوي
نور(هزت راسها): بس تخلص من عندكم قول لي، وش اخبار نايف؟
خلف(تنهد بضيق): على حاله جالس بالزاوية وما يرد علي إلا بكلمة او كلمتين
نور(نزلت راسها): استغفرالله، اكيد حاس بالذنب لانه ما كلمها بطريقة كويسة قبل وفاتها
خلف(تأفف ومسك راسه): أنا تعبت وودي امشي للرياض اليوم قبل بكرة ما اقدر اتحمل اجواء الدفن والعزاء والحزن اكثر من كذا
نور(مسكت يده): تذكرت عزاء ابوك صح؟
خلف(ناظرها لثواني وهز راسه): تفهميني اكثر مني
نور(تنهدت): اجيب لك بندول؟
خلف(بهدوء): ايه ولا عليك امر

_______________________________

(يوم جديد)
بيت رماح

(بعد انتهاء العزاء، رجع الوضع الطبيعي للبيت تقريبا، رغم الحزن والهدوء المنتشر بينهم، جالسين على سفرة الفطور)

رماح(ياكل من الخبز): راجعين للرياض بكرة؟
خلف(ناظر نايف): أنا ونور وبدرية ماشين لكن ما ادري عن نايف وضوى
نايف(يشرب الشاي بهدوء) نطق من غير ما يناظرهم: ايه
بدرية(تنهدت):جدي ماودك تجي معنا؟
رماح(نفى بيده): لا ما اترك بيتي ومزرعتي، أنا انتظركم تزوروني متى ما بغيتوا حياكم الله
عبدالعزيز(نطق بهدوء): العنود تجهز اغراضها ببيت عمتي، ان شاء الله على المغرب ماشين ومعانا رغد
خلف(عقد حاجبه): اليوم!؟
عبدالعزيز(هز راسه): اي، ورانا ترتيب البيت و لازم نقضي له اغراض
نايف(قام من مكانه وتوجه لغرفته): سفرة دايمه
رماح(هز راسه يمين وشمال): لاحول الله، ما تكلمت معه يا خلف؟
خلف(تنهد): والله وش اقول لك، إذا جلست اتكلم معاه يعطيني قفاه ويمشي، يمكن إذا رجعنا للرياض يصير احسن

________________________________

(بيت البنات)

(كانوا جالسين على طاولة الطعام يفطرون مع بعض إلى ان وصلت لضوى رسالة من نايف)