لو عرفتموه (الجزء الثاني 💜) مكتملة

105💜

الحلقة 105
#لو عرفتموه لاحببتموه
يلا بينا صلوا على النبى :)
غدر يهود بنى نضير برسول الله 🌷

شفنا إمبارح غدر أهل نجد و قتلهم 70 من الصحابة و اتأسر صحابى واحد بس، اسمه عمرو بن أمية .. و كان أسير عند عدو الله " عامر بن الطفيل " و باقى الصحابة مقتولين على الأرض ،فعامر بن الطفيل حيسأل سيدنا عمرو سؤال عجيب و يقول:يا عمرو.. من الميت هذا الذى هناك ؟؟(بيشاور على واحد من ضمن الصحابة اللى مقتولين على الأرض.. طب هو ليه عامر سأل عن ده بالذات؟ أصله أكيد شاف على الصحابى اللى ميت ده حاجة عجيبة).

فالمهم رد عليه عمرو قال له : هذا عامر بن فهيرة صاحب رسول الله .. فرد عامر بن الطفيل و قال : و الله بعد مقتله رأيته قد ارتفع حتر وصل إلى السماء ثم رأيتهم يردونه إلى الأرض ... ( هم مين اللى رفعوه ؟ الملايكة  ..إنتوا فاكرين عامر بن فهيرة؟ عامر بن فهيرة ده صاحب النبي عليه الصلاة و السلام في الهجرة من مكة للمدينة ..اللى كان بيحمي النبي و ابو بكر في الهجرة و كان بيمسح آثار الأقدام، فكان لازم ربنا يكرمه في الدنيا قبل ما يدخل الجنة :') ) ..

طيب عمرو بن أمية متكتف و أسير ..فيبدأ يتوعد لعامر و يخوفه بأن قبيلته حتقتص..فخاف عامر و فك أسر عمرو .. و يجرى عمرو بن أمية على المدينة، عايز يبلغ رسول الله بالمصيبة اللى حصلت ..فيقول عمرو: فذهبت أجري إلى المدينة لأخبر رسول الله فوصلت الليل بالنهار.. ماكنش بينام .. وهو في الطريق تعب فراح تحت ظل شجرة يرتاح.. و بعد شوية جه رجلين من بنى عامر ( من القبيلة اللى غدرت ب ال 70 صحابى) عمرو حاربهم قصاص لأصحابه..و قتلهم.. و كمل و وصل للمدينة .. و شاف النبى و بدأ يحكى المأساة :'( ..

فبكى النبي جامد جداً لدرجة أنه كان يشهق من البكاء و بعدين عمرو وصف له الاتنين اللي قتلهم من بنى عامر ..فغضب النبي عليه الصلاة و السلام جداً ..طب ليه ؟ أصل الاتنين دول طلعوا الوحيدين فى أهل نجد اللى كان بينهم بين رسول الله عهد و معاهم جواب أمان من رسول الله إن محدش يقتلهم .. فغضب النبي و قال : ياعمرو لقد قتلت إثنين ما أدينهما، فقال له : استغفر لى يا رسول الله ..والله لم أكن أعلم .. المهم حزن النبي حزن شديد على السبعين صحابى . و كل الصحابة فى المدينة كانوا فى شدة الألم و الحزن ..

و قال أنس بن مالك : فوالله ظل يقنت بنا شهر..( يعني النبى فضل يقف يدعى في آخر ركعة في كل صلاة ..و يدعى على الظالمين الغادرين .. القبائل اللى غدرت و يقول اللهم عليك بذكوان .. اللهم عليك برعد.. اللهم عليك بعصية .. عصية عصت الله ورسوله .. قتلوا أصحابى و يبكى.. (تحسوا انه دعاء حد قلبه محروق) والصحابة يقولوا آمين و ده يومياً لمدة شهر كامل ..

بس حيحصل حاجة حتريح قلب النبى شوية. إيه هي؟ الصحابة الشهداء،أحياء عند ربهم يرزقون.حاسيين إن النبى زعلان و مقهور عليهم، فقالوا لربنا،يارب بلغ عنا نبينا أنا قد لقيناك فرضينا عنك و رضيت عنا ❤ .. فتنزل آية قرآنية بس بعد كده نسخت. يعنى مبقتش موجودة فى المصحف (حنشرح موضوع الآيات المنسوخة بعد نهاية البوست).. واحنا عارفين ان جبريل قبل وفاة النبى عليه الصلاة و السلام راجع معاه القرآن مرتين.. تثبتت آيات و اتنسخت آيات ..ربنا حكيم ، فعال لما يريد.. طيب إيه هى الآية ؟" بلغوا قومنا أن قد لقينا ربنا فرضي عنا ورضينا عنه " فارتاح النبى شوية. طيب أبو البراء اللى خد ال70 صحابى وقال للنبى إنهم فى حمايته  ..أبو البراء وضعه إيه بعد قتل الصحابة؟