لو عرفتموه (الجزء الثاني 💜) مكتملة

103💜

الحلقة 103
#لو عرفتموه لاحببتموه
يلا صلوا على النبى 🌷
فاجعة الرجيع (غدر قبيلتى عضل و القارة و قتلهم ل6 من صحابة رسول الله)

شفنا المرة اللى فاتت أن القبائل اللى حوالين المدينة نقضت معاهدتها مع رسول الله.. و حصل محاولتين لغزو المدينة و لكن الحمدلله فشلوا .. بس بدأت القبائل تحاول محاولات خبيثة.. محاولات غدر..قبيلتى عضل و القارة .. ناس منهم راحت للنبى عليه الصلاة و السلام و قالوا عاوزين نتعلم الدين فابعت معانا من أصحابك ناس يعلمونا ويكونوا من العلماء ..( طب اشمعنا طلبوا كدة ؟ لأن الأمة بتتهد بموت علمائها).

فالمهم حيبعت النبى ستة من أحب الصحابة لقلبه و جعل عليهم قائد اسمه عاصم بن ثابت ..ومن ضمن الصحابة الستة صحابى اسمه مرثد بن أبى مرثد الغنوى.. مرثد قبل إسلامه كان له علاقة بامرأة ( علاقة فاحشة) و كانت المرأة دى اسمها عناق .. و لما أسلم سابها ..و النبى عليه الصلاة و السلام كلفه مهمة صعبة أوى و هى أنه يحمل الضعفاء المسلمين من مكة للمدينة عشان يقدروا يهاجروا .. و فى يوم شافت عناق مرثد قالت له : يا مرثد تعال بت عندنا الليلة ، فرفض مرثد و قال : يا عناق إن الله قد حرم الزنا فقالت: اذن أفشى سرك ،و بصوت عالى راحت قايلة : "يا معشر قريش أدركوا مرثد يحمل أسراكم " أصل مرثد ساعتها كان معاه واحد شايله ..فجرى بيه لحد ما لقى كهف فاستخبى فيه مع الرجل و بعد أيام حمل الرجل و كمل فى طريقه فى الهجرة للمدينة.

و لما وصل مرثد المدينة حكى للنبى عليه الصلاة و السلام اللى حصل و قال له : يا رسول الله أأتزوج عناق ؟ فالنبى مردش و أدار وجهه .. فقام مرثد جى من الناحية التانية و كرر السؤال .. أأتزوج عناق يا رسول الله؟.. فالنبى يسكت و يكرر مرثد نفس السؤال .. و تنزل الآية القرآنية ، قال تعالى : "الزَّانِي لَا يَنكِحُ إِلَّا زَانِيَةً أَوْ مُشْرِكَةً وَالزَّانِيَةُ لَا يَنكِحُهَا إِلَّا زَانٍ أَوْ مُشْرِكٌ وَحُرِّمَ ذَٰلِكَ عَلَى الْمُؤْمِنِين"، فالنبي قال له : يا مرثد لا تفعل إن الله حرم عليك ذلك.. ( طبعا حرام عشان هي لسه زانية.. لكن لو تابت خلاص..لأن التائب من الذنب كمن لا ذنب له..)

و على فكرة إقامة الحد الزنا "العقاب عليه " له شروط و هى أن يشوف الزانية أو الزانى أربع شهود فى وضع الزنا .. طب ده صعب صح ؟ أه صعب .. أصل ربنا بيصعبها عشان ربنا بيحب الستر يعنى كأن لو أربعة شافوا اتنين بيزنوا يبقى ده جهر و إعلان بالمعصية و دعوة للفسق .. فكأن الحد على الجهر بالزنا .. مرة واحدة فى ألمانيا شافت عرض مباشر لعلاقة زنا .. فدى طبعا دعوة للفسق ففى حالة زى دى يقام الحد للجهر بالزنا .. و مرة سيدنا عمر بن الخطاب وقت خلافته ، كان معدى فعينه وقعت على سيدة بتزنى بين الخوص فذهب عمر لعلي بن أبى طالب و قال له: رأيت سيدة تزنى ،فقال علي : يا أمير المؤمنين ..أمعك أربعة شهود؟

فقال عمر : لا ولكن رأيت بعينى يا علي ، فقال علي: والله لو نطقت باسمها لوجدت الجلد..فقال عمر: يا علي!! ، فقال علي: والله الجلد إلا لجئت لى بأربعة شهود، فقال عمر:"والله لا أنطق باسمها أبدا".. أصل يا جماعة ربنا ستير بيحب الستر ♡ و ربنا حليم بيحب يدى العبد فرصة .. قال تعالى : " وَالَّذِينَ لَا يَدْعُونَ مَعَ اللَّهِ إِلَٰهًا آخَرَ وَلَا يَقْتُلُونَ النَّفْسَ الَّتِي حَرَّمَ اللَّهُ إِلَّا بِالْحَقِّ وَلَا يَزْنُونَ وَمَن يَفْعَلْ ذَٰلِكَ يَلْقَ أَثَامًا*يُضَاعَفْ لَهُ الْعَذَابُ يَوْمَ الْقِيَامَةِ وَيَخْلُدْ فِيهِ مُهَانًا *إِلَّا مَن تَابَ وَآمَنَ وَعَمِلَ عَمَلًا صَالِحًا فَأُولَٰئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَّحِيمًا"