لو عرفتموه (الجزء الثاني 💜) مكتملة

119💜

#لو عرفتموه لاحببتموه

يلا صلو على النبى :) 🌷
غزوة الأحزاب أو الخندق (ج1)

إحنا دلوقتى فى سنة 5 هجرية..الكفار بدأوا يلاحظوا إن كل قبيلة منهم لو بتحارب النبى لوحدها..مش بتقدر على النبى, مثلاً أبو سفيان سيد قريش أيقن أنه لوحده مش حيقدر يعمل حاجة, وكمان "حيي إبن أخطب- قائد اليهود" تيقن إنه لوحده مش حيقدر على محمد, وكمان قبيلة " أشجع" و قبيلة"غطفان" وكل دى قبائل يهودية عرفت إنها لوحدها مش حتقدر على المسلمين, طيب إيه الحل ؟ حيقرروا كلهم أنهم يتجمعوا ضد محمد عليه الصلاة و السلام.. و صاحب الفكرة دى كان "حيي إبن أخطب" , و حيي إبن أخطب هو قائد اليهود فى مستوطنة إسمها خيبر, و المستوطنة دى نشأت بعد ما نقض اليهود المعاهدات مع النبى فى المدينة و غدروا وحاولوا يقتلوا رسول الله و أمر رسول الله بطردهم من المدينة فإجتمعوا فى خيبر .. كان حيي إبن أخطب نفسه ينتقم من النبي ويقتله, فجمع قوى عربية ضخمة جداً , جمع كل قبائل اليهود من أشجع وغطفان وبنى سُليم وكمان أبو سفيان سيد قريش ضد النبى.. حقول لكم قصة عن حيي إبن أخطب عشان تعرفوه كويس .. أصل حيي مش يهودى عادى.. ده واحد من كبار أحبار اليهود ( حبر يعنى عالم دين يهودى ) و حافظ التوراة, و زمان أوى سمع حيي عن النبى محمد, فحيي إبن أخطب خد أخوه و راح للنبى.. ( أصل سبحان الله ربنا عز و جل قال فى القرآن :{الَّذِينَ آتَيْنَاهُمُ الْكِتَابَ يَعْرِفُونَهُ كَمَا يَعْرِفُونَ أَبْنَاءهُمْ وَإِنَّ فَرِيقاً مِّنْهُمْ لَيَكْتُمُونَ الْحَقَّ وَهُمْ يَعْلَمُونَ} سوره البقره 146... "يَعْرِفُونَهُ" المقصود بها: سيدنا محمد لإن ربنا ذكر مواصفاته كلها فى التوراة ..وفعلاً راح حيي إبن أخطب للنبى فعرفه, فاخو حيي قال : يا حيي ..هو نبى..فماذا تنوى الآن؟ فقال حيي بن أخطب: نويت عداوته ما بقيت.. ( ياااه شايفين الكبر و الإستكبار.. و هوه ده معنى الكفر .. كفر يعنى ستر و غطى .. الكافر هو شخص عرف الحق و ستره و مشى ورا الباطل.. )

