لك من اسمك نصيب يانور عيوني وضوى قلبي🤍✨

15

يوم جديد بالديرة

بعد ما طلعت ضوى لشغلها اتصلت نور على بيت بدرية تقترح عليها انها تعطيهم الدرس ببيتها اليوم
بدرية(باستغراب):ليه؟ دايم ناخذ الدرس عندي بالبيت
نور(ارتبكت):لا مافي شي بس يعني كتغيير تعالوا عندي اليوم
بدرية(بتفهم):تمام،مافي مشكله
نور: يلا انتظركم! كلمي ساره وتعالوا
سكرت نور من الاتصال وتنهدت هي ماتبي تصادف خلف بالوقت الحالي بعد اللي صار معاهم امس
________
بيت خلف

بدرية تتجهز عشان تطلع وقت اللي شافها خلف وهو طالع للمزرعه
خلف(بأستغراب):على وين؟
بدرية(تلبس طرحتها): اليوم بناخذ الدرس ببيت نور
خلف(تأفف لانه حس بأنها ماتبي تصادفه حتى): ليش ما جت هي؟
بدرية: مدري تقول تغيير
طلعت بدرية تتوجه لبيت نور وخلف حس بضيق من كل الي قاعد يصير وراح للمزرعه
________
السوق

ضوى من دخلت المحل وهي تتجاهل نايف واذا تمسك شي تحطه بقوه على الطاوله من عصبيتها اللي تحاول تكتمها
نايف(باستغراب من تصرفاتها): انتي شبلاك اليوم؟
ضوى(ناظرته بطرف عين):مافيني شي!
نايف(بإصرار): لا، فيك وما اتذكر اني مسوي شي يعني
ضوى(بعصبيه): ولد عمك اللي مسوي!
نايف(عقد حاجبينه): وش سوا لك؟
ضوى(انفجرت عليه): انت اكيد تدري عن اللي صار بينه وبين نور امس! اللي نامت ودمعتها على خدها
نايف(تنهد من عرف الموضوع): وش تبينه يسوي يعني؟
ضوى(رفعت حاجبها): وش ابيه يسوي!
نايف(بتأكيد): ايه، يعني امي نورة حطت رضاها عنه بكفه وتدريبه لنور بكفه وش بيختار مثلاً؟
ضوى: يعني كل اللي صار من تحت راس جدتك نورة؟
نايف: من كلام الناس بعد
ضوى(تأففت): ناس ملاقيف وماعندهم حياة يجلسون يراقبون هذا وين راح وهذا مين يكلم! ناس فاضيه قسم بالله!
نايف(تنهد): صادقه
ضوى: نور تحب الفرس اللي اسمها ليل، ماتقدر تروح تشوفها حتى؟
نايف(يكلم نفسه): نور همها فرس وخلف بيموت ويشوفها ماعندها دم قسم بالله!
نايف: خلي موضوعهم ينحل اول بعدين نشوف حل هالسالفه
ضوى(هزت راسها بالموافقه)
نايف(ابتسم وناظرها): انتبهتي انه اول حوار طبيعي يصير بيننا؟
ضوى(ضحكت بسخريه): هذا لانك احترمت نفسك
نايف: شقصدك؟ أنا مو محترم؟!
ضوى: والله اللي على راسه بطحة يحسس عليها، أنا ماقلت كذا
نايف(بعصبيه): هذا قصدك بس تستهبلين على راسي
ضوى(بصدمه): استهبل! ياعمي طير

دخلوا بنقاش طويل وعريض ماله اي فايده إلى ان هدأو وكل واحد رجع لشغله
_________
بيت البنات

بعد ما خلصوا الدرس ورجعوا البنات لبيوتهم نور جلست ترتب المكان اللي كانوا جالسين فيه وغسلت الصحون
نور(وهي تغسل سمعت صوت):بسم الله الرحمن الرحيم! وش هالصوت
(رجع الصوت يطلع بخفه)
نور(عقدت حاجبينها واتجهت باتجاه الصوت اللي وصلها لنافذة غرفتها وصوت الطرق كان عباره عن ثلاث طقات متتاليه)
نور حطت شال على راسها وفتحت النافذه شافت شخص متلثم وصاد
نور(باستغراب): مين انت؟
لف عليها خلف وفتح لثمته: ابي اكلمك!
نور(بعد ماعرفته عقدت حاجبينها): جايني مثل الحرامي عشان تكلمني؟
خلف(تنهد): يابنت الناس انتي امس ما عطيتيني فرصة اتكلم واشرح موقفي
نور(تأففت): انطق!
خلف: أنا ما ارضى انه الناس يتكلمون فيك بالشينه ولو كان اللي يكون! عشان كذا قلت نسكر هالباب، ماهي نهاية الدنيا إذا مادربتك هالفتره
نور(تكتفت): تبي تفهمني انه الناس بيتكلمون فتره ويسكتون؟
خلف(بتأكيد): ايه، الديره كبر كف اليد اخرتها بيملون ويدورون غيرنا يتكلمون فيه
نور(باقتناع): زين ووش عندك غير هالكلام؟
خلف: مايهموني الناس أنا بس اهلي يهمهم! ولو تبيني أزعل الناس كلهم لأجل أرضيك حاضر
نور(ابتسمت): لسانك لسان شاعر ما اقدر ارد عليه
خلف(ابتسم): وانتي ماتحسين انه في شي لازم تعتذرين عنه؟
نور(تذكرت ردة فعلها امس): اسفه اني سكرت بوجهك الباب
خلف(تلفت حولينه ماشاف احد):تجين معاي؟
نور(باستغراب): وين؟
خلف(تنهد): لو لمره وحده بحياتك لا تسألين ليه ووين!
نور(تخصرت): هذا اسمه اختطاف!
خلف(ضحك): البسي عباتك وتعالي لي ورا المزرعه
(راح خلف بدون لا يسمع رايها، تأففت تلبس عباتها وطلعت)
______________
بيت العمة ليلى

