لو عرفتموه (الجزء الثاني 💜) مكتملة

45💜

يلا صلوا على النبى
حصار قريش لبنى هاشم"قبيله رسول الله"(ج4) و"عام الحزن"موت عم النبى وحبيبته خديجة رضي الله عنها..

وبعد ما هشام بن عمرو جمع 4 اشخاص عشان يشوفوا حل لموضوع حصار بنى هاشم ..كانوا كفار لكن رفضوا أنهم ياكلوا ويشربوا و بنى هاشم تموت من الجوع .. و بدأ هشام بن عمرو يحط خطه و تانى يوم الصبح راحوا كلهم عند الحرم واتفقوا يوقفوا متفرقين يعنى كل واحد فى ناحيه عشان يبان انهم مش سوا.

وفجأه وقف هشام بن عمرو وقال: ايها الناس هذه صحيفة ظالمة إلى متى نأكل و نشرب وتموت بنى هاشم..أليسوا من أمتنا ؟
فيرد عليه واحد من ال4 واقف ع اليمين ويقول : صدقت و يرد الثانى يقول: بلى من أمتنا...و التالي يقول صدقت..همه بيعملوا ايه ؟ همه بيعملوا رأى عام ،كأن كذا حد رافض الوثيقه الظالمه..

فيبص لهم أبو جهل و يقول: والله هذا أمر سويتموه بالأمس (هو حس ان دول ناس متفقين بس خلاص الناس اجتمعوا و بدأت تقول هذه الوثيقه ظالمه.. ظالمه)وفى وسط الحصار ينزل سيدنا جبريل على النبى صلى الله عليه و سلم و يقول: يا محمد إن الله قد سلط الأردة (يعنى الدوده ) على الصحيفة فأكلت كل البغى (الظلم) الذى فيها إلا كلمة "باسمك اللهم" .. ويقول النبى الكلام ده لعمه أبوطالب..

فيروح ابو طالب و يقول:يا معشر قريش ان ابن اخى اخبرنى ان ربه قد سلط "الاردة" (الدودة) على الصحيفة فأكلت كل البغى الذى فيها إلا كلمة " باسمك اللهم" و يا معشر قريش افتحوا الكعبة و انظروا إلى الصحيفة فإن كان محمد صادقآ فانتهوا عن المقاطعة و الحصار وإن كان كاذبآ نسلمكم "محمد"..فقالت قريش : "صدقت يا ابو طالب"

و وافقوا و فعلا راحو يفتحوا الكعبه و يبصوا على الصحيفة فيلاقوا الدود بياكل فى الصحيفه ويمشى و يمشى لحد ما يجى عند كلمة باسمك اللهم يقوم سايبها ولافف حولها ويكمل وياكل ويوصل عندها تانى فيعديها تانى..فقريش اتصدمت وقالت :هذا من سحر محمد ..فقال ابو طالب: صدق ابن أخى.. فلتنتهى هذه المقاطعة!!! و تخلص المقاطعة و ينفك الحصار.. قال تعالى: وَمَا يَعْلَمُ جُنُودَ رَبِّكَ إِلَّا هُوَ ،،سبحان الله كأن ربنا رايد يقول لنا أنا أقدر بدودة أعمل اللى جيش كبير مايقدرش يعمله" وبعد ما اتفك الحصار الحمدلله .. حصل شئ لا عالبال ولا عالخاطر :') ..حصل إيه؟

ابو طالب بيموت ابو طالب تعب ..عنده 80 سنة و يحزن النبى عليه الصلاه والسلام حزن شديد أوى.. ولما النبى يعرف ان ابو طالب بيحتضر يجرى على بيته و يدخل عليه و يقول له:"يا عمى يا عمى قل كلمة واحدة احاج لك بها عند ربى.. و يبكى (النبى بيطلب من عمه انه يقول لا إله إلا الله عشان يقدر يشفع له عليه الصلاه و السلام يوم القيامه)..