طيب نرجع للغزوة, حيي إبن أخطب عايز ينتقم من النبى و حيبدأ يجمع القبائل .. فراح لأبى سفيان فى مكة, و دعاه للتحالف معاه ضد سيدنا محمد, فوافق أبو سفيان طبعاََ.. و يروح حيي بن أخطب بعد كده لقبيلة غطفان اليهودية, وعرض نفس العرض و وافقوا , و بعدها راح لقبيلة أشجع اليهودية ووافقوا , وبعدها لقبيلة بنى سُليم اليهودية ووافقوا. وجمعت قريش كل حلفائها و بقى عددهم 4000 مقاتل و جمعت قبيلة غطفان حلفائها و بقى عددهم 6000المهم وصل عدد جيش الكفار فى الاخر ل10.000 مقاتل، طبعاً دى كارثة, ووصل الخبر لرسول الله .. طبعا إنتو عارفين إن كان فى أيام رسول الله حاجات شبهه المخابرات دلوقتى, طب حتعمل إيه يا رسول الله بعد ما عرفت الأخبار دى؟ طيب حترد العدوان؟ لأ.. مش حاخد قرار غير بالمشورة .. فيجمع المسلمين ويقول لهم : أشيروا علي أيها الناس, (رغم اللى حصل فى غزوة أُحد من خساير كتير بعد المشورة فى الخروج لمقابلة جيش قريش بس برده ربنا قال: فَاعْفُ عَنْهُمْ وَاسْتَغْفِرْ لَهُمْ وَشَاوِرْهُمْ فِي الْأَمْرِ ۖ فَإِذَا عَزَمْتَ فَتَوَكَّلْ عَلَى اللَّهِ ۚ" سورة آل عمران 159 فالمهم بدأ كل واحد من الصحابة يقول رأيه, بس النبى لسة موصلش لحل مناسب, لحد ما يقوم صحابى جميل جداً اسمه "سلمان الفارسي", وكان من بلاد فارس, حكينا عن قصة إسلامه الرائعة قبل كده.. المهم قال فكرة حلوة آوى, قال: يا رسول الله إنا كنا فى الفرس إذا حاصرونا .. حفرنا خندقناً حولنا..يعنى إيه؟ يعنى لما ييجى عندنا جيش أضعاف أضعافنا كنا بنحفر خندق حوالينا يعنى حفرة فبالتالى محدش يقدر يوصل لنا..ودى فكرة فارسية ، و النبى عجبته الفكرة, بالرغم إنها فكرة من أفكار بلاد كفار, لكن عجبت النبى وده يدل على إن النبى عليه الصلاة والسلام كانت شخصيته مرنة, طالما الفكرة مش ضد شريعة الإسلام ولا ضد منهجه ومفيهاش حاجة حرام فخلاص مفيش مشكلة لو نعملها، طيب المدينة كلها كانت محاطة بحاجة اسمها "الحارَّة" ربنا سبحانه وتعالى أحاط المدينة بحصون طبيعية من الشرق والغرب والجنوب .. المدينة محاطه بأرض صخرية جداً ومدببة و دى كانت لونها أسود و محدش يعرف يعدى من عليها لا خيول ولا حتى دبابات ^_^ , ومينفعش غير الطيران ووقتها مكانش فيه طيران.فكده كأن المدينة محاطة بمربع ناقص منه ضلع واحد وهو شمال و هنا بقى حنحتاج ننفذ فكرة سلمان الفارسي عشان نقدر نحمى المدينة من الشمال, فحيحفر المسلمين خندق بطول المدينة من الشمال و الحفرة حتكون عمقها 5 متر وعرضها 5 متر و طول الخندق 5 كيلو ..إنتو متخيلين إن وسيله الحفر الوحيده اللى فى إيد المسلمين حتكون الفاس !! تخيلتوا ^_^ ؟ رضى الله عنهم و أرضاهم .. طيب ليه حنحفر ونعمل خندق أصلاً ؟ عشان لما العدو ييجى يتفاجئي بالخندق وأصلاً عرض الخندق كخمسة كيلو فإستحالة يقدر حصان ينط للناحية التانية , فساعتها حيضطر العدو ينزل يمشى فى الخندق عشان يطلع يوصل الناحية التانية ويدخل المدينة, وده حيعمل فرصة للمسلمين اإنهم يسيطروا على العدو فحيتحول الخندق لمقبرة جماعية. و حتى لو العدو قدر يطلع من الخندق برده لا يمكن يقدر يعدى من السهام اللى المسلمين حيضربوها عليهم..طيب الخندق حيتحفر إزاى ؟ أحنا شوفنا رحمة النبى و رأفته مع الأطفال ومع زوجاته ومعاملته للصحابة, تعالى نشوفه عسكرياً كان عظيم إزاى..إيه فكرة الرسول فى تنفيذ الحفر؟

حنعرف سوا بكرة إن شاء الله ❤
#السيرة_النبوية_بالعامية_لنورهان_الشيخ