لك من اسمك نصيب يانور عيوني وضوى قلبي🤍✨

28

يوم جديد بالديرة

بيت العمة ليلى
(فتحت عينها تناظر السقف خذت نفس تتذكر انه اول يوم يبتدي وهي مخطوبة،ابتسمت بحياء تخبي وجهها بيدينها بعدها بعدت يدها تناظر الخاتم اللي لبّسها اياه امس، شافت رسالة منه وصلتها بالجوال)
سارة(ابتسمت)تقرا الرسالة:صباح الخير يا اجمل عطايا ربي لي، لو صحيتي صبحي علي بصوتك

(اوّل ما انتهت من قراية الرسالة وصلها اتصال منه، بلعت ريقها بتوتر تحمحمت)
سارة(بحياء):الو
فهد(ابتسم)يتنهد: حتى وانتي توّك صاحيه صوتك يجيب العافيه!
سارة(ابتسمت):كيفك؟
فهد(اخذ نفس عميق):ما اظن اني قد قمت من نومتي وانا مرتاح كثر اليوم، احس اني فايز بأعظم انتصاراتي
سارة(تحمحمت)بارتباك: فهد!
فهد(ضايع بصوتها):عيونه!
سارة(عضت شفايفها):لاتكثّر كلام حلو
فهد(تنهد)يضرب على جهة قلبه:ادري انك تستحين بس اللي يسمع صوتك يستحي ما يقول هالكلام
سارة(تلعب بمفرش السرير تحاول تهدي أعصابها)ماردت عليه
فهد:انتي مبسوطة انك معي؟
سارة(ابتسمت)تقلد كلامه:احس اني فزت بأعظم انتصاراتي
فهد(ضحك):والله شكلي بتعرف على شخصيتك من جديد بهالفترة!
سارة(بخجل)بهدوء:أنا بس ارتاح للشخص اعبر عن شخصيتي اكثر، يبغى لي وقت
فهد(ابتسم):لك كل الوقت
____________
عند البنات

(صاحين من الصبح يجهزون اغراضهم وشنطهم بهدوء، ضوى مانامت زين بسبب التفكير باللي سمعته من نايف امس، نور اللي لها ثلاث ايام مانامت بسبب الأرق اللي ملازمها)

نور(تحط الشنط بسيارتها):ضوى! وين شنطتك؟
ضوى(طلّعت لها الشنطه)تاخذ نفس بتعب: بس باقي كيسين
نور(هزت راسها):جيبيهم
(ضلوا يرتبون اغراضهم إلى ان صار البيت فاضي من اغراضهم اللي كانت بكل مكان،ناظروا بالمكان نظرة اخيره وخانتهم دموعهم بهاللحظة)
ضوى(تمسح دمعتها): ماراح ابكي لانه احتمال ارجع له
نور(خذت نفس):بشتاق لهالبيت حيل!
ضوى(ابتسمت): لو تفكرين بكل اللي مرينا فيه تحسّين انه كان فلم وانتهى
نور(ضحكت)تمسح دموعها:صدق! الناس اللي تعرفت عليهم هنا مستحيل اني أنساهم
___________
بيت رماح

(نورة تبكي وتودع خلف ونايف قبل لا يطلعون من البيت)
رماح(يتأفف): ترا ماهم برايحين لامريكيا! قريبين
نايف(يضحك)يحضن نورة:والله يا يمه بنروح نسوي مقابلات ان قبلونا استقرينا هناك
خلف(يمسح على كتف نوره):وعد كل ما دقيتي علي وقلتي لي تعال لا اطق طريق للديرة حتى لو كان الفجر!
نورة(تمسح دموعها):والله هالرياض مايجي منها إلا البلا، وعد يا خلف تجوني متى ما بغيت؟
خلف(بأشر بالسبابه على خشمه):على هالخشم!
رماح(باستعجال):يلا يلا لا تبطون عليهم امشوا جميع احسن
نورة(باستغراب):جميع؟
نايف:اي يمه البنات بيروحون للرياض فقررنا نمشي وراهم بسيارتنا نتطمن عليهم تدرين انتي الطريق مهوب سهل
نورة(بعدم إعجاب هزت راسها): ايه ايه درب السلامه