ففجأه يقول ابو جهل: يا أبا طالب أترغب عن ملة ابيك؟!! (انت حتسيب دين آبائك وأجدادك!!!*شايفين أصدقاء السوء
فيبص ابو طالب للنبى و يقوله : يا محمد انى والله لأسرع الناس لما تحب (انا اكتر حد يحب يفرحك :') ) و لكن لن ارغب عن ملة آبائى..فيبكى النبى اكتر و يقول :يا عمى ارجوك قل كلمة واحدة .. قل لا اله الا الله قل كلمه أحاج لك بها عند ربى..فيرد عليه ابو طالب و يقول :يا بنى أريد أن اقولها و لكن اخشى ان تعايرنى بها العرب بعد موتى..

و مرضيش ابدا يسيب مله ابوه عبد المطلب ويموت ابو طالب ويبكى النبى بكاء شديد جدا ..وتنزل الأيه الكريمه قال تعالى: إِنَّكَ لَا تَهْدِي مَنْ أَحْبَبْتَ وَلَٰكِنَّ اللَّهَ يَهْدِي مَن يَشَاءُ وَهُوَ أَعْلَمُ بِالْمُهْتَدِين.. ابو طالب اختار يموت على الكفر ..دلوقتى ربنا ثبت النبى بالقرآن لكن للأسف بعد 7 ايام حتحصل حاجه كمان..خديجة بتموت...يااا ..دا ابو طالب كان الضهر بره البيت و خديجه كانت الحضن جوه البيت! ❤

لحظة الوفاة, ورأس خديجة على صدر النبى عليه الصلاة والسلام, ويمسح على راسها ويدعى لها بالشفاء ينزل جبريل عليه السلام فيقول جبريل: "يا رسول الله أقرىء خديجة من ربها السلام", فيقول الرسول: "يا خديجة إن الله يقرئك السلام" ,فتقول: "هو السلام ومنه السلام وعليه السلام وعلى جبريل السلام". و جبريل قال :" يا رسول الله بشر خديجة بقصر فى الجنة لا نصب فيه ولا وصب", ثم يستئذن ملك الموت فى الدخول, وتموت السيدة خديجة, ويبكى النبى بكاءً شديداً... يااا قصر فى الجنه لا فيه تعب و لا حزن! ..
فاكرين قد إيه تعبت قى الدنيا و هيه طالعه الغار فوق جبل عالى رغم سنها الكبير عشان تطلع لحبيبها النبى الأكل و المايه ..خلاص يا خديجه مفيش تعب تانى ..

فاكرين لما دخل عليه الصلاه و السلام عليها وقال زملونى زملونى فغطته خديجه و حضنته حتى سكن :') وبقى هادى بعد ما شاف جبريل لأول مره.. فاكرين لما ثبتت النبى ان اكيد اللى شافه ده خير مش شر وقالت: لا والله لا يخزيك الله أبدا إنك لتطعم الطعام وتكرم الضيف و تعين على الحق.. مااتت خديجه وبقى دايما النبى يقول : "لقد رُزقت حبها". وكان كل ما يذبح ذبيحة يشيل منها جزء لصاحبات خديجة, كان نعم الزوج الوفى لزوجته.

ويوم فتح مكة فاكرين لما كان النبى مشغول جداً فى مبايعة القبائل على الدخول فى الإسلام ويلاقى ست عجوزه فيفرح ويقعد معاها ساعه و تغير عائشه لما تعرف أنها واحده من صحاب خديجه و تقوله: لقد أبدلك الله خيرآ من خديجه (تقصد نفسها )..فيرد النبى ويقول :لا يا عائشة وهل فى الدنيا مثل خديجة؟ لقد أواتنى حين طردنى الناس, وصدقتنى حين كذبنى الناس, وواستنى بنفسها ومالها إذ حرمنى الناس, وهل فى الدنيا مثل خديجة؟" فقالت عائشة: "والله لا أراجعك فيها أبداً يا رسول الله, ولا أذكرها إلا بخير". وتقول عائشة: "والله ما غيرت قط من أمرأة من زوجات رسول الله إلا خديجة ولم أرها"

مات عم النبى و ماتت زوجته حبيبته وتتسمى السنه دى ب عام الحزن ❤ صلى الله على محمد صلى الله عليه وسلم ..