دخلت ساره البيت بعد ما كانت ببيت نور وشافت العنود تتجهز
سارة(باستغراب): ليه تتجهزين؟
العنود(ناظرتها وهي تلبس سلسالها):كنت انتظرك، حياة عازمتنا ببيتهم!
سارة(بارتباك): لا ما بروح معاك!
العنود: ليه! ترا آخر مره ماجيتي معاي بتزعل منك
ساره(تأففت): خلاص طيب
______________
بيت صقر(ابو فهد)

حياة استقبلت العنود وساره وقلطتهم للصالة
حياة(بعتاب): تدرين لو ماجيتي كان زعلت منك
العنود(ضحكت): قلت لها والله!
سارة(ابتسمت): لا مايرضيني زعلك
حياة: إلا بسألكم بنات! عرفتوا مين اللي يحبها خلف؟
سارة(باستغراب): اللي عرفته من بدرية انه مايحب بس كذا يكتب شعر
حياة: لا، الناس شاكين في بنت لانها تروح مزرعة رماح كل يوم!
العنود(بتفاجؤ): اي بنت!؟
حياة(رفعت يدها بعدم معرفة): وحده من البنتين اللي ساكنين جدد عرفتوهم؟
ساره(بصدمه): نور وضوى!؟ انتي متأكده؟
حياة: والله ما اعرف اسمائهم بس هذا اللي يقولونه اهل الديره
العنود: البنات محترمات مايطلع منهم هالسوالف!
سارة: صح! حرام هاذي اعراض ناس مفروض نتأكد قبل لا نفتي
حياة: والله مو انا اللي اقول هذا اللي وصلني أنا ما اعرفهم ولا قد شفتهم الله يستر علينا وعليهم
سارة( ماكان عاجبتها الاجواء وقررت انها تسكت لين يمشون)

دخل فهد البيت ولما سمع اصوات البنات جايه من الصاله تنحنح عشان يمر من عندهم ويروح لغرفته، تغطوا البنات ومر فهد وهو صاد راح لفوق بس مادخل غرفته وقف عند الدرج يبي يتأكد إذا صوت ساره بين هالبنات او لا
حياة(بفضول لانها شاكة باهتمام اخوها فيها):سارة!
سارة: هلا
حياة: عندي فضول اعرف مواصفات فارس أحلامك
سارة(بحياء) توجه نظرها على كوب الشاي اللي بين يدينها: وش طرا عليك بهالاسئله!؟
حياة: عادي يعني مثلا أنا أتمناه طويل وأسمر
العنود(بحماس): ومعضل!
سارة(ضحكت على أجوبتهم السطحية): همكم الشكل بس!
حياة: طيب قولي لنا وش الشي الأهم بالنسبه لك؟
(سارة تفكر بجوابها ماتدري عن اللي ميت فوق ينتظر إجابتها)
سارة (بتفكير): ممممم... يكون مخلص، مثقف وكلامه موزون ومرتب
حياة(باستغراب): وش قصدك بمثقف؟
سارة(بحزن): يكون جامعي! اتمنى بعد لو يخليني اكمل وادخل الجامعه
فهد واقف يسمع جوابها اللي خلاه يتنهد: والله تاخذين الشهاده!
_____________
بالسوق

ضوى لاحظت انه جوال نايف ماسكت، كل شوي توصل له رساله ويطلع صوت
ضوى(بانزعاج): ترا جوالك مزعج!
نايف(تأفف وراح طفى جواله ورماه)بعصبيه: استغفرالله!
ضوى(انصدمت من ردة فعله)بهدوء: شفيك؟
نايف(جلس يمسح على وجهه): مافيني شي
ضوى(جلست جنبه): قول ترا ممكن أساعدك إذا عندك مشكله
نايف(ناظرها وتنهد): رسايل توظيف
ضوى(باستغراب): توظيف ايش؟
نايف: وظايف تناسب شهادتي
ضوى: شهادة الثانوي؟
نايف(بصدمه ضحك): شهادة البكالوريوس ادارة اعمال!
ضوى(بصدمه توسعت محاجر عيونها): انت عندك شهادة ادارة اعمال!!
نايف(ابتسم):ايه، ليه طايح من عينك؟
ضوى(بلعت ريقها): لا بس ماتوقعت، ليش تشتغل هنا دام عندك شهادة بتخصص مطلوب؟!
نايف(بسخرية): رماح مايهمه تخصص مطلوب او مو مطلوب، وعدناه لو خلانا نكمل للجامعه بنشتغل عنده كثر سنين دراستنا والحين بنعلق عنده ٤ سنين
ضوى(بصدمه): وش هالوعد الغبي! ماتفكرون انتم!
نايف(تنهد): كان كل همنا الشهاده وبس
ضوى(بتفكير):وكيف جالس يوصل لك عروض توظيف؟ انت مقدم عند شركات؟
نايف: لا بس جامعتنا تقدم لنا على وظايف عند الشركات اللي ممكن يحتاجوننا عشان كذا كل يوم يوصلنا رسايل منهم
ضوى: مممم... خلني اقلب الموضوع براسي لين القى حل