لك من اسمك نصيب يانور عيوني وضوى قلبي🤍✨

10

الرياض(مر على اختفاء البنات ثلاث ايام)
بيت ابو بدر

من اختفت نور ودلال حاسّة بتأنيب ضمير لانها نامت ذيك الليله وبنتها برّه ولما صحت ما لقتها، بهالثلاث ايام مانامت اربع ساعات على بعضها ولا تاكل زين...كل تفكيرها ببنتها، عقلها يرسم اسوأ السيناريوهات ممكن تكون ماتت وممكن انخطفت وممكن وممكن....وبالجهة الثانيه محمد صارت الشرطة بيته الثاني كل يوم رايح جاي يسألهم إذا لقوا اي شي ممكن يوصلهم لبنته!

دلال خذت لها حبّة منوِّم بالغصب من قمر ونامت بعمق لاول مره من بعد اختفاء نور
قمر(وهي تناظر امها اللي اختلفت حالتها عن قبل):مادري وش بيصير اكثر من كذا يا بدر! امي مو امي الأولية وابوي بعد
بدر(يحك راسه بتعب): أنا بس ابي افهم شلون بنتين يختفون وكأن الارض بلعتهم!
قمر(تنهدت): شي يفك المخ والله، ماعندهم جوازاتهم ولا قدروا الشرطة يتعقبون جوالاتهم مالقينا غير كم لقطة من الشوارع اللي مرت فيها سيارة نور ومو مره واضحين
بدر(يناظر أدوية امه على الطاوله اللي جنبه):أنا امي مخوفتني
صايرة ما تتكلم إلا إذا تسأل ابوي عن اللي قالوه الشرطة او كلمات بسيطه
قمر(تنهدت): ام ضوى كل يوم تكلمني بعد تسأل لو فيه خبر، ابو ضوى أخباره ما تسّر لانه حاس بالذنب نفس حالة امي
___________
بيت ضوى

شادن(تتحايل على ناصر عشان ياكل): يا ناصر ماينفع من امس ما اكلت شي!
ناصر(بوجهه الذابل): ما اشتهي
شادن(بدت عيونها تلمع من الدموع اللي حابستها): إذا مو عشاني عشان ضوى!
ناصر(دفع الصينية وطاح الاكل بالارض)بعصبية:لاتكلميني كأني بزر! أنا تعبان خليني بروحي يرحم امك وأبوك!
شادن(بكل هدوء قامت وشالت الصينيه وطلعت وهي تبكي)
ناصر (طلع للبلكونه يشرب سيقاره واتصل على احد)ونطق: لقيت شي؟
المجهول: لقيت لقطه بس مو واضحه يبيلي وقت عشان أوضحها
ناصر( ياخذ نفس من السيقاره) وهز راسه: كم يبيلك؟
المجهول:يمكن اسبوع
ناصر:تمام، إذا لقيت شي جديد اتصل فيني على طول!
المجهول:حاضر
سكر من الاتصال ونطق بهمس: بلقاك وين بتروحين مني؟
__________
يوم جديد بالديرة

كالعاده خلف ونايف بالمزرعه وكل واحد عند شغله لين ما سمعوا صوت مألوف بالنسبة لهم
خلف( من شاف صاحب الصوت مقبل عليهم): ارحبوووا!
نايف(ضحك وقرب لهم وضم الشخص): يا ورع يا فهد اشوفك سحبت علينا وغطيت!
فهد(يضحك من استقبالهم له وشرهتهم): لا والله؟ أنا اللي سحبت وله انتم اللي اختفيتوا ورحتوا الرياض بدون لا تعلموني!
خلف (يضربه على ظهره): والله نسيناك، ما شفنا قدامنا من وافق رماح على دراستنا ما صدقنا خبر وطرنا للرياض

سحبوا معاهم فهد وجلسوا بجلسة موجوده بالمزرعه يسولفون وزينوا لهم الشاي
نايف(بتساؤل): اجل درست هندسة؟
فهد(يشرب شاي)ابتسم: اي نعم! معاك المهندس فهد بن صقر
خلف(ابتسم): والنعم!
فهد:ينعم بحالك، وأنتم الحين ماخذين شهادة وش كبرها اخرتها تشتغلون عند الغنم ليه؟
نايف(نزل راسه): لاتقلب المواجع وانا اخوك
خلف(يمثّل انه يبكي ويمسح دموعه):أوامر رماح يا فهد!
فهد(يضحك):والله هالشايب لاعب فيكم لعب
سمعوا صوت خلاهم كلهم يوقفون على رجلهم:مين الشايب يالتعبان!
نايف(وقف من الخوف): يبه!
رماح(بعصبية): وحطبه! تاركين الشغل وجالسين تتقهوون ماشالله
خلف(يبرر): لا والله بس عشان لما فتره ما شفنا فهد قلنا نجلس معاه شوي
رماح: ومين يكون فهد؟ شخص مهم لدرجة انكم تتركون الشغل وتقهوونه؟
فهد(توتر)باس راس رماح: حقك على راسي يا عمي مره ثانيه أجيهم البيت! يلا مع السلامه
خلف (يهمس لنايف): انحاش الخواف!
نايف: شفت انه ورع
رماح(يشوفهم يتهامسون): لا والله، لين متى بتبربرون ؟
صرخ عليهم: يلا كل واحد على شغله!
خلف ونايف(قبل لا يروحون باسوا راسه): سم!
__________
عند البنات