لك من اسمك نصيب يانور عيوني وضوى قلبي🤍✨

52

يوم جديد في الرياض (الساعه ٣ العصر)

بيت محمد (ابو بدر)

نور(كانت تتجهز ولاحظت اتصال من بدرية): هلا يا قلبي
بدرية(بإحراج): هلا نور كيفك؟
نور: الحمدالله بخير، فيك شي؟
بدرية(بهدوء): خلف راح مكان المسابقة من بدري فما عندي احد يوصلني واستحي اروح مع نايف لحالي
نور(بابتسامه): افا عليك! بمر ضوى وبعدها اجيك
بدرية(بابتسامه وراحه): يا بعد حيي والله مشكورة
نور(تضحك): بنت! عيب عليك تشكريني هذا وانا كل يوم آخذك معي الجامعه
بدرية(تبتسم): متى لازم اكون جاهزة؟
نور(تناظر الساعه): أنا جهزت الحين وبروح عند ضوى يعني نص ساعه بالكثير واكون عندك
بدرية(هزت راسها): زين يلا أشوفك بعدين
نور: مع السلامه

______________________
في شوارع الرياض

(نور واقفه عند بيت ضوى تنتظرها تطلع، تأخرت عليها)

نور(تتأفف وتطقطق أصابعها بالدركسون لين طلعت ضوى): ساعة يابنتي ساعة!
ضوى(ركبت السياره تتنهد بعصبيه): ترا واصلة معي لين هنا كنت بأخر دقيقه بكنسل واجلس بالبيت
نور(عقدت حاجبها وهي تسوق):ليه انشاءالله وش صاير؟
ضوى(تاخذ نفس): من الصباح وانا اراكض ورا امي أقنعها بالزواج وما تعطيني رد
نور(تبتسم): ابوك وده يرجع لها!؟
ضوى(ناظرت نور باستغراب): ابوي؟
نور(بعدم فهم): اجل مين تقصدين؟
ضوى(بإحساس بالذنب): أنا ما قلت لك عن جيراننا الجدد؟
نور(رفعت حاجبها): اها في سوالف ما انقالت لي حلو
ضوى(تأففت): وش اسوي لك؟ لك اسبوع منقلب حالك، لو ما كان فيه مسابقة اليوم كان ما اتصلتي علي
نور(تنهدت لانه ضوى معاها حق): اسفه صح أنا صارلي فترة ما كنت فيها على بعضي
ضوى(تبتسم وتمسك يد نور): بس الحين رجعتي لي
نور(بابتسامه تناظرها): ورانا جلسة سوالف بعد المسابقه على فكرة!
ضوى(تضحك بخفه): قدام!

_______________________
نادي الفروسية (الساعة ٤:٣٠)

(خلف كان بالإسطبل يجهز ليل ويلبسها السرج وينظف شعرها، كان اول المتواجدين بالنادي بسبب حماسه، بعد فترة من الوقت بدأ يسمع اصوات الناس اللي ملت مقاعد الجلوس حولين المضمار)

(كان خلف لابس ملابس ركوب الخيل وكانت عبارة عن سروال اسود ضيق مع تيشيرت رياضي وفوقه جاكيت وبيده ماسك الخوذة، ناظر جواله لقى اتصال من نور)

خلف(ابتسم ورد عليها): وصلتي؟
نور(بابتسامه تحاول ما توضح لبدرية هوية اللي تكلمه): اي
خلف(طلع من الغرفه يناظر حول الكراسي من بعيد): اي جهة؟
نور(تحمحمت):أقصى اليسار، معي البنات
خلف(اتسعت ابتسامته من لاحظها بين الحضور):جنبك اختي؟
نور(بهدوء تناظر بدرية وتشتت نظرها):اي
خلف(ضحك بخفه): عشان كذا مو ماخذه راحتك بالكلام
نور(تنهدت): اي
خلف(بابتسامه لعوبه): طيب احبك
نور(اختفت ابتسامتها وتوجهت نظراتها لبدرية لا اراديا، خافت لا تسمع صوت دقات قلبها)همست له: بالتوفيق
خلف(يهمس لها بنفس نبرتها)نطق قبل لا يقفل:شجعيني!