لو عرفتموه (الجزء الثاني 💜) مكتملة

193💜

# لو عرفتموه لاحببتموه
يلا صلوا على النبى :)
ماريا القبطية "أم إبراهيم بن النبى محمد صلى الله عليه وسلم" (ج3)

مارية فى بيت النبى عليه الصلاة و السلام ( وقلنا المرة اللى فاتت أن ماريه كانت ملك يمين .. وزمان كان فى طريقتين شرعيتين للمعاشرة بين الرجل والمرأة ، واحدة منهم الزواج الشرعي والتانية ملك اليمين ، " وَالَّذِينَ هُمْ لِفُرُوجِهِمْ حَافِظُونَ * إِلَّا عَلَى أَزْوَاجِهِمْ أوْ مَا مَلَكَتْ أَيْمَانُهُمْ فَإِنَّهُمْ غَيْرُ مَلُومِينَ" [سورة المؤمنون]

وملك اليمين كان موجود زمان وانتهى دلوقتى مش موجود فى عصرنا الحالى فمفيش حاليا غير الزواج الشرعى بس و فى تفاصيل مهمه ارجعوا لاخر الحلقه اللى فاتت اقروها) 

المهم يحصل موقف جميل جداً .. هتعيشى فين يا مارية؟ طب زوجات النبى عايشين فين ؟ فى حجرات جمب بعض حوالين المسجد النبوى.. بس مارية مش حتستقر جنبهم.. اصل مارية جاية من مصر من بيئة فيها نيل و هوا .. و كمان وحدانية ملهاش حد ، فحتعيش مارية فى " العوالى " دى منطقة فى المدينة يعنى زى الريف عندنا.. فيها مياة و زرع ..جوها شبه جو مصر شوية..
شايفين النبى بيحترم نفسية المرأه أد ايه.. و رغم كده ييجى حد فى زمنا ده يقول إن الإسلام مش بيحترم المرأة ..طب أزاى بس !! أقولكم حاجة جميلة فى الفقه اذا كانت المرأة مخدومة وجب على زوجها أن يخدمها وأن لم تكن فلن يجب عليه و لكن إحسانا لها يجيب خادم .. يعنى ايه ؟ يعنى لو كانت البنت فى بيت أبوها عندها دادة و اتجوزت يبقى واجب على زوجها انه يجيبلها دادة  زى ما كانت فى بيت أبوها لو هو يقدر مادياً ..(لو هو مادياً ميقدرش ده موضوع تانى) طب لو ماكنتش مخدومة يعنى متربية فى بيت مافيهوش دادة ؟؟ يبقى مش واجب عليه بس ان كان مُحسناً و لطيف يبقى يجيب لها خادم يعنى فى الحالتين ياريت تجيبلها دادة ( ده الفقه فى الإسلام بيقول كده فشوفتوا أد أيه إكرام الشريعة للمرأة فى الإسلام)

المهم حتعيش مارية فى العوالى ، طيب البيت اللى فى العوالى ده النبى عليه الصلاة و السلام جابه منين هو النبى معاه فلوس يجيب بيت فى منطقة زى العوالى ؟ لأ طبعا ًو لكن فى غزوة أُحد فى واحد يهودى اسمه مُخيريق ده أسلم و حارب فى غزوة أحد و مات شهيد و مكنش لحق يصلى صلاة واحدة و لحظه موته فقال : إن مت فمالى كله لمحمد يفعل به ما يشاء.. و مات فعلاً شهيد..فالنبى قال عمل قليلاً وأُجِرَ كثيراً ..لأنه مات و اسلم و فى نيته طاعه الله و رسوله و حيدخل الجنة من قبل ما يسجد سجدة واحدة.. فلما مات ايه التركة الى سابها ؟ حتة جنينة وأرض و بيت صغير فى العوالى هو ده اللى حتسكن فيه مارية .. 
النبى ﷺ كان بيحبها.. و طبعاً كان بيحب عائشة اكتر بس عائشة كانت بتقول انها كانت بتحس بالغيرة من مارية لأن النبى كان بيزورها كتير.. و طبعا كان النبى بيقدر ان ماريه ملهاش حد.. المهم بعد كام شهر حصلت مفاجأه وهى ان مارية حامل ..

تخيلوا فرحة النبى ﷺ النبى خلف من السيدة خديجة بس أما التسع زوجات التانين مخلفوش منه فحيخلف النبى عليه الصلاة السلام على كبر و دايماً تلاقوا اللى بيخلف على كبر بيبقى قلبه رقيق أوى و بيدلع الطفل أوى لأنه جاله على كبر 
فالنبى حيفرح فرحة شديدة وكأن ربنا بيعيد التاريخ من الأول.. زى ما هاجر زمان كانت جارية و تزوجها سيدنا إبراهيم و خلف منها سيدنا إسماعيل لما زوجته السيدة سارة كانت عقيم.. فبردة مارية الوحيدة اللى تخلف للنبى ﷺ .. فمارية تبقى حامل و كل المدينة تبقى فرحانة و مستنية المولود إلا واحدة بس .. السيدة عائشة ... لأن أى إمرأة بتحب زوجها بتبقى نفسها تخلف منه ..

أوعوا تفتكروا انها كانت سهلة على عائشة أنها ماتخلفش من النبى ﷺ لأنها كانت صغيرة و تقدر تخلف.. و كانت بتقعد تدعى ربنا أن ربنا يرزقها الولد و راحت مرة بتبكى تقوله يا رسول الله كل نسائك لهن كُنية و أنا معنديش لأنى معنديش أولاد (اصل زوجات النبى التانيين كانوا مخلفين من ازواج قبل النبى و كان عندهم أولاد و لهم كنيه زى السيده أم سلمه مثلا و السيده ام حبيبة ) المهم فقال النبى لها: لا تبكى يا عائشة أنتى أم عبد الله (ابن اختها عبد الله بن الزبير) فكان نفسها تخلف.
طب ايه حكمة ان ربنا خلى عائشة متخلفش ؟ عائشة هتروى اكتر من 2000 حديث عن النبى وكلهم فى الفقه فمينفعش يا عائشة تنشغلى بأطفال فكان ده اصطفاء من ربنا للبشرية.. فزوجات النبى اللى بعد خديجة مخلفوش منه.. طب اشمعنا مارية تخلف ؟! عشان محدش يقول ان النبى مخلفش عشان ميقدرش يخلف .. لأ النبى يقدر يخلف بس إرادة ربنا أنه ما يخلفش لفترة .. المهم تحمل مارية و النبى يبقى طاير من الفرحة.. و يعدى شهر اتنين تلاتة لحد ما نوصل للشهر التاسع و تخلف ابراهيم بن محمد صلى الله عليه وسلم
نكمل بكرة إن شاء الله