لو عرفتموه (الجزء الثاني 💜) مكتملة

180💜

# لو عرفتموه لاحببتموه
يلا صلوا على النبى :)
تلخيص غزوه تبوك ❤

عشان نقدر نستوعب الغزوات سوا.. فأحنا اتفقنا أننا حننزل بوست يبقى فيها تفاصيل كل غزوه فى نقاط مختصره و كمان اسبابها .. و بعدين حننزل يوميآ بتفاصيل الغزوة كلها على حلقات بإذن الله
#غزوة_تبوك
1- التوقيت : سنة 9 هجريا من شهر رجب
2- سميت بهذا الأسم:
كانت فى موقعه تبوك.. و ليها اسم تانى اتذكر فى القرآن "غزوة العسرة" و ده لصعوبته ظروفها و مشقتها...و كمان الناس سموها بغزوة "الفاضحة" لأنها فضحت المنافقين و حنعرف ازاى بعد كده..
3- طرفى القتال : الرومان و المسلمين
4- أسباب الغزوة :
وصلت اخبار للمسلمين أن الرومان حضروا عدد كبير جدا من الجنود وهو 40,000 مقاتل للقضاء على المسلمين

5- احداث الغزوة :
- النبى عليه الصلاة و السلام هيخرج للقتال لانه لو مخرجش هما حيهاجموه جوه المدينة. النبى خرج بالفعل ومعاه 30,000 مقاتل ..

- المسافة بين المدينة و تبوك حوالى 1000 كيلو, والمسلمين كان معاهم بعير للركوب, وكل 3 يتعاقبون على بعير.., وقتها كانوا فى شهر أغسطس فى عز الحر فى الصحرا.

- هيخرج المسلمين بلا طعام, يدوب التمر و الماء لانهم خرجوا قبل موسم الحصاد فمكنش فيه اكل..لدرجه ان كان الصحابى يمص التمره عشان تفضل معاه فتره اطول

- حيتخلف عن المعركه بعض الصحابة عن رسول الله و لكن ربنا حيتوب عليهم و حيكرمهم بنزول الآيات عشانهم

-حيتخلف المنافقين عن المعركة و حيقدوموا الاعذار

-وصل المسلمين لمنطقه تبوك بعد مسافه طويله قطعوها فى 50 يوم فى عز الحر و العطش .. و ملاقوش جيش الرومان .. لأن الرومان لما عرفوا ان المسلمين استعدوا بسرعه للقتال فخافوا وأنسحبوا.. وبكدة خلاص مفيش معركة.

- غزوة تبوك كانت اخر غزوة فى حياة النبى عليه الصلاه و السلام.. و دى تعتبر اختبار للصحابة و لتصفية جيش المسلمين من المنافقين

و التفاصيل فى الحلقات الجاية ان شاء الله❤
#السيرة_النبوية_بالعامية_لنورهان_الشيخ